更多
2014-06-26
2697 瀏覽
之前玩東亞銀行遊戲得到嘅 $200 coupon 就嚟到期，雖然天文台預告咗會落雨，但都要去用，唔係過期就會變廢紙，希望到時唔會落雨啦！其實一早已經喺網度搵咗呢間餐廳嘅料，知道 $200 一個人都未必夠食，所以一定係獨食。OpenRice 度有 14 篇食評，其中 7 篇係「試食」。地方偏僻，諗住唔會太多人去，無諗住訂座，諗住到時就咁去，但喺 OpenRice 度見有食家提及預早訂位，覺得預早訂座都無壞，於是第一次用咗 OpenRice 嘅訂座功能，原來會有 50 分積分，不過食咗第日 login 入去唔見有積分！唔知幾時先會有？另外，OpenRice 嘅訂座功能仲有啲問題——間餐廳明明 6:00pm 先開，但可以 book 5:00pm！？我 book 咗星期三 7:15pm，希望呢個時間無咁多人，不過又怕太少人。天公似乎並不造美，中環五點半都仲幾好，無雨（五點半前有無雨則無留意），點知過咗陣就落起雨嚟，仲唔細！好在六點過後無幾耐就無雨。過咗九龍都無雨。7:15pm 前幾分鐘到咗中港薈，先去幫襯商場廁所（喺上一層度）。其實未到中港薈，離遠已經見到中港薈外觀好豪華，去到廁所亦覺得好唔錯
其實一早已經喺網度搵咗呢間餐廳嘅料，知道 $200 一個人都未必夠食，所以一定係獨食。OpenRice 度有 14 篇食評，其中 7 篇係「試食」。地方偏僻，諗住唔會太多人去，無諗住訂座，諗住到時就咁去，但喺 OpenRice 度見有食家提及預早訂位，覺得預早訂座都無壞，於是第一次用咗 OpenRice 嘅訂座功能，原來會有 50 分積分，不過食咗第日 login 入去唔見有積分！唔知幾時先會有？另外，OpenRice 嘅訂座功能仲有啲問題——間餐廳明明 6:00pm 先開，但可以 book 5:00pm！？我 book 咗星期三 7:15pm，希望呢個時間無咁多人，不過又怕太少人。
天公似乎並不造美，中環五點半都仲幾好，無雨（五點半前有無雨則無留意），點知過咗陣就落起雨嚟，仲唔細！好在六點過後無幾耐就無雨。過咗九龍都無雨。
7:15pm 前幾分鐘到咗中港薈，先去幫襯商場廁所（喺上一層度）。其實未到中港薈，離遠已經見到中港薈外觀好豪華，去到廁所亦覺得好唔錯——無門，水龍頭自動感應，唔會好快就唔出水，仲有服務員。原來中港薈係信和嘅。
幫襯完廁所，落返一層去 TAMASHII 魂日本爐端燒度，同門口嘅侍應話 book 咗位，佢帶咗我去一張雙人枱，俾塊平板電腦我，教我點用電子餐單。按 coupon 條款，點餐前我先俾張 coupon 同信用卡佢睇。之後佢行開等我慢慢點，我喺度掃掃掃篤篤篤，期間佢酙咗杯茶俾我。無午市定食揀，最後我點咗 8 樣嘢：
- 蒜芯 $15
- 白菌 $20
- 大蔥雞肉 $20
- 木薯糕 $15
- 鮮冬菇 $15
- 鹽燒三文魚茶漬飯 $55
- 雞軟骨 $15
- 青椒 $25
合共 $180。
