今日去食生蠔邊爐，對於一個實實在在嘅邊爐迷黎講，連續打咗三日邊爐，中式港式邊爐打到厭，黎嗰日式嘅，確實係「新鮮」兼「豪」食，好少地方會用新鮮生蠔俾客人邊爐，極力推介呢一個生蠔鍋，本身生蠔已經好新鮮，鮮味十足，服務員建議先烚菜，所以個日式湯底清香，幫生蠔提鮮，令到生蠔嘅鮮味更上一層樓。 生蠔大大隻，肉質嫩滑，每咬一啖都係好好嘅享受。3號嘅處理都好恰當，唔會話有蠔殼，仲預先起左隻蠔，好方便。 入邊嘅環境都好似日本嘅居酒屋咁，有啲懷念翻家鄉嘅日子。 我另外嗌咗牡蠣茶漬飯，金蠔甘香鮮味，連埋茶漬飯一齊食，相當得宜。 盛盒壽司每件刺身都好新鮮，厚薄適中，連飯都扼得啱啱好，唔會太鬆散，亦都唔會扼到死實實，性價比高。 當然唔少得嗌咗啲串燒，有兩隻味，包括係鹽味同汁燒，喺呢個位已經贏咗一半啦，好似我同我既朋友咁，可以跟返唔同嘅食材決定邊啲要鹽味邊啲汁燒，好似黑和牛同埋牡蠣豚肉，我哋選擇左鹽味，完全食到食材嘅原味，雞腎我哋就選擇左汁燒，味道啱啱好，唔會燒到好焦，啱啱好夠脆香。仲有我最鍾意嘅玉子燒，我推介明太子玉子燒，上碟熱辣辣，食落口好好軟熟，爆餡玉子燒，正。 最後，我估唔到串燒小丸子竟然會係熱辣辣，啱啱燒好就上碟，好煙靭軟熟，冇得頂。 總括而言我都幾滿意今次食物，餐廳地方環境唔錯，係坐得迫咗少少，不過冇計啦，香港地少人多，能夠做到食材新鮮，已經相當唔錯。

食牛腩麵我一向都好講究食邊個部位。 天后站清湯腩有我平時最鍾意食嘅坑腩-係近腰肋骨的肉。一見到d坑腩肥瘦相間已經流晒口水果然牛味香濃，肉帶住d筋膜，又爽又腍既口感，簡直一試難忘 同行友人叫左爽腩-係牛既腹部正下方，同坑腩連接。我都有試咗兩舊爽腩口感爽脆，煙煙韌韌，肉味濃郁，冇坑腩咁肥。 仲單點左蘿蔔，燜得啱啱好，一咬即化，好清甜無渣，索哂d牛骨湯！ 另外值得一讚嘅係湯底頗鮮甜唔肥膩，食得出店舖真材實料燉既湯底。 期待下次試佢嘅崩沙腩

同朋友想食啲香口野，揀左間串燒店😋 叫左個100蚊套餐好抵，包兩杯勁大杯1L汽水同前菜加5串串燒，啲野食性價比高。 見到網上食評話啲蠔新鮮，口痕叫左每人三隻，雖然肉唔算好厚，但勝在夠新鮮，食落好鮮甜！店員都有同我哋解釋要食邊一隻蠔先，認真抵食。 生蝦夠彈牙有陣碳燒味，夠惹味，已經剝好殼，食起上黎超方便。 毛豆熱辣辣，又唔似得出邊啲舖頭咁落勁多鹽鹹死人，或者放入雪櫃搞到啲豆凍冰冰。 海螺片好爽，孜然味重，好香口！配埋飲啖氣水啤酒一流。 惹味雞翼夠香， 我最最驚啲舖頭燒到啲雞翼太燶，雞翼本身就肉少，燒到都冇啖好食。 反觀呢間就唔會啦！燒得啱啱好，而且加埋啲香料啱啱好。 白鱔啖啖肉，好新鮮，外皮香脆，有肉汁，唔會太乾！ 娃娃菜味道啱啱好！我個人來講就覺得燒菜最高難度，要燒到啲菜唔乾唔過火，夠juicy 真係難。而且我就最驚啲鹽喺菜上面唔溶又一粒粒咁。呢度嘅娃娃菜整得真係相當唔錯！ 芝士翠肉瓜好多汁，一啖咬落去好多菜汁，好芝味！鍾意食芝士嘅人可以試一試，翠玉瓜好香甜，配芝士出奇地好味。 蜆肉好香蒜味多汁！成隻蜆拎上嚟，蜆肉配少少蜆汁食好惹味，一啜，食到Lam lam 脷！ 雞泡魚燒得好香，帶出本身魚的鮮甜味！唔點醬都好食！ 值得一讚的係多春魚塊皮竟然超難得冇損冇爛，係出邊食或者你自己屋企整嘅多春魚成日都會整到塊皮爛晒，想食一條香噴噴嘅近乎完美嘅多春魚可以喺度試吓😂 鍾意蒜頭又唔怕口臭嘅朋友，一定要快啲試吓個茄子同金菇！超級多蒜！勁正！好欣賞店舖真係落足料整蒜香茄子同金菇。 整體而言好滿意呢間串燒舖，下次一定會再同朋友來幫襯！一定要來啤啤佢！

