鳥海山鐵板燒 (裝修中)

好耐冇食鐵板燒，趁消費劵一出就約埋朋友嚟長沙灣鳥海山。剛好遇著打風，餐廳比較清靜，但環境舒適乾淨，兩邊墻掛着壁畫，又優雅又靚。餐廳有多款二人鐵板燒套餐選擇，另外仲有刺身，丼和小食。刺身叫咗金目鯛和油甘魚：厚切兼大大塊，油甘魚食落甘甜，口感清爽。用火燒出金目鯛嘅油份，令入口又鮮又甜。大蝦鐵板燒套餐，先上沙律，燒比目魚：肉質細嫩，每一面都煎至金黃色，食落卜卜脆。燒大蝦：一上枱就聞到蝦膏嘅香味，蝦肉非常爽口彈牙，蝦頭肉滿滿嘅蝦膏，鮮甜甘香。安格斯牛肉：伴着炸蒜片，牛肉味濃厚。炒飯粒粒分明，好有鑊氣。最後係炒野菜和麵豉湯。小店有驚喜，性價比高。