第15屆《香港澳門米芝蓮指南2023》剛剛公布完整名單，今年無論係星級餐廳定必比登推介都有新上榜，即刻同大家逐間介紹下先！
| 香港 | 澳門 | |
|---|---|---|
| 三星 | 7間（1間晉升） | 3間 |
| 二星 | 13間（2間新入選、1間晉升） | 5間 |
| 一星 | 58間（6間新入選、3間晉升） | 9間（1間新入選、1間晉升） |
| 必比登推介 | 65間（6間新入選） | 7間 |
| 綠星 | 3間（1間新入選） | 1間 |
新晉升三星餐廳推介
高質創新法國菜 Ta Vie
圖：由米芝蓮二星晉身三星行列，實力不容忽視！呢間創新法國菜餐廳嘅名具有雙重意義，法文解作「你的人生」，而日文則有「旅程」嘅意思。喺追尋美食嘅路上，日籍總廚佐藤秀明以「純粹、簡約、時令」理念、日本高質食材，為大家炮製「炭燒赤鯥配米餅及青海苔醬」等創新料理。
新晉升二星餐廳推介
米芝蓮創意中式分子料理 廚魔
圖：受潮人歡迎嘅創意中式分子料理餐廳，由有鬼才之稱嘅廚師Alvin主理，舊舖曾獲得多次摘星紀錄，而上年搬舖後，今年就即刻成為新晉升二星餐廳，可見水準冇咩影響。佢設計嘅菜式創意無限，曾經以各地名畫，如「The Birth of Venus」、「吶喊」為菜式靈感，帶畀大家唔同嘅驚喜之作。
新晉升一星餐廳推介
時令傳統日本「旬」料理 NAGAMOTO
圖：Cykman
日籍主廚長本輝彥為餐廳創辦兼主理人，擁有近30年製作日本精品料理經驗。佢以現代烹調手法、四季時令食材，炮製充滿季節氣息嘅傳統日本「旬」料理，款款都別出心裁。餐廳從用餐環境、食材配搭、食器以至擺盤細節，都體現日本四季變化，以及其島國地理特色。而開放式廚房，更讓食客一邊用餐，一邊欣賞廚師們嘅廚藝功架。
酒店高質意式廚師發辦 NOI
座落香港四季酒店嘅意大利菜餐廳，上年10月開業，迅即登上米芝蓮一星推介，皆因請嚟意大利米芝蓮星級名廚Paulo Airaudo坐鎮！由Airaudo主導，聯同主廚Luigi Triano主理設計嘅意式廚師發辦，選用世界各地頂級時令食材。今次得摘星，兩人表示︰「店名喺意大利文解作『我們』，寓意團隊上下一心，帶領客人體驗美食旅途。」
精緻創新意大利菜 ESTRO
餐廳設計典雅，而店名喺意大利文解作「靈感」。主廚Antimo Maria Merone來自意大利拿坡里，係倡導改寫意大利美食規限嘅廚師之一；佢從家鄉取得靈感，再以現代烹調手法凸顯拿坡里菜式嘅精髓，更不定期推出限定餐單，帶畀大家新嘅意大利菜體驗。
其他新晉升一星餐廳包括疊囍居、蜀道、Godenya、Neighborhood、大班樓、廚魔名人坊同淮揚曉宴。
新入選必比登推介
魚肉創新小食+魚麵 魚事者(北角) 
圖: RheaChim
餐廳創辦人Hyvan由外國回流香港，因為喺留學期間掛住香港味道、特別係魚蛋粉，餐廳就以魚肉為主題，用九棍、紅衫、門鱔及剝皮大眼魚等海魚創作出一系列魚麵同創意小食。好似招牌扮墨西哥魚皮同炸魚無薯條就分別以魚皮同魚肉嚟模仿Nachous同薯條。
古法炮製西關瀨粉 西關老祖
圖: 佐敦一間外賣小食店，主打係西關瀨粉配黑毛豬油渣，瀨粉每日人手製作口感軟糯，加埋豬油渣、蔥花同辣菜脯真係無得輸。另一必食係炸·黑毛豬肉粽，炸糉係幾近失傳嘅傳統街頭小食，外脆內糯口感好過癮。爆炒·XO醬蘿蔔糕同老祖·至尊頹飯就好有港式風味。
正宗泰國依善菜 Restoran SAYA
圖: 餐廳提供
泰國稱東北部20個府為依善地區，所以大角咀呢間由泰國女廚Jan主理嘅依善菜即係泰國東北菜咁解，而依善地區鄰近老撾及緬甸，所以菜式亦受呢兩個國家影響。米芝蓮簡介就提及泰北咖喱金麵同泰式炭火鹽燒魚都好有水準，而大廚推介就係伊善炭火燒雞。
懷舊經典粵菜 船記 
圖: 灣仔呢間廣東菜館由經驗豐富嘅廚師主理，例如掌管燒味嘅師傅有超過40年經驗，呢度嘅名物和哥叉燒係半肥瘦厚切、肉質鬆化而且調味得宜，值得一試。其他中菜同點心都有水準，米芝蓮簡介中更特別提及韭黃鮮蝦腸相當爽滑又晶瑩剔透。
人氣重慶涼皮+涼麵 兩姊妹涼皮有限公司(太子)
圖: ChongWaiLee
主打重慶涼皮同涼麵嘅小店，招牌自家秘製辣椒油用上三款辣椒油，香氣同味道層次都與別不同。當然以木糬粉製作嘅涼皮亦好加分，滑溜Q彈，加上辣椒油、青瓜絲、芫荽、豌豆同花生粉相當惹味。如果唔食得辣嘅話，亦可以試試佢哋嘅黑糖五彩冰粉啊。
家常上海+四川菜 一家 
圖: Joycelyn.www
餐廳主打家常上海及四川菜，唔少菜式都係心思菜，例如黑醋松子魚、水煮魚片、外婆紅燒肉、極品秘製金華火腿等。裝修走復古風，有唔少古色古香嘅擺設又有霓虹燈，幾啱打卡。米芝蓮簡介更特別提及要試試高力芒果奶黃呢道甜品，有創意！
新入選綠星餐廳
中法特色餐廳 摩
圖：由總廚兼創辦人之一嘅劉韻棋（Vicky）聯合創始人Romain Herbreteau開設嘅中法特色餐廳，以巴黎精緻小酒館為概念，並採用淺杏、深木色作主調，環境優雅。餐廳更成為今年唯一一間新入選嘅綠星餐廳，皆因從以下3大方向努力實踐可持續發展理念：
- 菜式：以大豆製品為菜式主題，代替肉類蛋白質；盡可能選用本地（香港160公里範圍內）嘅食材，以增強社區的競爭力；葡萄酒、魚類等食材，以至非基因改做嘅大豆，幾乎所有食材都以可持續方式採購而嚟。
- 社區責任：透過探索大豆特色，承傳呢種於中國飲食文化具有三千多年歷史嘅食材，同時重視員工福利。
- 環境：以減少碳足跡同實施有效廢物管理為目標，全面以自家製作豆腐入饌，充分利用剩餘嘅豆製品，減少不必要浪費同剩食。另外放棄使用助長全球暖化嘅天然氣，改為全電動廚房，節省能源並減少碳排放。
文: Cathy.H，Cathy.C
