喜喜燒臘茶餐廳 (已結業)

旅行完落機搵飯食！因為已經好夜，加上好攰！所以叫司機去灣仔買燒味外賣（因為快）再返屋企！去到門口排隊買票！因為我要寫食評，收銀阿姐落好單放櫃位，我順手攞起睇幾錢（方便我之後寫）點知我一攞張單，阿姐以成間舖都聽到嘅聲量喝止我：「你做乜攞呢張，你攞走就無嘢食呀！你唔係攞呢張架⋯⋯」我即刻話：「睇下啫！」佢依舊好激動！好像我偷單咁 （其實張單都係我order! 個客唔知情咪解釋下，唔使咁激動嘅！我都係第一次幫襯啫！唔好嚇親我呀！ 不過佢激完，可能都覺得自己激動咗！之後又笑笑下無事！我三個人叫三個單拼（燒肉、油雞、叉燒）分享（咁叫最抵食 ）食品好快包好！連例湯！即刻片車返歸！打開份量好大，後悔無叫少飯，燒味都好多！先講叉燒：燶邊，厚肉，比較乾！油雞：雞胸背部份，唔夠厚肉，比較嚡，用薑蔥茸好味點！燒肉：好肥，肥多過瘦，所以好淋，似啫喱，皮唔脆係硬！伴碟菜心新鮮爽口，唔錯，飯比較乾，淋了豉油汁好少少！份量大值得讚！個例湯都值得讚，唔味精，金黃色，煲得好濃，而且外賣之仲夠熱！地方普通茶餐廳格局！我只在門口企一陣，但門口都油淋淋！唔算乾淨！