波記(大排檔) (已結業)

星期六上班，倍添唏噓。最近因為工作關係，多左機會返中環，波記，是其中一間十分懷念的，還記得當年的窮小子，仙都唔仙下，遇著中環消費指數高，中午十次有九次都係黎波記解決，不怕有點惡劣的環境，每次都食到成身油煙味返公司。上次特登黎食，竟然遇著整路／整煤氣；第二次黎，則剛好是劫後餘生，仲未開番檔。今天，算是第三次黎光顧這一間老相好鐵廬，終於再一次見到那一班相熟的阿姐。如果你見到波記的好評，以為波記達到大酒樓水準，我諗你想太多了，呢度炒碟飯都唔駛一分鐘，鑊氣飯是這裡的特色，而且價錢公道，當真是窮人福音。今天，再叫我的最愛，椒鹽豬扒飯，唔駛三分鐘，色香味俱全。最美味其實是那個汁，用辣椒蒜頭爆香而成，撈飯一流。豬扒切件，既薄且瘦，呢度用料唔會十分好，始終是一分錢一分貨，靠的，是鑊氣搭夠。我還記得，當年跟同事見到大廚單手不怕火熱單手拋鑊之絕技，驚為天人，更加幫佢起了個朵叫「麒麟臂」。今天，這個阿叔仲係度，中間那一位大廚已經換過了人。想想已經有十年了，很多謝你服務左中環一眾窮鬼十年有多，感恩。