今日同朋友行行下街想食泰國野，上網一搵見到有間泰國野望落唔錯，咁就去左試吓。 我地先叫咗個泰式鳳爪沙律，份量好足料，唔似得出面啲泰國餐廳咁全碟都係菜一盤得幾嚿鳳爪😩 碟鳳爪酸辣辣好開胃😋鳳爪都好新鮮，食落冰冰涼涼好彈牙！ 推薦俾愛好骨膠原的靚靚們~ 另外我哋叫咗生蝦刺身，餐廳放左啲乾冰喺盤嘅中間，賣相一流！店員仲好體貼提醒我地唔好伸手入去中間個位度以免整親☺刺身都尚算新鮮，不過如果刺生嘅溫度低啲口感會更加好。整體而言刺身配撘醬料、蒜頭和辣椒一起食味道不錯，幾過口癮。 重頭戲來了，火焰燒雞係呢度嘅招牌菜，噱頭係隻雞上枱嘅時候仲着緊火，陣陣烤雞嘅味道令我地食指一動。燒咗一陣我地影曬相之後，個店員問我地洗唔洗拎雞入廚房切件，靚靚仔仔的一碟雞就出黎啦~~~ 第一件雞放入口有驚喜，肉質嫩滑多汁，唔會話乾爭爭。推薦愛吃雞肉的食肉獸😋 另外我地叫咗個鹽燒鰂魚，味道剛好唔會太咸，夠味，外皮鎖實曬肉汁🤤我同友人都食唔停口！一眨眼就食曬成條魚！ 最後我地仲叫左個椰青同一杯荔枝梳打，椰青新鮮，我最鍾意”不”埋啲果肉一齊食！ 荔枝梳打味道就同普通汽水一樣，不過裏面放咗乾冰，都可以影張相呃吓like😜 總括而言，今次食得滿足，開胃泰國小菜👍🏻

港式車仔麵就食得多，平時都係配腩汁或者辣醬，頗肥膩。今日推介既呢間「養心麵」湯底令我一試難忘，於是出文讚讚佢。 點餐係自助式既，寫好食咩就可以去收銀付款，然後等食物。 開放式廚房，睇住師傅製作。 我揀左台式寬粉條、台灣水蓮、台式滷豬腳、牛筋腩、野生原條竹笙、魚膠，配麻辣湯。 湯底好厚身，味道濃郁，唔油膩，原來用左烏雞同好多材料熬製而成台式寬粉條煙煙韌韌似薯粉，索哂湯汁，而且餐廳辣醬另上，唔夠辣可以加枱面既秘製菜甫，好香辣脆口 台式滷豬腳，好軟淋入味；野生竹笙好大條肥美，夠爽口，每條都脹卜卜，吸哂d湯；牛筋腩半肥瘦，夠軟身肉唔會痴牙；台灣花蓮，夠健康，無草青味，幾爽口；魚膠幾有驚喜，煮得好淋身，唔腥，滿滿骨膠原，女士們記得食多d 最後食到底，連湯都食埋 最欣賞餐廳唔會因為選擇左幾樣餸就減少份量，每款餸都好足料，大大碗而且湯底好用心製作，食完感覺呢碗車仔麵好健康養生

