MOS Burger

營業中

休息中

MOS Burger (葵興)餐廳分開兩邊可以坐，但因為時間較晚，人流不太多，所以也較易找到位。見到復刻期間限定的極上鰻魚堡，之前出時無試到，今次經過就試試！極上鰻魚堡 $33薯條，凍奶茶 $21+$3-極上鰻魚堡為飯堡+紫菜+厚鰻魚， 鰻魚確實很厚及大件， 有細軟骨是預料之中， 但想不到會有一條比較大的魚骨 鰻魚醬汁可以的話加多一點就好了。 山椒粉味道不明顯。MOS Burger (葵興)葵涌葵昌路72-76號Life@KCC 4樓405-407號舖

星期日周圍都多人，忽然想食mos burger，諗起葵興呢間應該比較少人，所以專登過左黎。果然呢間分店星期日無乜人，唔使等位。叫左個吉列蝦漢堡（配芥末蛋黃醬）+ 薯條+ 可樂，$56，蝦堡好香口，唔會好油，啲蝦肉好爽口，個芥末味幾重，好夾，好好食，粗薯條如果有多少少鹽，仲惹味！

試過用外賣平台叫Mos Burger，仲有優惠就試下，真係好滿意！同平時一樣，外賣返到屋企之後，脆蝦堡都仲係咁脆口，每一口都散發出誘人嘅香氣。蝦肉入面仲保持住咁Juicy，真係好好食！另外，珍珠堡嘅飯都係咁香濃好味，而且飯粒都好彈牙，咬落去真係好過癮。然後我揀咗粗薯條同埋雞塊。雖然外賣咗嘅薯條有啲冧左，但係粗身薯條係我最愛。佢哋炸得香脆，每一條都好有口感，真係好好味。雞塊亦都好正，肉質嫩滑，外層炸得金黃酥脆，真係一啖接一啖都停唔到口。

雙重芝味澳洲和牛漢堡$44+$21set牛肉味出，但佢嘅口感冇黃牛嗰種入口即溶嘅感覺，同普通牛肉嘅分別唔係好大，同時間覺得個包唔係話好熱，（但係我就喺度等咗大概差唔多15至20分鐘先有得食），成個包同普通嘅漢堡差唔多，出啲乜嘢特別嘅地方。我加咗$21有薯條同埋ginger ale，薯條又凍又淋，ginger ale好似加咗水咁淡，上一次食都無咁令人失望，上次嘅蝦堡同薯條係脆嘅，但係今次食三樣嘢，三樣嘢都唔好食。

去到邊都有得食MOS😝🍔～我嗌雞漢堡，男朋友嗌蝦漢堡。就最最鍾意漢堡包內啲生菜總係巨量🙈🙈而雞唔肯定佢係咪完全係真雞，不過我覺得就係好香好juicy，都脆脆地。

MOS Burger ,行開葵興見到就入去醫肚，之前多數食飽、食薯條，今次試MOS CHICKEN 今次點了以下食物12）Cheese Burger (Double)7）照燒雞肉漢堡配薯條、汽水，再叫埋MOS Chicken 😆我唔多食牛，咬了一啖感覺唔騷，覺得好食，而且肉汁都多，好鬆軟，正🤤照燒雞肉漢堡，多汁，中規中矩啦薯條比平時的M記粗好多，間值無得比👍🏻以為MOS Chicken係鞋的，點知食落好滑，食完覺得自己好胃食🤪

這間高質日式漢堡包店，經常都有新款推出，不過我始終鍾情於普通的和牛漢堡。 牛肉雖然很薄片，但肉汁豐富，配上芝士、生菜、蕃茄，唔會感覺太油膩；值得一提就係厚切薯條，真係好食到唔停得口😂

近排係食葵涌mosburger 高峰期 因為連續兩晚 放工後都過嚟呢邊上堂而每次我都好專一咁揀同一個包 不過美中不足嘅係 如果叫多醬通常都無多到🤣 我買多咗個南瓜餅同薯條（不過無影低xd) 加埋可樂簡直係perfect match 加上 呢個地段放工後大家都返屋企 所以都唔會太多人 出餐一般都幾快 快捷醫肚嘅選擇

