掌門雞 (已結業)

朋友介紹來到荃灣掌門雞食晚飯，店面裝潢吸引，掌門雞三個字亦都好有氣勢！進店後餐桌闊落舒適，餐牌色彩繽紛相當吸引，選用手機落單十分方便；我當然點了我至愛嘅無骨海南雞加個油飯，再加上軟殼蟹沙律和青咖哩炸魚塊，飲品方便特別抵，有買一送一嘅corona啤酒！我當然唔會錯過啦！而朋友點嘅椰青亦都好清甜，連椰肉都可以挖出嚟食！超正！無骨海南雞除咗雞翼之外真係完全冇骨，咬落香滑，一啲都唔嚡！用嚟送油飯絕對係一絕！軟殼蟹有兩大隻，炸得乾爽脆口，冇油淋淋嘅感覺；連沙律一齊食清新得嚟又有濃濃嘅香脆和蟹味！青咖哩用咗唔同嘅蕃茄，青檸和矮瓜仔炮制，食落青甜，加上炸得脆脆嘅魚柳，索滿青咖哩味！食落有不同嘅層次感，鬆脆香軟多汁！最後我哋點咗個香芒黑糯米飯和掌門雪糕做甜品！香芒鮮甜，椰汁香濃，再加埋煙韌嘅黑糯米，簡直就係絕配！而掌門雪糕嘅擺設實在靚到唔捨得食！紅豆糕表面脆脆入面淋滑再加上冰凍嘅朱古力雪糕同埋滑一滑嘅甜忌廉，令人有一種回味無窮嘅感覺！也正好為這個晚餐劃上一個完美嘅句號。