根記粥麵店

營業中

休息中

每次入到長洲，有機樣野一定會去食，包括呢個粥店既腸粉。呢間粥店應該好多人都會有經過，碼頭轉右直行，會見到好多間類似大排檔既食店，我本身係比滷味街檔吸引咗先，諗住費事企係條街食，就坐咗係佢背後既舖，亦即係粥舖。當等緊滷味既時候，硬係會望下個餐牌，粥又唔太感興趣，但見到有腸粉，就貪得意嗌咗個蠔仔腸粉，靚仔既後生老闆仲問我地加唔加蛋，咁當然加喇。我份人比較好school d, 唔鐘意食嗰d咩玻璃腸，我喜歡舊式厚皮既腸粉，而呢度就係呢款。夾起已經見到一粒粒飽滿既蠔仔，一啖食落去覺得滑，加咗蛋的確好食好多！呢間粥店有得叫啤酒，啱哂同行既男友，滷味、腸粉配啤酒，感覺好麻甩，但下午想休息一下，除咗咖啡店，呢到係另類既休閑點😜

都有一段時間冇去過長洲啦，呢一日風和日麗，決定同屋企人去長洲行吓，順便搵下食，行咗冇耐就覺得有啲攰，於是搵左間餐廳坐底，亦即係根記粥麵店。喺網上見到佢都係長洲一間幾出名嘅小店，價錢方面唔算好貴，我哋試咗佢既生滾豬肉片粥，粥底做得好綿，因為我本身中意食綿既粥，所以我覺得唔錯。環境方面，餐廳冇冷氣，只有風扇，而咁岩呢日都幾熱下，不過老闆知道我地覺得熱，就好好咁將個風扇對住我哋，所以呢度唔單止有好味，仲幾有人情味添。

一間不起眼嘅 粉面鋪頭 內裏臥虎藏龍佢地嘅蠔仔腸粉真的高度推介超級好食 蠔仔好新鮮 粒粒肥仔飽滿🤗😍😋超級鮮甜 食到海洋嘅味道😋🌊今次老闆建議我們加蛋🤤口感更豐富

入到長洲。好多店都係當地人小店。食到嘅味道完全唔會係平時市中心嘅味道。所以次次去都好鍾意試下唔同嘅小店。有時店主仲好鍾意同你吹多兩句水。喺粥店前面有架車仔有個阿姐賣滷水食品。一盆盆唔同嘅滷水放哂出黎俾人揀。見到好多島上人斬料番屋企加餸。揀好阿姐就會切好問你拎走定係堂食。堂食就係粥店入面食。天氣太熱冇乜人。揀左生腸大腸頭雞亦尖火雞腎。完全係屋企嘅味道。滷得入味但冇乜香料香味。老實講味道同衛生真係一般。價錢亦都唔係平。不過小店係應該支持嘅。

身為生滾粥迷，食過唔少香港嘅粥檔。本人認為好過佢嘅粥品大有人在。可能係長洲僅有嘅粥麵專家店唔多，無競爭。其實呢間店嘅出品，不論係腸粉、炒麵、油器、或生滾粥，都認真麻麻。而且價錢又唔係平。所以性價比唔係高咯～首先論粥底，雖然都算綿，佢落咗白果同少量腐竹去煮，食到淡淡腐竹香。呢方面係值得一讚嘅。可惜佢味精較重，相比另外兩間粥品店嘅粥底顯然重味好多。無辦法，香港人慣咗長期出街食，習慣咗味精，一唔放味精就覺得d嘢食無味道。。。另一不足之處係有時會失手：間中買魚腩粥，d粥底會越食越稀，出水。其他嘢食例如即叫即做嘅腸粉都⋯⋯無驚喜粉層頗厚，口感又淋，又無米香⋯⋯單單雞蛋葱花腸已經賣成25蚊碟，覺得唔值。

食完一餐雖然平但係難食既海鮮酒家，又唔飽所以要食個腸粉填補肚皮。好耐之前食過呢度已經覺得很好味道！今次依然食蠔仔腸粉腸粉好對我胃口，我鍾意有Ｄ質感既皮多過好薄既，而且蠔仔都好鮮甜，總共都有十隻到小蠔仔。本地泥鰍粥 $36聽姐姐落單個時講，推薦話係長洲本地既泥鳗黎既，唔錯，唔會好濃味精，清清甜甜。魚仔都有唔少，有大約5-6條。豬耳、鴨腎鴨腎好軟身，味道都一樣唔會鹹平日黎唔算多人，店員阿姨都好好人好態度

入長洲目標係掃街，基於長期餓底，碗麵打完底再掃街仲有空虛感，預咗喪食嘅心情係唔同啲，食極都唔飽。肥?!食完再打算😎為咗填補空虛感，行到攰攰地，唔想再立食，坐底 食粥食腸粉加碟鹵水。無冷氣但有大大把風扇，揀啱張枱都係好涼爽。好耐無食即時生滾粥，粥綿材料正，鮑絲甜。即拉腸粉， 自選材料。睇住出煙熱辣辣，好味好滑。另一半唔食鹵水唔食內臟， 呢度可以靈活地叫自己想食嘅嘢， 樣樣執少少都得，整返熱就食得。唔怕無人陪食會浪費食物。一個人食曬，極滿足。

今日一家三口入長洲. 本來第一站係去通記食沙爹嘅, 但去到竟然無開門喎. (今日係星期三, 點解無開門架?)咁就行返出嚟去咗根記食粥.叫咗一碗及第粥 $35.00--一試粥底, 好香腐竹白果味, 坊間多數都開粉漿, 好少食到呢款粥底, 簡直係誠意之作。粥料亦豐足, 有豬潤 粉腸 豬肚 肉片 肉丸 好味!一碗鮑片蠔仔粥 $41.00-- 雖然所謂鮑片只是鮑魚絲, 但蠔仔份量搭夠, 粥底充滿蠔仔鮮甜味, 正!本來想叫炸兩架, 點知售罄喎, 咁算啦! 打算食完粥去掃街嘅.食食下見有滷水食物新鮮端出, 即刻買啲試下, 買了兩個腎+一條大腸 $40.00 夠滷得林又入味. 掂!