高質摩斯漢堡早餐位於K CC的這間分店環境很好對着落地大玻璃 人也較少 可以吃得清靜平常也只會光顧摩斯漢堡的午餐和晚餐 原來早餐也很高質 這次買了脆雞漢堡早餐配熱咖啡 有着摩斯漢堡一貫的質素 脆雞漢堡柔嫩香脆蔬菜新鮮

每次午餐時間嚟到葵興嘅MOS Burger，落單時必定係排咗人龍，而餐廳外面都有人等緊攞餐。證明其實都深受打工仔嘅歡迎。今次食黑醋雞漢堡包。落咗單之後，等大約5分鐘左右就有得拎，效率都算高。而家MOS Burger同Hello Kitty有期間限定合作，所有外賣袋都轉咗做Hello Kitty包裝，幾靚幾可愛令成個外賣嘅快樂感覺提升不少。黑醋雞漢堡入面嘅黑醋雞味道令人好開胃，同漢堡入邊嘅椰菜好夾，係一個好食嘅漢堡價錢只係$27 ，性價比好高！值得推介一試

食Mos burger ，點可以唔食飯堡？食咗咁多年，都仍然咁有水準！今次叫叫呢份牛肉飯堡，牛肉分量十足，飯都吸收咗牛肉汁，每一啖都有好香嘅牛肉味！值得比個like你！

星期日嘅葵涌，靜上加靜。商場好多食肆都無開，好彩行行下見到依間MOS Burger，簡直係沙漠入面見到綠洲一樣😍$31 和牛漢堡😋維持一貫水準特別一提，依間d 生菜超新鮮😊+ $26 要左摩斯炸雞🍗+ $6 轉左凍綠茶牛奶🍵KCC 依間分店好好坐，地方大，乾淨又多位。而且近窗果面有好猛烈嘅陽光☀️照入黎，令到成個環境都好舒服，感覺良好👍🏻職員嘅態度都好友善，有禮貌簡簡單單又一個lunch😆下次出開黎再幫襯💪🏻

彷彿已經半年幾冇食過香港既摩斯漢堡店，今日好想好想食魚柳包，唯有踏出食返佢既一步！去到KCC既時候已經係中午放飯既時間，好多係附近返工既人已經買緊外賣~疫情關係，堂食反而唔算好多人！今日叫餐唔使諗~因為一早諗好係叫魚柳包=3=然後+雞塊、凍檸茶先講魚柳包！魚柳熱辣辣，新鮮炸起！好味~而包就感覺上硬左少少，可能係隔左一夜既~雞塊食落唔同左，冇以前咁好食！(甜辣醬冇味既？)檸檬茶都係檸檬茶，正正常常~整體上MOS既食物依然係有水準，還是要繼續支持的！

要同啲戰友一齊上去做project 所以去咗附近嘅Mos burger 買外賣上去開餐邊做邊食因為已經喺隔離買咗水果茶所以喺度就咁買咗個包就算啦Mos burger來講我最鍾意食都係佢個黑醋雞肉漢堡其實我每次黎都係嗌呢個佢嗰黑醋汁真係好好味㗎配埋啲生菜絲同埋個雞肉👍🏻👍🏻👍🏻不過佢加餐就有啲貴其實佢呢度嘅沙律同埋薯條都真係唔錯不過我哋已經買咗好大堆零食上去做Project所以買一個包就算啦🙈

平日11點30到去左葵興食晏，kcc開左mos burger，見好耐無食過就去食下。印象中mos burger既漢堡包唔算貴，但比其他美式漢堡包連鎖店好食，所以都幾鍾意。兩個人叫左2個set A: 一個魚柳漢堡包同一個炸蝦漢堡包，set 就加20蚊有汽水同薯條。炸蝦漢堡包好多椰菜，而蝦餅裡面有1隻隻蝦，爽口彈牙，叫左他他醬，仲有wasabi 醬簡。薯條厚切超級正，新鮮熱辣炸好。佢地仲會提供膠兜，比人唧茄汁落去點，好貼心既安排。兩個人大概食左100蚊，食物水準依然保持到，性價比高。