大隻佬麵家 (已結業)

傾完嘢有啲肚餓，行去黑布街揾大隻佬，好耐無嚟過，還記得第一篇食評是我寫的，今日唔知點解店內好大陣漂白水味，點了招牌豉油王炸醬撈河($44)及秘製豉油王撈麵($34)，雖然知道呢度豉油王撈麵會落豬油，但又其實已經慣咗會問有落豬油嗎？服務員話有，一聽完好像放下心頭大石。招牌豉油王炸醬撈河，之前食評提過與好多麵店之炸醬不同之處是炸醬顏色跟豬肉絲一樣是淺啡色，而坊間很多都是比較深色同較濃味(通常紅紅橙橙色的)，味道不會太過鹹，河粉本身不是靚貨，是幼身的但不是最滑溜的，好在撈了豉油及豬油，就是豬油令河粉滑一些，不過撈得未夠均勻，而河粉再配上炸醬一齊食後，挽回不少分數。秘製豉油王撈麵，之前食評亦提過值得一讚是師傅處理撈麵過程做得不錯，每條麵條都能均勻地沾上秘製豉油，加上豬油後完全能蓋過麵條本身之鹼水味，令麵質更爽同更彈牙之餘，亦食到好濃之豉油味，不錯！所以話豬油是靈魂！