主打西日fusion嘅The Joomak，即將推出$248任食韓式火鍋，無論係計火鍋湯底、配料質素，甚至餐廳地段，呢個價錢都係性價比高，究竟有乜食？快睇！

火鍋湯底有兩款選擇：素·仙人掌卡邦尼湯、人蔘雞湯。唔好以為鮮艷粉紅色就會中伏，其實係因為仙人掌花果做成，再配以九龍城公和荳品廠嘅豆漿、素芝士、黑松茸、豆腐、菇菌及芫茜。味道清新之餘，仲可以清熱解毒架！

至於人蔘春雞湯底亦相當強勁，大廚採用西班牙無激素走地雞，並且釀入糯米，用4-5個鐘頭燉煮，再加埋原條韓國人蔘、紅棗、杞子、淮山等藥材，飲落好滋補，不太油膩，雞肉仲好嫩滑添！

值得加分嘅係，追加湯底時，餐廳不會普通加水或清湯，而係會追加雞湯、豆漿，味道肯定唔會變淡。

肉類有來自美國嘅肥牛、黑豚豬腩片。肥牛大塊而薄身，淥幾秒就食得，軟腍得嚟又有嚼頭，可惜肉味一般；開飯仔比較鍾意豬腩片多啲，口感較為爽脆，仲食到少許豬皮，層次好豐富。

肉類以外，蔬菜款式比起一般火鍋店吸引。呢份素·拼盤，入面有：雪耳、冰菜、羽衣甘藍、粟米、紫薯、南瓜、豆結、素山葵芝士丸、黃金粟米餃子、百頁豆腐及韓國四彩手拉素麵。

一定要試羽衣甘藍，被視為superfood嘅羽衣甘藍，營養有幾好，相信都唔使開飯仔介紹，用嚟打邊爐一流，非常吸湯，但嗡感依然keep住清爽。

蝦滑、墨魚滑、鯪魚滑口感彈牙，原本就已經深得本地火鍋友嘅歡迎，呢個釀咗泡菜嘅自家製泡菜三滑拼盤，微微酸辣感好開胃。

話明韓式火鍋，當然唔少得韓風小食，有芝士豆腐、黃金粟米餃子、皇牌韓式魚糕以及韓國年糕，哈韓火鍋友可以一試。

另外，每位客人可揀選以下食物：紫菜粥、韓國四彩手拉素麵、素芝士紫菜飯，喺火鍋後品嚐，開飯仔推介手拉素麵，用艾草、南瓜、瑪黛茶及紅梅自然調成嘅4色素麵顏色奪目，而且麵條幼身滑溜，味道不俗。

美中不足嘅係，火鍋不包飲品。如果口渴可加$38任飲咖啡、汽水、果汁、茶及朱古力；酒鬼們就不妨加$88，任飲啤酒、紅白汽酒、燒酒、cocktail等等。

最後，留意番呢個韓式火鍋由1月15日起先供應，而且約定friend、book定枱先啦！

90分鐘韓式火鍋
供應日期：1月15日起逢星期一，直至另行通知
供應時間：全日供應
價錢：$248/位，另設加一

Joomak
地址：尖沙咀廣東道3-27號海港城海運大廈3樓LCX 34號舖

文：Joy