近期好火熱既立食壽司，作為壽司愛好者當然要去試下晚上7點幾等左數十分鐘就有位了，亦見到有人叫外賣，門口店員好熱情推介必試款式。 基本上一個壽司師傅會跟一組客人，我哋落完第一輪單之後要加單，直接同師傅講就得。 食壽司當然要飲熱茶，立鮨係用抹茶始祖地宇治既抹茶粉，好甘香，飲完鐘意仲可以買罐返屋企 適逢白子季節，前菜叫左白子小食，微微燒過既白子好creamy，配上酸酸地既醬汁，一d腥味都無。而且白子好肥美脹卜卜，每啖都好滿足 壽司全部都係即場手握，壽司飯已混合醬油調味，基本上唔洗點豉油，只需加上少許wasabi便可。 第一排左起：大吞拿魚腩>剝皮魚>火炙中吞拿魚腩 第二排左起：秋刀魚>金目調>火炙左口魚邊 第三排：珍寶牡丹蝦 其中剝皮魚係少有壽司店有既種類，口感爽得黎帶有魚脂腴香，味道停留係口中久久不散十分推介 秋刀魚亦夠細滑，毫無腥味！ 大吞拿魚腩，切得幾厚，附上wasabi漬係面。魚腩夠肥美入口即溶又無根，係我最愛之一 另外叫左火炙大吞拿魚腩海苔壽司，睇相已經見到魚油滿瀉既感覺面頭燒得微脆，咬落已經滿口鮨香魚油，雖然好邪惡，但好滿足 因為日本馬糞海膽賣哂，最後叫左特上海膽壽司，係韓國海膽，都幾飽滿，味道較清甜，少左日本海膽既甘潤感。 總括黎講壽司質素高，而且種類繁多，又有期間限定隨季節入貨，食材夠新鮮仿如去左日本一樣

聽聞好耐嘅shake shake海鮮袋，今日終於有機會試吓一行四人，全部嘢食都係share食，可以試多幾款嘛！


前菜叫咗生蠔，我試咗最右邊嗰隻黎自法國嘅Gillardeau，肉質肥美紮實，帶子位爽脆，海水味適中，食完口腔仲會有浸淡淡既蠔回味

食海鮮當然要配白酒，兩杯都係Gewürztraminer，甜甜地，入口唔酸，酒身幾light，配海鮮好夾！


主角當然係海鮮袋我哋揀咗八款海鮮，醬汁揀混合，啲海鮮索哂醬汁，夠惹味帶有少少辣除咗海鮮外，仲配有香腸、粟米、薯仔。

其中長腳蟹肉質鮮嫩肥美
其中翡翠螺肉質都好彈牙爽口👍🏻

配菜叫咗焗蒜頭，加左rosemary 一齊焗令到蒜頭更香而且蒜頭焗都好軟身，好容易就成粒起到出嚟
另外叫左小食墨西哥粟米片，配有牛肉粒，面頭灑咗兩款芝士一齊焗，好香濃既芝士味！大家都好喜歡香口小食，我哋好快就K.O.左成碟

香煎刺身帶子意大利粉有驚喜，意粉滲左好香濃蕃茄味，另外有好多切到好細粒既意大利青瓜，食落脆脆地，豐富咗整體口感。配埋意大利粉既醬真係味道一流，酸酸甜甜好開胃。刺身帶子同其他海鮮一樣都係咁新鮮鮮甜，肉質嫩滑得黎又啖啖肉，令至我食唔停口

食完正餐就梗係叫個甜品，我叫咗個法式西多士配榴槤雪糕。多士軟綿綿入口即溶，食落有啲似雞蛋布甸，帶有好濃郁的牛奶香，口感好順滑，西多士表層有薄薄既燒焦既焦糖，食落更香！不得不提就係榴槤雪糕，食落去榴槤香味打動我的心靈同味蕾，配埋仲西多士一熱一冷，真係好食。性價比高，推薦俾鍾意奶香甜品同埋榴槤愛好者。

另外，成晚好多台都慶祝生日，氣氛好好！好適合一大班人聚會或慶祝！下次會試吓佢其他味道嘅海鮮

呢日經開黃埔，行下九號水產，原來樓下咁多嘢食，見到「宏」門口陳列櫃擺咗好多蛋糕🍰好吸引於是就試吓。 我叫咗迷你三彩丼定食，有吞拿魚碎魚生飯、鰻魚飯、海苔烏冬，每樣細細碗但分量十足吞拿魚碎鋪得滿滿，個人最鍾意鰻魚飯，鰻魚厚身肥美，食落啖啖肉好滿足，海苔烏冬亦好特別，帶點香草味嘅烏冬，配上青蔥，簡單清香嘅配搭整個套餐仲附送有沙律，沙律既酸汁開胃，生菜亦爽口。 另外右邊綠色嘅係日式山椒粉，用嚟霹除鰻魚腥味，山椒粉帶點香味但唔辣 另外同行朋友叫左大鰻魚飯套餐，大讚份量十足！ 兩個套餐都附送小蛋卷，我哋叫咗抹茶同香草味，抹茶味濃，帶有陣陣茶香，而且蛋捲鬆軟，中間既抹茶cream幼滑香草味特出左蛋捲嘅蛋香，同樣出色 飲品我叫咗抹茶沙冰，面頭嘅抹茶軟雪糕好細滑無冰粒抹茶沙冰亦頗甘醇。 二人買單四百幾蚊，這個價錢食到烏冬、日式丼飯，又有沙律甜品，加飲品絕對超值！而且抹茶抹嘅你絕對不能錯過！

