收工同朋友係K11行街搵食，見到依間餐廳裡面有棵樹好特別又吸引。餐廳裡燈光柔和，簡潔優雅，大樹在餐廳中間，感覺十分舒服和放鬆。 餐廳內的飲用水入面唔係檸檬，而係長炭，幾特別。 BLACK TRUFFLE PASTA - 一上枱松露果股香氣先達，見到厚切嘅大啡菇已經好吸睛，意粉係我鍾意嘅厚實長通粉，口感煙煙韌韌，口感好好；入口黑松露股香氣直衝味蕾，跟大啡菇一併入口，兩種菇味互相交錯，配合得非常完美，呢個非常推介👍🏻。 SIU WAN RICE - 金沙骨外層燒到少少脆香，色澤均勻，有啲似叉燒。日式珍珠米做飯底，再配上溫泉蛋和醬汁，幾特別。 🍷Nectar peche blanche - 一支桃味嘅果汁，入口好杰身，好有質感嘅飲品，唔會太甜，桃味🍑突出，最岩我呢個桃迷。 ☕️MILK CHOCOLATE - 朱古力味香濃幼滑。因為晚餐唔想飲咖啡，所以就order 咗杯朱古力，都係唔錯嘅選擇。

隨著屯馬線開通，土瓜灣食肆都相對越開越多，而且價錢親民又高質。今日lunch就試咗依間係啟岸一樓嘅WM CAFE & BAR。店內裝修明亮寛敞，座位舒適。 嘢食都有唔少選擇，有意粉類，飯類，pizza ，甜品和飲品⋯lunch 時段仲有lunch set, 價錢大衆化。 WM海鮮龍蝦汁意大利捲粉：濃郁嘅龍蝦汁好突出，分佈均勻，被每條意大利捲粉捲住，鮮味十足。 柚子海鹽蜜糖燒雞配墨西哥莎莎薯條：燒雞上枱時香氣撲鼻，沙律薯條伴碟，燒雞皮燒到脆一脆，但雞肉又唔會太乾，雞肉實又夠味，又香又好食。 飲品同樣高質，芝士奶蓋焦糖爆谷拿鐵：賣相吸引又滿足。檸檬柚子沙沙：真材實料，飲落fresh又開胃。 店員都好有禮貌和貼心。

黃埔分店十三少交通非常方便，就係地鐵站隔離。店內裝修整潔，店員有禮親切。 川味口水雞：例牌份量都唔少，佈滿紅油芝麻，雞肉嫩滑，雞皮爽口，入口麻麻辣辣好滋味。 椒麻皮蛋：擺碟和色澤好靚，蛋黃好似流心咁，食落唔太辣，香口又好食。 十三少酸菜魚：我哋叫咗少辣，上枱時店員介紹先飲啖湯再食魚，有禮又細心。魚湯酸辣適中，酸酸辣辣打開胃口，魚肉大大件又冇骨，份量同鮮味十足。值得推介！ 紅糖糍粑：上甜品之前店員為我哋換新碟，讚！糍粑即叫即炸，上枱時熱辣辣。外脆內軟，點着香濃又唔太甜嘅黑糖漿超好食。 十三少唔只餸菜好食，連甜品都唔錯。

依間高質西餐廳係食肆林立嘅荃灣兆和街，環境舒適，燈光柔和有格調。店員哥哥有禮又有善，坐得舒服食得開心。 南瓜忌廉湯，配上一籃三款麵包，有軟有脆又有嚼頭三款口感，重點係個黑松露牛油醬，好味又香口，好有驚喜。 酥炸生蠔：漿粉唔太厚，鮮味蠔肉，鬆脆香口。 香煎比目魚配菠菜忌廉汁燴天使麵：比目魚底面煎至金黃色，香脆細嫩啖啖肉。菠菜麵條條掛汁又唔漏，份量都唔少。 烤安格斯牛柳配香煎鵝肝：鵝肝表面脆皮內裏軟滑，伴着薯菜一齊食，中和鵝肝油膩感。烤安格斯牛柳，層次分明，外層焦香，內裏肉汁豐富，牛肉味香濃，點着自家製醬汁，味道一流！ 師傅用心製作，每款出品都好精緻，而且份量剛好，連伴碟薯菜都好好味。

平昌裝修和佈局都好韓式，同睇韓劇嗰啲參唔多，一入場會以為自己去咗韓國咁。平昌主要係放題為主，有大君御膳和世子御膳兩款放題，如果淨係想食吓韓燒傾吓偈，我覺得大君已經好多款式選擇。另外有幾款飲品係自助嘅。 韓燒有牛肉，豬肉，雞肉，肉類，海鮮和蔬菜。餐牌一目了然，好清晰。牛肉和豬肉各有9款，每次上嘅份量唔多，可以試齊晒，覺得啱口味再order。調味烤牛肉和照燒薄切五花腩片最好食，已調味嘅牛肉又薄又快熟，夾住生菜食一流。五花腩片燒到啲油出晒，脆脆地，真心推介。調味雞翼都唔差㗎。海鮮類有虎蝦，扇貝和蠔，仲有鯖魚和魷魚。 另外仲有啲好地道嘅熟食，醬油鵪鶉蛋，炒粉絲，石鍋拌飯等等，叫個辣海鮮豆腐湯和石鍋拌飯，湯好足料和惹味，拌着飯一齊食好開胃。 店員醒目又有禮，落單上菜上得好快。而且當店員一見到鐵板燒焦就即刻換，讚👍🏼

