JK Kitchen (已結業)

約咗朋友去銅鑼灣時代睇戲，睇戲前唸住食少少野充飢，咁陣間可以食爆谷。買完飛行咗去前面登龍街，見到永光中心門口有好多餐廳水牌，最後簡咗間越南餐廳JK Kitchen。上到去，佢係一個好有住家feel的餐廳，顏色主要以白色同tiffany blue為主。每一道菜都係大約$78左右，服務態度同環境都幾好，同幾個朋友傾吓計係唔錯嘅。有一樣野抵讚係佢見我哋兩個人share食，都唔洗問就自動比左兩個碗我地。精選生熟牛肉湯河粉 ($78)熟牛係牛腩，牛腩味道會比較濃郁，肉質結實。生牛係薄牛肉片， 肉質比較淋身， 牛味冇咁重。我個人就比較中意食實口感的牛腩。芽菜，醬汁，辣椒同青檸子會分開上，但係洋蔥就會預先喺個牛河入邊，如果唔鍾意洋蔥嘅朋友，建議係落單嘅時候叫走洋蔥。串燒雞肉(三串) ($58)雞肉面加咗花生，雖然係烤，但唔會太熱氣太硬。香芋奶茶 ($34)因為我哋叫咗嘢食，所以飲品有半價$17。本身想試越南三色冰，但因為冇紅豆，所以轉香芋奶茶。奶茶係典型嘅台灣餐廳奶茶，下次要係試埋個越南三色冰。兩個人埋單大約百七蚊，銅鑼灣黎講都唔算貴。