大首爾 (已結業)

今日在開紅水橋附近上堂，好耐無黎呢頭上堂了，平時黎開紅水橋都係去開輕鐵站向元朗方向附近食，貪果邊多茶餐廳，但係今次有同學提議去對面睇下有咩其他野食，行下行下見到呢間韓式餐廳門口有午餐餐牌，又有幾多人在入面食，我地五個人就入黎試下。坐式，見到好多人食石頭飯，但係旁邊有人叫石頭飯時，服務員姐姐話石頭飯要等半個鐘先有，因為太多人叫做唔切，問我地如果趕時間可以叫其他，所以我睇下餐牌，就叫左一個最普通既韓式豬肉飯。坐底後服務員姐姐第一時間，送上一個紫菜豆腐湯，人人都有份，幾好無味精，而且味道幾好飲。除左個飯之外，係有韓式前菜，每一枱四個人，share的，有三款前菜，食下食下差唔多食晒，Ｄ飯就到，幾好味。主角黎啦，韓式豬肉飯，首先講Ｄ豬肉，非常入味，甜甜地濃味醬汁泡製，送飯一流，另外亦配上蛋，真係好好食，好快我就食晒，所以非常有驚喜。其實44蚊真係唔貴，即係42再加2蚊凍飲，又有足料紫菜湯，又有前菜，個飯又好食，午餐真係一流，下次有時間再黎一定要試下佢地個石頭飯，咁多人叫一定好食，而呢間餐廳夜晚應該係做燒肉生意，每一枱都有一個煙囪，搵日再黎試下，值得推介！