小南國 (已結業)

雖然嚟咗唔少次，但到今日先知原來小南國有二人餐 ($498)。佢個二人餐有咁多道菜，都算幾掋食，但如果最後加多個甜品就真係完美。套餐可以揀個雙拼小食，我哋要咗糖醋小排骨同葱油海蜇頭。乾燒明蝦球蝦球大大粒，又爽口彈牙。配埋個醬汁酸酸甜甜咁好開胃呀～走地雞燉湯加雲吞湯底好鮮甜，仲有兩粒雲吞，但就細碗咗小小。椒鹽小黃魚小黃魚就多骨嘅，但勝在魚肉夠鮮甜，用椒鹽嘅方法嚟煮更惹味。瑤柱扒時蔬呢個就無咩特别，食咗咁多肉食返啲菜都好嘅。菜心都叫鮮嫩翠綠。灌湯生煎包食咗咁多次都係無失水準，小南國嘅生煎真係全香港最好食。外表煎得香脆，內面鬆軟，餡肉鮮嫩，最重要係佢啲豐富嘅湯汁呀，一咬就爆晒岀，真係好鬼好食。