家家戶戶 近排好似轉涼，就想飲啲熱湯，食下辣野，今日就黎到韓國街既家家戶戶吃個晚飯。 餐廳裝修雖然唔算好精緻，但黎晚客人都唔少，而且餐單有好多唔同選擇，主打係韓國家庭菜，賣相同份量都有保證，色香味俱全！ LA 牛肋骨（$178） 呢個價錢係跟餐既價格，如果唔係餐會平10蚊，餐有海帶湯，有啲冷盤小食仲有枝細細地既韓國版益多力多。一睇啲肉真係超多，而且肉烤得岩岩好，啲油脂出哂黎好軟熟！ 泡菜豬肉鍋（$109） 由於呢個餐本身有泡菜湯，所以就冇左熱既海帶湯，呢個泡菜湯送飯一流，簡直係白飯小偷。（個人好鐘意韓國既湯配飯既料理）豬腩肉切到細細粒，好入味。味道其實唔辣，又岩岩煮起送上，冬天食真係好暖胃。 兩個餐既份量都好多，味道也不錯！睇到一上菜啲烤牛肉多到嚇死人，最後都真係飽到食唔哂🤭

Uncle Pizza 好耐冇放工去soho chill chill，今次就黎到呢間小小的pizza 店，雖然位置環境都算比較清靜，但客人就絕對唔少。 餐廳名都咁直白，一睇就知食pizza出名😯 啲pizza名都超有趣，今次叫左～ Uncle Kong （$158）8 inch 雖然唔算大塊，但料好足，做法好傳統，兩個女仔其實岩岩好。pizza 都好多款揀，總有一款岩你，而且soho黎講，價錢都合理，而且好好味！ Bucatini with crab meat & green asparagus, vegetable broth ($158) 諗住呢度食pizza，就冇對意粉冇咩expectation，餐廳好好人幫我地轉左做linguine，上菜個陣賣相超吸引，蟹肉多到真係啖啖意粉都食到蟹肉，而且蝦肉都好嫩滑爽脆！

癡膠雞 最近轉左工，開始發掘下灣仔既美食，今次就介紹下呢間養生藥膳米線！ 睇個名就知道呢度有花膠食，唔好以為會好貴，其實都係$70左右一碗，如果食厭左普通酸辣米線，呢度真係好岩黎食！ 招牌花膠雞米線（$68） 湯底聞落好香藥膳味，食落甜甜哋，配埋蟲草花，雲耳同花膠，都知幾養生！返工受完一日氣，梗係要食返好西補補！ 椰子雞米線（$60） 椰子湯底好清甜，配埋啲滑滑既雞肉，又多左啲肉湯味。如果唔鐘意藥膳味既朋友，可以食呢個椰子湯底～ 食完咁補既一餐，如果一定要彈就係個爐keep 住著，搞到湯底keep住好熱，但養生真係要食暖🤣所以呢間真係會得閒encore下！

Fab Kitchen 一向都知道荔枝角都有好幾間工廈fine dine 餐廳，今次就黎試下一間之前未食過既Fab eat～ 今次就食左4個course，兩個人就大概食左$800左右，唔好睇佢份量細細，賣相又精緻，食完都真係好飽！ Soup: 蘑菇湯 蘑菇粒切都好碎，好易入口，而且好香，可惜落得太多水，味道較清淡。 First course: -蕃茄水牛芝士熱情果醬沙律 -紅菜頭配香草吞拿魚 沙律上面個波波敲碎會有啲熱情果醬流出，好可愛，而且味道酸酸味味，不錯既配搭。 吞拿魚味道都好夠，可能外不夠脆但內軟，配埋紅菜頭都幾夾。 Second course 墨魚蝦肉卷配香草橄欖油 作為墨魚既愛好者，呢碟菜係我最愛之一，有著墨魚嘅煙靭，亦都有蝦嘅香味！ Entrees -法煮風乾鴨胸 -西班牙豬鞍配甜薯蓉 鴨胸係餐廳自己風乾，食落你有返風味！外脆內軟右埋啲鴨油，食落軟熟，烤得岩岩好！ 豬鞍食落更加令我驚豔，食落第一啖一啲都唔似豬肉，燒得岩岩好熟左，唔好咬到牙痛，保持肉質軟熟，而且配埋甜薯蓉同醬汁清清爽爽。 完左4個course仲會包杯野飲，餐廳環境都幾清靜，幾岩傾下偈，飲杯野，而且食物都好精緻，睇得出好用心！

