影片
以上資料只供參考, 請與餐廳確認詳情
面包舖喺屋企附近，所以經常會買嚟做早餐。舖頭開咗好多年，開喺馬路邊，閒日朝早返工返學嘅人經過都會聞到面包香。舖頭細細，但包喺款式都唔少。我一開始唔係幾敢買，因為包冇清楚標價錢，亦都冇位入舖頭睇清楚啲包有咩款。我通常會買芝麻包或者硬豬(硬豬要拎返屋企烘先好食，即場食通常都會因為吸咗水氣而變韌。今次就係買咗硬豬~未烘之前係咁樣嘅...個包只係賣$2.5，真係窮人恩物。有時補習冇時間食飯就會買定2個包醫肚。烘咗之後外層脆卜卜，入面嘅包仲好軟熟~呢間舖頭嘅油炸鬼都好正，但記得等佢新鮮炸好先買~(附近有幾間粥店都係喺佢度入貨)作為呢間舖嘅長期客仔，提吓各位~呢間舖雖然有啲特色包(e.g.扁身嗰啲有餡包)，但始終老店係傳統港式包最拿手，貴少少嘅有餡款反而冇咁好食。甜點嗰啲都係一般般啦~拿破輪雖然唔係好足料，但味道就唔錯。不過全部嘢都唔貴，一試無妨~~~
繼續閱讀
對於香港舊式包餅店，總係有種情意結，每次經過都一定要去行一行，好中意發掘一啲高質既懷舊小食或者飽點，而且大部份都係好平價既良心餅店，所以好值得我地去支持架今次經過呢間舊式餅店，係箕基灣地鐵站側面，唔洗一分鐘就去到，好快架乍店內可以話無裝修可言，面包就一盤盤咁放哂係門口，想要邊樣就邊樣，大部份都係包，當日去到就無咩舊式糕點，可能加上落雨關係佢好多野都收埋左，見到仲有兩個我最愛既砵仔糕，當然試下佢啦！見到呢個砵仔糕比起市面既較淺色，代表佢無落人造色素夠哂健康size 唔係最大算中等，紅豆量同樣唔係太多，咬落口感屬於爽身加少少彈牙，唔係好煙韌果款，唔算係最中意既口感，但欣賞佢既黃糖量唔太多，食落係感覺到淡淡既黃糖香味而無一種食好甜既感覺，至於紅豆都煮得淋身但豆味唔太出，應該因為煮得較耐無量唔太多，總括黎講係唔錯既同時買左個老板娘話好好味既十字包，聽落好得意，但原來係普通一個包，表面有幾粒提子乾，可惜個包淡而無味，唯獨係靠軟熟拉返啲分，比我揀我食返提子麥包算，起碼有啲麥味雖
繼續閱讀
今天經過筲箕灣，一定要去幫襯呢間買硬豬仔包！已經幫襯左年幾，都仲係買梗$2一個，抵到爛！我第一次食，係朋友請的，好食到要追問朋友邊度買，朋友仲唔好意思講話係街市小店。個硬豬仔包，係外脆內軟，裡面唔似坊間嘅空框框，佢係綿密嗰種，充滿麵粉香味，熱食凍食都一様好味！因為我唔係住附近，所以次次都買十個八個慢慢食，放雪櫃，之後焗熱返，過幾日一樣咁好食！見佢舖頭又有賣中式糕點，如油炸鬼，煎堆，中式蛋糕，下次要買黎試下。次次經過都有好多街坊幫襯，咁平靚正係值得多人幫襯，試問百物騰貴，仲係賣$2一個，去邊搵！大家記得支持一下呢類小店，真係買少見少！
繼續閱讀
呢間家庭式麵包舖一直都幾受我同屋企人o既支持，尤其係佢o既硬豬仔包，好多地方都無得賣o架啦，我就好少去筲箕灣，不過家人去買餸有時都會買返o黎做早餐。今日我無意間經過，見倒有好多硬豬，同老闆娘對答如下：我： 硬豬點賣？老闆娘： 三蚊個我： （停左無出聲，諗緊買幾多個）老闆娘： （可能以為我唔想買）一係我收你 2.5一個我： 好，咁我買八個老闆娘： 你真係爽快！（一邊夾麵包一邊講）好多都會還價，我就覺得大家明碼實價，買就買唔買就唔好買。見你咁好，好啦，我就送多你一個，20蚊9 個俾你。返到屋企，我見到阿媽，就問幾多錢一個，佢話上星期買係 2 蚊一個，10 蚊有5 個。作為一間做街坊生意的小店，仲要係賣兩蚊個的麵包，佢可以呃得幾多錢？但竟然係呃得一蚊得一蚊，呢度只係民區，唔係深圳唔係廟街花園街，竟然遇上咁無良不誠實的經營手法！一間食店要經營有道，除咗賣o既o野要靚，價錢要合理，商譽的重要性唔會比前兩者少，而家佢頭兩樣都做到，但就算「零商譽」，足以令我從此 blacklist 佢！我以後唔會再幫襯佢。
繼續閱讀