影片
更多
2009-04-27
155 瀏覽
已經唔多吃buffet的我，適逢今次係小公主升職關係，佢之前同朋友食過話幾好，有機會一定要帶我去試試，而且這裡亦是我老闆推薦的餐廳之一，咁當然要會一會佢啦。朝早訂枱，都算幸運，仍然有枱，但餐廳話今日訂枱頗滿，問我介唔介意要坐到走廊尾，我之前都去過食afternoon tea，咁當然唔係buffet形式，唔需要行去攞嘢食，但係冇所謂啦，難得今日有時間，而且坐遠啲可以當做運動又可以靜啲，恩言接受，餐廳亦說如果有枱的話，會幫我調近啲buffet枱。今日嘅dinner buffet係有特別主題 - 印度食品。可能因為經濟不景所致，價錢亦都較早前調低咗$50-$60。今晚有段小插曲，到達嘅時候，因為應該有位調動關係，waitress話幫我地調咗位，坐到近buffet枱，但又係窗邊嘅二人枱，非常滿意。因為6:45 去到嘅關係，都未開始肚餓，咁就先影幾幅相先，不過大部份都係冇開閃光燈，但係我地坐位嘅光線係頗暗，所以我影小公主時唯有開閃光燈，只影咗三張有閃光燈嘅相的一刻，有一係著住西裝嘅waiter走埋話："請你唔好用閃光燈"，之後不發一言，就走咗了。佢唔解釋原因，又冇話其他客人投訴，只係不禮貌、態度
朝早訂枱，都算幸運，仍然有枱，但餐廳話今日訂枱頗滿，問我介唔介意要坐到走廊尾，我之前都去過食afternoon tea，咁當然唔係buffet形式，唔需要行去攞嘢食，但係冇所謂啦，難得今日有時間，而且坐遠啲可以當做運動又可以靜啲，恩言接受，餐廳亦說如果有枱的話，會幫我調近啲buffet枱。
今日嘅dinner buffet係有特別主題 - 印度食品。可能因為經濟不景所致，價錢亦都較早前調低咗$50-$60。
今晚有段小插曲，到達嘅時候，因為應該有位調動關係，waitress話幫我地調咗位，坐到近buffet枱，但又係窗邊嘅二人枱，非常滿意。因為6:45 去到嘅關係，都未開始肚餓，咁就先影幾幅相先，不過大部份都係冇開閃光燈，但係我地坐位嘅光線係頗暗，所以我影小公主時唯有開閃光燈，只影咗三張有閃光燈嘅相的一刻，有一係著住西裝嘅waiter走埋話："請你唔好用閃光燈"，之後不發一言，就走咗了。佢唔解釋原因，又冇話其他客人投訴，只係不禮貌、態度強硬地好叫我不要再用閃光燈，當時佢咁嘅"態度"，我真係無明火起。
我隨即找來另一位waiter作出投訴，呢位waiter雖然唔關佢事，但佢都先行向我地道歉。後來過了約十分鐘，另一位穿西裝侍應走來，端來一張佢嘅卡片，自我介紹係助理餐廳經理，佢雖然冇向我解釋何解佢嘅同事會有如此行為，但有禮貌地向我地道歉，亦說稍後會進行檢討，其實佢地反應之快，亦已經不得不佩服佢地嘅五星級酒店服務，雖然有得失客人之處，但都即時改正，係尊重客人的表現。我亦都向佢解釋，我明白做客戶服務嘅困難，但係算遇到剛剛的情況時，亦要客氣禮貌地向客人解釋，而唔係命令客人後，即時離開呢。
後來，佢地又送上兩杯鮮橙汁，說是他們送的。再過了一會，之前第一次不禮貌對待客人的waiter，亦走埋嚟向我道歉，全晚到我地離開前一共道歉了三次，由此證明，佢地之前真係有搵返呢位同事了解事發經過，而唔係草草了事。而且應該係為表達佢地嘅誠意，除咗即時送上鮮橙汁外，本來佢地說可以讓我地任叫 menu裡的紅白酒，不過我地都說唔需要了。最後差不多吃到尾段時，呢位waiter再次走來，問我地有冇興趣試佢地嘅雪糕，佢可以攞比我地，但其實我地兩個已經好飽，亦推卻佢嘅好意。
言歸正轉，講返今晚嘅食品：
1. Assorted Bread - 一開始就端來一藍麵包，一款軟嘅，一款硬的類似五穀包，賣相重於質素，不過以自助餐來說，通常都係自己出去攞，但係呢度照顧周到。
2. Seafood - 睇都未必可以睇得最仔細，一食便知龍與鳯，蝦嘅新鮮程度係超級彈口，真係好新鮮，龍蝦仔嘅肉係唔會"痴"穀嘅，都係非常新鮮，最勁嘅莫過於阿拉斯加長腳蟹，半呎長，厚肉，最緊要夠新鮮，仲有翡翠螺、兩種生蠔、青口、蟹、賴尿蝦。
3. Salad (1) - 今晚話明主題係India，真係勁，連Salad都有印度嚟嘅，我就冇試過了，不過賣相唔差嘅。
4. Salad (2) - 傳統沙律，有生菜、火箭菜、粟米、車厘茄嘅自選組合，又有預先撈好嘅，有薯仔沙律、Penne Salad，最特別係有一個幾好味嘅Roasted Duck Salad，故明思義入面一定有燒鴨絲，加上好多切了絲嘅瓜，再加上細細段嘅鮮露荀，味道豐富。
