平時去開嘅精品咖啡店，通常都係細細嘅獨立小店，不過呢間新開嘅café就犀利喇，佔地兩層，而且位於電訊商旗艦店入面，供應多款手沖咖啡、意式咖啡，其中一層更有特別嘅咖啡體驗，即場炒豆即沖即飲，即刻睇睇有咩賣點先。
Hands-On Coffee位於中國移動旺角旗艦店四樓，一入到去就有舖天蓋地嘅咖啡填壓器做裝飾，都幾震撼吓！雖然座位唔多，但有落地玻璃對住街景，都幾開揚。
必試手沖咖啡，因為只選用80分以上優質咖啡豆，暫時供應三個產地，包括印尼蘇門塔臘、哥斯達黎加聖克魯斯以及埃塞俄比亞，亦可以選擇V60手沖、愛樂壓以及德國陶瓷壺。由資深咖啡師Michael親自沖泡，Michael為專業Q Grader，對選豆、烘焙各方面等都有深厚認識，更會邊沖邊同客人講解。
呢度更有全港首部FURIKO水滴咖啡機，係全新產品。以鐘擺原理，水一滴一滴滲入咖啡粉之中，可以短時間內做出冰滴咖啡效果。
食物方面都有好多款式，首選係泡沫甜蛋，質感似軟綿綿嘅奄列，泡沫濕潤入口好香滑。鹹食可配巴馬火腿同牛油果，甜食就配affogato，affogato會用迷你espresso機喺客人面前即沖。
泡沫甜蛋伴巴馬火腿 $95
泡沫甜蛋伴咖啡浸雪糕及鮮果 $88
其他食物都唔錯，卡邦尼意粉用溫泉蛋，上面放有蜂巢狀芝士脆片。全日早餐有素食版本可選，班尼迪蛋有傳統荷蘭汁配上大啡菇，口感味道更豐富。
卡邦尼意粉配溫泉蛋 $92
全日早餐 $115有煙肉、香腸、炒蛋、焗薯、焗豆、沙律菜及黑專麵包。
健康田園早餐 $105以蔬菜為主，有焗南瓜、烤大菇及牛油果等。
煙肉烤大菇班尼迪蛋 $98
更多新店直擊： |
五樓就係Genius Lab，一室磚牆掛上多個放滿咖啡豆同咖啡嘅錐形瓶，真係成個實驗室咁！呢度就做咖啡旅程體驗為主，由專業咖啡師Reeves由生豆、烘焙度及沖煮方法逐步講解介紹，並即場示範同試飲咖啡，大約需時30分鐘，每位$128。
當日我哋試到店子獨家引入嘅哥斯達黎加Cera咖啡豆，更用韓國智能炒豆機即場烘焙。Reeves選用虹吸壺為參加者沖製咖啡，飲落有熱帶果、提子嘅香甜，帶少少肉桂嘅香料味，順滑如蜜糖。
旗艦店除咗有電話及配件賣，亦有智能家居、VR Showroom等，行完可以上嚟食吓嘢嘆杯咖啡！
地址：旺角西洋菜南街1L-1M號中國移動旗艦店內3樓
文、相、片：Perrins