等咗大約十五分鐘，第一樣嚟嘅係蒜芯（$15），碟上面一邊係數量較多嘅蒜芯，另一邊數量較少嘅我就唔知係咩嘢喇，都係植物嚟嘅，我用跟住碟嘢嚟嘅竹籤逐條篤嚟食，我並唔太嘴刁，覺得都唔錯。
食晒無幾耐就嚟咗白菌（$20）、大蔥雞肉（$20）、木薯糕（$15）同埋鮮冬菇（$15），一碟四串。我先食木薯糕（$15），無乜味，煙煙韌韌，一個月前食嘅冰粽，外皮都係木薯澱粉造嘅，加咗糖，甜甜哋，一樣煙煙韌韌，兩次唔同嘅係嗰次係甜食，今次係鹹食。
今次未等我食完就嚟多樣，今次嚟嘅係鹽燒三文魚茶漬飯（$55），個碗幾大，但空間好多，啲嘢唔到隻碗一半咁高，隻碗下窄上闊喎！我懷疑係咪飯，問係咩嘢，無錯係鹽燒三文魚茶漬飯（$55）。食完木薯糕（$15），我就食呢個飯。有塊紫菜，飯係個三角形（五個面，上面同下面係三角形，旁邊三面係長方形）飯團嚟嘅，三文魚份量唔多，白芝麻唔少，有 wasabi，仲有液體，唔知係咪茶？網度見嘅鰻魚飯定食嘅鰻魚飯係普通白飯嚟，但呢個飯團並唔係白飯，有咩嘢我就唔清楚喇。三文魚唔係一塊塊，而係好似吞拿魚罐頭嘅吞拿魚咁。飯同三文魚嘅份量都好少，double 就差唔多！不過就算 double 都食唔飽㗎！同樣價錢嘅蒲燒鰻魚飯唔知又點呢？不過味道都唔錯，我唔嘴刁嘛！
食完飯，食白菌（$20），有兩粒半，食落同草菇差唔多啦！
大蔥雞肉（$20）有 3 件雞、2 件大蔥——雞、大蔥、雞、大蔥、雞，無乜特別，唔錯嘅！
鮮冬菇（$15）有 3 隻冬菇，同樣無乜特別，唔錯嘅！
食完好耐都無嘢再嚟，期間侍應幫我補充咗幾次茶。侍應見我坐咗好耐，問我係咪仲有嘢未嚟，我話係，佢話幫我催下，過咗陣又話幫我催咗喇，等下有㗎喇。平板電腦可以查閱我點咗咩嘢，但美中不足係無顯示價錢，要我自己計，另外，亦唔會顯示邊啲嚟咗，邊啲未嚟。
卒之大約八點九嚟埋最後兩樣——雞軟骨（$15）同埋青椒（$25），一碟兩串。先食雞軟骨（$15），唔覺好特別，諗住會有骨膠原先叫，但其實我唔知會唔會有，如果無就不如食返雞肉好喇。
最後食青椒（$25），諗住係燈籠椒，點知唔係，未見過，形狀似紅辣椒（中間嗰段），不過係青色（唔係綠色）同埋唔辣。啲椒索得啲醬油太多，唔係咁健康。
食完晒，飲埋杯茶，示意侍應埋單。侍應攞咗張單嚟話 $180，加一，用 $200 coupon，即係唔駛俾錢，但都要俾張卡佢碌，碌完返嚟都要我喺張簽賬額為 0 嘅單上面簽名，不過佢無俾返張副本我，亦無對簽名，我都無喺張卡背面簽名（張卡背面仲未簽名，係空白嘅，我平時都無用張卡）。走時仲多謝前多謝後。
過咗半個鐘到，個肚覺得餓，再過多半個鐘則又唔覺餓。
本來驚住會無人，點知去到時已經超過一半枱有人，坐下坐下仲坐滿晒，中間仲有埋咗單走咗，另一啲人嚟。當中有一男一女應該係情侶嘅，有應該係母女嘅，有幾個男人、幾個有男有女嘅，有 7 個其中 3 個係小童嘅，西人（應該係一對夫婦同佢哋嘅小孩）亦有，單獨一人嘅則只有我。商場就真係無人。
張貼