聰嫂‧原素 (已搬遷) 新店位置

咁岩行開去北角附近，喺大街度一路行一路睇下有咩好食。以前其實就唔會特登去食素，但見到呢間素食餐廳，好似有d印象唔記得喺電視定報紙雜誌見過，又咁岩係Green Monday，咁就一於唔食肉健康下。餐廳唔算大，所以座位就比逼少少。Menu上面既選擇都唔少，睇左一輪，雖然見隔離枱個炒烏冬都唔錯，但就想試下魚香茄子飯。個飯上到黎，真係完全睇唔出係素既魚香茄子飯。當然魚香茄子本身就唔係多肉既送，但面頭都會有肉碎同咸魚粒。呢張相俾朋友睇，個個都問碟飯有咩特別要影，之後話係素食佢地都話睇唔出。個飯上到枱熱辣辣，聞落都好香。一食，發覺佢竟然都有唔係素既魚香茄子既果種咸香味，確實幾神奇。茄子整得好食，肉碎既口感都唔錯，成個汁唔止色水似，味道都幾似平時既魚香茄子。所以，整體黎講都幾好食。我覺得呢間餐廳其中一個好既地方係佢既價錢同平時喺茶記食既碟頭飯差唔多，甚至仲平d。素食既價錢不嬲同材料冇太大既關係，就算佢唔落魚唔落肉，普遍都比唔係素食仲要貴。但呢個飯只係要四十幾蚊，仲有埋野飲，真係幾抵食。