好耐冇食鐵板燒，趁消費劵一出就約埋朋友嚟長沙灣鳥海山。剛好遇著打風，餐廳比較清靜，但環境舒適乾淨，兩邊墻掛着壁畫，又優雅又靚。餐廳有多款二人鐵板燒套餐選擇，另外仲有刺身，丼和小食。 刺身叫咗金目鯛和油甘魚：厚切兼大大塊，油甘魚食落甘甜，口感清爽。用火燒出金目鯛嘅油份，令入口又鮮又甜。 大蝦鐵板燒套餐，先上沙律，燒比目魚：肉質細嫩，每一面都煎至金黃色，食落卜卜脆。燒大蝦：一上枱就聞到蝦膏嘅香味，蝦肉非常爽口彈牙，蝦頭肉滿滿嘅蝦膏，鮮甜甘香。安格斯牛肉：伴着炸蒜片，牛肉味濃厚。炒飯粒粒分明，好有鑊氣。最後係炒野菜和麵豉湯。 小店有驚喜，性價比高。

位於觀塘工業區內嘅漁吉海鮮丼專門店，環境清靜又乾淨。座位唔算多，但keep住都有外賣。餐廳主打丼飯，價錢由$98至$228，豐儉由人。另外仲有壽司，卷物和輕食。 漁吉特選丼，材料豐富又新鮮，三文魚，油甘魚，吞拿魚，全部都係厚切同大大件，因為冇鮑魚而轉左大大片鰻魚，海膽鮮甜，原隻連頭赤蝦，另外櫻花魷魚和三文魚籽參唔多鋪滿半碗飯，好滿足。醋飯酸度剛好，粒粒分明。 北海帆立貝丼，有三隻火炙帆立貝和海膽，鮮味又香口。大量三文魚籽，撈飯一流。

進入冬季又係打邊爐季節，丼瀛都因應天氣推出幾款火鍋套餐。五款套餐分別有齊豬牛羊同海鮮，梗有一款啱食。套餐仲有得揀湯底，配野籃一份同一杯飲品。 黑豚肉跟黑蒜油豚骨湯：黑豚肉脂肪唔多，肉質結實有口感，係黑蒜湯內煮熟，唔使調味都好食。野菜籃有冬菇，洋蔥，金菇，粉和野菜，好鍾意佢個黑蒜湯底，又濃郁又香，所有野煮完，夾住黑蒜香味，唔使調味料都夠晒味。 天龍卷：擺盤好有誠意，完全貼合個名。三文魚炙燒過，連埋吉列蝦好有口感。 忌廉蟹肉薯餅

係圓方商場裡面嘅天天海南雞係米芝蓮星級推介餐廳。餐廳裝修型格，地方闊落，座位舒適。店員殷勤有禮，非常親切。 暖笠笠二人套餐幾抵食。 花膠太史蛇羹：有木耳冬菇絲雞肉豬肉蛇肉等等，配上白菊花瓣同蛋散薄脆。真材實料，味道清新唔太咸，食完暖笠笠，絕對係秋冬進補之選。 正宗海南雞：雞肉嫩滑，雞皮爽脆，去咗骨啖啖肉，仲跟埋雞汁增加鮮味。另外三款醬汁有辣有唔辣，適合唔同口味。 蟹粉豆苗：蟹粉好香口，味道剛好。 生炒糯米飯：粒粒分明，軟硬適中。連糯米飯裡面嘅臘腸和潤腸都好香好好味。 飲品：桃膠菊花桂花雪梨茶和黑糖三棗桂圓薑母茶，同樣材料十足，茶味香濃。

行尖沙咀城品覺得依間cafe好吸引，之前經過以為只係提供飲品和小食，可以方便俾人打吓書釘，今日睇吓餐牌，原來都有主食提供。餐廳格局裝修時尚，燈明几淨，一塊落地大玻璃最吸睛，睇到夜景之餘仲可以欣賞到維港聖誕燈飾，既寫意又令人心曠神怡，為忙碌了的一整天減減壓。 Char Siu w/ papaya salad 配搭新鮮，叉燒唔係港式個D，係五花腩自行醃製，都得香，而青木瓜就中和咗叉燒嘅油膩感，好味又有咬口。 Boston lobster pasta 擺盤精緻，龍蝦新鮮肉質結實，師傅好細心，功妙地將蟹鉗預先整裂，影完相再食都冇難度。意粉酸甜適中少少辣，幾開胃。 Grapefruit Buddy & Fruit Romance 飲品一杯係橙+茶 幾fresh 同香，另一杯有薑味，有聖誕節氣氛。