清真牛肉館 (龍崗道) (已結業)

今晚我們探完表姐同啱啱出世嘅表姨甥之後，同大姨媽一齊去咗九龍城龍崗道嘅「清真牛肉館」食晚飯！我們叫咗咖哩牛腩一上碟嗰陣，濃郁嘅咖哩汁味道已經香氣撲鼻，味道調教得相當出色，有好香濃嘅咖哩香味，我們用啲咖哩汁嚟撈飯食，食咗一碗都覺得唔夠，所以再添多碗飯嚟撈咖哩汁食，真係好正呀！而牛腩嘅肉質好鬆軟嫩滑！清真牛肉餅嘅餅皮非常薄身，外層煎得好金黃香脆，入面嘅牛肉肉質相當鮮嫩，而且有好多肉汁，味道都幾鮮甜！酸辣湯嘅材料都幾豐富，酸辣嘅味道調教得恰到好處，唔會過酸或過辣！三絲拉皮嘅三絲係香濃嘅牛𦟌絲、鬆軟嘅鷄肉絲同爽滑嘅牛肚絲組合而成，粉皮嘅質感好軟滑！牛肉水餃嘅餃皮都幾薄身，入面嘅肉質好鮮嫩多汁！清炒白菜嘅味道好清甜爽脆！乾燒四季豆炒得好夠鑊氣，味道非常惹味，四季豆好青嫩同無根！蔥油餅煎得香脆乾身，香蔥嘅份量相當多，味道好惹味香口！