是日在陣陣冷颼颼北風下於長洲隨意閒逛至下午約2時，想要吃點熱騰騰的食物，經過此處看見有生滾粥而且在寒風中依然坐滿客人，便決定一試。想叫皮蛋鹹瘦肉粥和炸兩腸粉竟然都已沽清，最後我試了皮蛋肉片粥和牛肉腸。不同價錢的粥用不同的碗區分，我那碗雙拼粥好像比同行其他人的粥大碗一點點，可能因為貴啲？！粥一入口超驚喜，很鮮甜，雖然不知道用了什麼材料煲粥底，只肯定有白果因為粥裏面有幾粒拍扁的白果，但感覺上有海鮮的鮮甜味。值得一提是肉片真的名符其實又爽又滑超正，應該是選用的豬肉部位得宜。另外腸粉是即叫即蒸，很滑，牛肉份量很多，甚至感覺牛肉滿溢比腸粉還多。

吃完海鮮，原本想來吃碗粥@黎根記, 點之食完海鮮2點完來已收舖，故去了試下隔離舖-根記。我們叫了一碗大艇仔粥和蝦米腸粉。粥底鮮甜多料好味！而腸粉更加唔使講，幼滑好味，腸粉醬汁夠矖惹味，D蝦乾又夠大隻！好食！埋單$49

每年夏天都要黎長洲玩，其中一個我必食的舖頭就係根記，上年我黎度兩日一夜，四餐入面有兩餐係食根記。我係好鍾意根記的蠔仔粥同粥仔腸粉。好好食，鮮味十足！蠔仔腸夠曬特別，唔係到到有得食。蠔仔粥佢用一寸長的大蠔仔煮成，成隻膠匙羹咁大，一碗有成十幾隻大蠔仔，勁足料，無得彈！我都食咗根記差唔多五六年啦，年年黎食水準都保持到，係香港地都真係唔容易。眼見老闆同姐姐們都無換過人，班底依舊。希望佢地個個身體健康，年年都可以煮好嘢俾我食。

次次去長洲，就算天熱，都會嚟根記食碗粥。今次叫咗泥鯭粥，好好味。粥底用白果腐竹煲，正。啲泥鯭處理得好好，小心剪開魚肚，而家冇幾多家肯落心機，意外驚喜啲係竟然留有魚肝，好好味架!!!當然唔好錯過啲滑滑腸粉，叫咗牛肉腸，竟然有淡淡陳皮味，好好食呀!

粥同腸粉 ，幾好食 ，足料上菜快。服務方面其他中一位服務員服務態度友善，之後有另外一個女人衝埋黎大鬧我地都唔明佢鬧乜🤔🤔原來話我地食鹵味。 係OpenRice呢度有post 過鹵味又明明望住佢地用同一個廚房 ，果檔野又係佢店入面到賣。買既時候 我仲問左切鹵味果個可唔可以係入面食。果個男人又話得。點知知女人一黎就鬧我地唔識字,我話我地唔知鬧左兩三分鐘 我地先知講緊個鹵味 我地之後望返， 枱枱都食緊 淨係走埋黎鬧我地 無啦啦受左一肚氣，放假食少少野都比人鬧

難得聖誕有假，同埋女朋友入長洲玩呢間嘢openrice好多正評，又好多人等，女朋友當然好想試下啦。見呢間嘢好多人食，唔得閒理我地，咁唯有自己搵位，好辛苦先坐到。叫左個艇仔粥～唔夠綿😭好像冇米甘，勁稀，係米加價得快定係碗粥既特色，我真係分唔清。仲叫左個蔥花雞蛋腸粉，但等左勁耐勁耐！！足足等了45分鐘!!催了一次又一次，次次都話漏單，轉頭見佢拎住個腸粉俾其他客！如果係熟客優先或者冇心做，咁不如貼個牌出來寫休市一天啦。最後仲要道歉都冇句，好似係我地問題咁，d 服務態度唔得！嘢食唔好，不停漏單之餘，態度又串又冇禮貌！去到會受氣！ Blacklist ！

呢間粥店，係上次入camp食過宵夜既地方，好懷念佢既即拉腸粉，今次入嚟長洲，第一時間就去左。入到長洲都3點，估唔到粥店咁多人，好彩都搭到檯。佢地既價錢都唔平，初時兩老都覺好唔抵，但嚟到就改觀叫左粉腸豬膶粥，份量唔大，但粥底一流，傳統既味道，好蓉既粥底，而且好多薑絲，兩位老人家大讚出面好少食到呢個粥底。粉腸豬膶都多，因1碗粥3人分都食到好幾件料（要留肚掃街），大家都好想叫多碗，可是唔想一餐清左蠔仔腸，建議加蛋香d, 蠔仔好新鮮，而且即拉腸粉，熱辣辣，好鮮味唔腥，蠔仔好肥美豬膶腸，都加蛋，豬膶好嫩，熟得剛好，切粒有厚度，有咬口，加上滑腸粉，不錯，但比較起都係喜愛蠔仔腸，出面少有，而且真係好新鮮。呢間係去長洲會再必嚟既食店，下次又想試蠔仔粥，又想上泥鯭粥，P要叫多d人嚟食先得!