呢排試咗一間荃灣嘅拉麵，對佢嘅湯底念念不忘，所以好想推介俾大家。 見到餐單上寫着日本直送嘅嘢飲，我同友人都忍唔住叫咗三枝試下。 第一枝係信州白提子梳打，果香味濃，又唔算太甜，值得一試。 第二枝信州蘋果梳打，比起提子梳打更香，第一啖飲落去都幾喜出望外，好好飲！蘋果梳打看似普通，但市面上不常見，推薦推薦。 最後係招財貓汽水 ，見到招財貓包裝覺得好可愛，連汽水本身嘅顏色都偏向金金黃黃，味道似日式波子汽水，包裝真係比足10分～ 另外我地叫左兩碟小食 。 第一碟係小食拼盤，有天婦羅蝦，吉列炸蠔同埋炸一口芝士。所有炸物都夠鬆脆，天婦羅蝦肉質嫩滑，炸蠔夠新鮮，但略厭炸物粉漿過多，一口芝士芝味十足， 若然有拉絲效果更好。 另外一碟小食係炸南瓜餅，南瓜甜度適中，帶有蔬菜嘅果香，外脆內軟，極力推薦比南瓜迷。 海老湯拉麵~ 質地濃厚既湯底creamy， 蝦味濃郁，有足料小乾蝦，配埋蔥花，提升整個湯底的香味👍🏻 仲加配兩塊豬肩肉，肉質鬆化。麵方面，我選擇左普通硬度既曲麵，麵質算彈牙，值得一試。 另外我朋友選擇咗季節限定既特上松葉蟹海老蕃茄湯拉麵，同樣湯底質地濃厚鮮甜，蟹肉肉質鮮嫩，但番茄味味唔算太突出。呢款拉麵原本加配特上之選的配料，糖心蛋好夠味，豬腩肉肥瘦適中。麵底選擇左硬的直麵，湯底掛麵，麵質硬得黎中間軟心，啱曬鍾意麵質偏硬的朋友～

呢日同朋友行D2 place，原來樓上好多野食，最後揀左「北海道爐端」試下。 門面設計好有北海道居酒屋feel，掛滿燈籠既木屋，於是就吸引左我哋入去 店𥚃有房、有長枱，適合下班傾公事或朋友、家庭聚會都得。而且內裏設計好有日本特色，擺左好多日本酒。 醬油燒海苔鵪鶉蛋，餐廳將鵪鶉蛋用醬油少少酒醃過再燒，蛋入味，燒得外面都幾彈牙，面頭既海苔點綴得黎，味道都幾夾 鹽燒鯽魚，北海道特產之一，雖然肉質紮實，但鯽魚嘅脂肪頗多，好肥美所以食起上嚟都好滑，而且吱上檸檬汁一d魚腥味都無，反而帶出鮮味 煙肉芝士奶油意大利麵，餐廳最特色嘅地方係即場喺顧客面前將意大利麵放入一大磚芝士裏面撈勻，條條意大利麵都沾滿香濃嘅芝士而且我地點左三至四人份量亦很多！配料揀咗蝦，都幾大隻點埋d芝士汁變咗芝士大蝦哈哈 炸日本生蠔，餐廳炸得皮薄酥脆，一咬落去生蠔juicy，小心燙口 另外叫咗牛肉壽喜鍋，餐廳已經預先落好晒材料係個鍋，嚟到只要滾起就食得，另外雞蛋可以攞嚟點牛肉，令牛更加滑身；或者直接落係鍋中打出蛋花。配菜都幾多，如果想食多啲蔬菜又食牛肉嘅朋友可以叫呢個 炸明太子雞翼(1份兩隻)，我地點左兩份一人一隻。飽滿嘅雞翼裏面釀滿明太子明太子帶點辛辣好惹味香口而且雞翼唔油膩，炸得雞皮脆卜卜 整體來講，小食款式夠多，一班朋友黎可以叫多啲試唔同食物，下次會試吓佢嘅串燒