豬仔糖水 (已結業)

今日放假同媽媽行完街餓餓地想搵啲甜品食行下行下就入左呢間甜品舖到坐啦~呢到既甜品種類真係超級多 menu有成五六張仲要張張都密麻麻 中西凍熱乜都有得揀我地叫左個抹茶冰川同太空漫遊(個名好搞笑)個抹茶冰川黎既時候已經覺得有啲貨不對版同menu啲個相比細左勁多 咁都算啦但作為抹茶控 個甜品既抹茶味真係完全缺乏抹茶綿花冰同啲抹茶凍食落都無抹茶味 失望成個甜品可取既我諗只有啲小丸子同紅豆煙韌既小丸子同甜甜既紅豆永遠都係最佳配搭反而個賣相有啲奇怪既太空漫遊就俾到我驚喜Cookies & Cream雪糕一向都係我既最愛托住雪糕既朱古力布甸有好濃既朱古力味佢又用牛奶沉住啲珍珠同可可脆波波感覺好似食緊可可脆早餐咁 但又有煙韌既珍珠幾種口感加埋好特別 整體好鐘意個太空漫遊之後我地未夠喉追加左個椰皇芋圓番薯圓湯丸個名好似好正 點知又係另一個令人失望既甜品椰皇既椰子味唔夠 芋圓同番薯圓無煙韌既口感啲芝麻湯丸咬落一舊粉咁 又無乜芝麻味仲要因為啲餡爆左出黎搞到有啲黑色係到飄飄下唯有安慰自己呢個唔係佢地招牌所以唔出色啦