北河燒臘飯店 (已結業)

一年先到一兩次既自己，講唔上係熟客，但對敝店既善行早已知悉，呢度唔多講。間野好地踎，一係唔好入黎，入得黎就唔好投訴，我呢d為左食野通山跑既人，當然冇問題。涼瓜排骨飯唔算好大碟，但正常食量一定夠飽，涼瓜切細條入口夠甘我鍾意，排骨調味正常亦冇鬆肉粉攻擊過既痕跡，芡汁唔會杰過龍可以gel頭，而食平飯自己最驚既糊仔飯都冇出現，米粒分明。奶茶冇期望所以冇失望，至少唔係難飲個隻。後加既燒賣只賣十三大洋，粒粒飽滿，如果你食慣左街邊既十蚊幾粒既橡膠燒賣，強烈建議俾多三雞試下呢度，見識下真正燒賣既威力。不過抵還抵，個人口味覺得調味甜左d，咁我話晒都係客，彈兩句都得卦。一個涼瓜排骨飯加飲品先三十大元，叫埋燒賣都係四十有三，味道重係冇問題，抵到難以相信。俾人加租加到打算收皮，好心人合理租金幫忙，一刻個腦諗到絕處逢生四個字。冇舊業主既加租，唔會有今日既平租兼大左既新舖，天無絕人之路，好心有好報。新舖係正對面，四月頭先交舖，應該冇咁快有得食，有心人可留意下傳媒消息。