5. 鮮橙汁 - 餐廳為表達歉意，特別送上的兩杯。都好大杯，最後都飲唔哂，超級多果肉，出面好少有咁嘅水準。
6. Soup - 湯有兩款，Mushroom Soup & 粟米雞茸羹，反而冇好似其他buffet有中式老火湯供應，佢地果然係主打外國食品嘅餐廳，比較英式。Mushroom Soap非常之有濃烈香菌味，但係佢地會將磨菇完全磨爛，融入湯入面，唔似得其他地方咁有口感，不過各有優點。粟米雞茸羹我就試咗一淡，稀杰度適中，最緊要係淡淡都有粟米同雞肉，材料豐富 (不過如果可以好似我媽媽咁落少少雞雜會更加好，不過呢種係中式煮法，唔啱佢地呢間餐廳)。
7. 刺身 + 壽司 + 熱葷 - 呢度嘅刺身係擺喺度任你攞，香港已經好少酒店buffet提供，佢有例牌幾樣刺身，特別值得一提嘅係三文魚好肥, 但係肥瘦適中，另一款係甜蝦，鮮甜，比你可以盡情吃過夠 ; 壽司方面都好多選擇，賣相吸引，試了一款鰻魚壽司，飯硬，鰻魚唔夠厚同肥美，算啦，始終佢地唔係主打呢方面嘅菜式。熱盤真係唔多，可能因為今晚係印度為主題嘅，有一半地方擺印度菜，熱葷剩返五盤，真係少得可憐，但係仍然係貴精不貴多嘅宗旨，記得有鱈魚扒、鎮江骨、炒蝦球、扒津白、扒粉絲 (名牌上就寫得好聽，叫Glass Noodle)。鎮江骨都算唔錯，不過稍嫌唔夠肥，冇咁多肉味帶出嚟 ; 炒蝦球嘅蝦就唔太新鮮，中式菜嚟講已經屬上乘之作。
8. Roasted Beef w/ Yorkshire Pudding - 永遠唔會有一個廚子長期企喺度，但你企埋去，附近的廚師都會好醒目即刻走埋嚟serve你。如果你冇特別要求，佢地係唔會好似其他地方咁吝嗇，一定會係 thick cut，所以如果你食唔哂咁大份，就要預先同佢講定，廚師一落刀已經睇到舊肉雖然大，但係好軟熟，再淋上gravy，旁邊仲見到有Yorkshire Pudding，呢樣你就要要求佢至比你嘅。第一塊係最好嘅，因為佢切到啱啱舊肉嘅中間，非常鮮嫰，雖然仲係紅色，但係已經冇血水流出嚟....median, juz perfect ; 不過Yorkshire Pudding就比較乾，可能係放咗喺度都幾耐了，入面已經一啲都唔軟熟，同埋焗得太濃，不過仍然無損我享受呢塊美味嘅牛肉。第二塊就可能近邊，肉質會冇咁軟，but仍然係上等貨式。
9. 鱈魚扒 - 好嫰滑肥美，又夠厚，一大淡一大淡咁食，人生一大快事，但伴碟莧菜同汁就略為鹹。
10. 印度薄餅 - 今晚嘅主題，當然要試吓，佢地除咗沙律菜式，仲有炒飯、薄餅、咖喱、甚至連甜品都有，算係大開眼界。試咗兩款薄餅，一種有蔥、一種冇蔥，但同樣係唔鬆同埋頗濃又乾，反而兩種咖喱味都唔錯，尤其加咗牛肉嗰款。
11. Dessert & Fruit - 甜品就以mini size, bit size為主，一件一口，可以比你試多幾款，冇試佢地嘅Bread Pudding，最值得欣賞嘅首選係佢地嘅朱古力甜品，chocolate mousse打得超滑，小公主專乘攞咗件黑森林比我食，但入口就頗為失望，事關問題不在於蛋糕本身，朱古力亦非常滑，而係入面浸滿酒嘅車厘子，實在太西方口味，酒味太重，完全搶奪了朱古力味，甚至可以話係搶喉，食完成條喉嚨當堂熱哂。Cheese cake就冇咩質感，texture太過鬆散，可能係蛋糕本身太乾所致。不過講到底，佢地嘅朱古力仍然做得咁出色，保持一貫水準，就機會應該大吃特吃。 Sherry Trifle就明顯差過早幾日喺Soho區嘅Yorkshire Pudding食嘅，呢度嘅竟然中間果層係變哂水嘅，食落去口感完全唔合格。而且佢地係冇雪糕、中式糖水、甚至生果都冇，要吃水果最多只會喺切成粒狀放係糖水入面浸住嗰啲。講埋盛載用嘅器皿，大部份都係用細細隻嘅玻璃碟，但係杯仔就竟然可以用膠嘅，堂堂大酒店餐廳，唔使咁慳嘛。
12. 檸檬茶 - 仍然係那麼傳統英式風格，有大大嘅茶杯，銀器做嘅茶壺同茶隔，可以倒出兩杯半嘅份量，絶對飲到你夠。紅茶不致於過濃，配合新鮮檸檬，狀甚講究。
Comments: 餐廳主打外國食品，中國食品好少，如果去之前一定要注意，連食物牌都係全英文架。客人亦都好高級，有不少外國人幫襯，絶對唔會有搶住攞嘅情況出現，大家都好斯文客氣。雖然有著一段不愉快嘅開始，但係隨著佢地補救嘅速度及誠意，為佢地嘅服務喺我心目中爭回不少分數。以文華一向喺業界出名高質素的服務標準，而且以呢個相當合理嘅價錢享受如此高質素食物，雖然有少少瑕疵，但係以絶大部份都係高水平之作，已經係酒店buffet中的五星級，絶對值得我下次抽時間再次光臨。
張貼