串Grill🍢 夏天想燒烤但又唔想無室外暴曬，今次黎左呢間自動串燒餐廳試下。呢啲鋪頭岩哂懶又想燒烤既大家，餐廳幫你串好哂啲野食，只要放上個烤爐就自動轉到熟，又可以解放雙手，又唔洗驚燒焦野食～ 呢到中午黎食一個人$238，如果過左3點就有個更平既價格，包埋放題野飲，除咗普通嘅汽水仲有好多樽裝涼茶飲！ 餐牌有海鮮、丸類、牛肉、雞肉、豬肉等等大概30款野食！個人覺得牛舌、牛肋肉、蜆肉、菠蘿都好好食，同埋燒烤一定要叫棉花糖！但食芝士腸要小心啲，如果太熟就會有機會爆啲汁，彈到自己！ 呢種燒烤真係為懶人而設，但係其實比起真火，呢種爐燒野食會熟得比較慢，但慢慢食其實都食好多野～餐廳老闆娘都超熱情，教埋我地點整！ 雖然香港都興左呢啲自動燒烤好耐，但如果想一路涼冷氣一路燒烤，真係一個唔錯既選擇～又唔會驚比油彈親，價錢又同出面燒烤差不多，都係一個不錯既選擇！

三本目 雖然呢間餐廳就偏僻左少少，而且淨係做外賣生意，但出奇生意很好！鋪頭做平民價加上即落單，師傅即刻手工整，當然整出嚟嘅壽司飯都唔似啲連鎖店既味道咁死！ 特尚套餐拼盤（$208） （壽司20件+刺身拼盤） 壽司包括左吞拿魚、油甘魚、#花之戀 壽司；而刺身都有#中拖羅 ，當然呢個價錢2人份量都唔會期待係omakase既質量，但以賣相黎講，中拖既樣同味道都好吸引！ 可能胃口好少少既朋友們會唔夠食，但鋪頭仲有好多選擇，#手卷 、#親子丼 ，刺身等等大部分都係$100以內！雖然係即叫即做，但由落單到拎到壽司，其實大概都係等左15分鐘左右！ 有機會都推薦住附近嘅朋友叫黎試下，好有心又抵食既小店！

賓墟餐廳 假日起身第一餐就係下午茶，今次黎到呢間好抵食既茶記，點左好多野食～ 鐵板西冷牛扒 （$62） 食扒唔洗$70真係偷笑，仲要大塊兼好厚肉，食落個位都好嫩！配埋薯條，唔洗驚唔飽！ #炸雞髀（$38） 雞髀真係同塊臉咁大，炸得好香脆，啖啖肉超滿足，雞肉亦冇因為炸過而冇哂汁！ 一口#西多士 配古力醬 （$34） 下午茶必備之西多士，但一口係呃人的，邊個個口咁大可以一啖食左佢！雙層麵包炸埋一齊，中間配上花生醬，外面一層甜甜既朱古力醬，邪惡首選！ 泰式三寶湯河（$42） 唔好睇佢個樣普普通通，佢啲河粉真係好好食，滑得黎薄身又唔淋，食完堆重口味煎炸野，配返個清清地既湯河真係不錯！ 芒果鳳仙特飲（$16） 有點似楊枝甘露，好清爽既夏天飲品，解暑之選！

阿爺八鮮鍋 平時比較食得多係牛肉放題，今次黎到旺角呢間專食海鮮放題既火鍋店，仲要價錢都係400蚊左右，平時咁鐘意海鮮既我，一定要食返夠本。 佢地個放題係包2.5小時任食，會有個雞煲，海鮮龍蝦拼盤，燉湯，炸物/刺身！+$20就會有飲品放題！ 今次雞煲叫左泰式酸辣雞煲，雞煲份量唔算大，雞肉好嫩滑，而且超入味！酸酸辣辣既泰式汁加埋超開胃，冇諗過咁樣煮都好好食！ 海鮮拼盤有蝦、膏蟹、帶子、龍蝦同鮑魚，呢啲都超新鮮，鮑魚超肥厚，帶子又巨型！ 至於炸物係俾2位入座既，而刺身係比4位入座，燉湯係老火湯，飲落好清甜，唔係啲味精湯！ 重頭戲梗係講下有咩海鮮係任叫，其實種類相當多，蟹、鮑魚、蟶子、象拔蚌片、廣島蠔，仲有白鱔、龍躉肉等等都可唔可以任食！ 比起牛肉我會覺得呢到海鮮好食啲，牛肉都有幾款選擇，仲有啲蝦滑、手打丸類選擇！如果唔食得海鮮既朋友，其實都仲有好多野可以食！ 呢度啲海鮮都好大隻好厚肉，絕對會食到好飽好滿足！而且都新鮮！如果你係海鮮狂魔，好拆得，咁一定圍到本🤣 我地兩個人最後食左$900左左右，海鮮任食既話算好抵，同埋如果可以5:00/或者9:00入座，價錢會再平啲！

泫 #居酒屋 今次黎食呢間高質小店，裝修好雅致，都做緊一啲海膽既餐牌，今次叫左午市定食！ 每個定食都包個湯，沙律同茶碗蒸，包你食到飽哂～ 極上魚生丼（$188） 呢個魚生丼有 #三文魚、#拖羅、#赤蝦、 飛魚子同 #海膽，每一件都好新鮮，厚身又好肥美，海膽好清甜。飯都好乾身，粒粒分明，總體黎講真的很不錯！ 生姜豚肉丼（$84） 一上菜我地就陣陣烤豬肉味，真係超香！肉量都好夠，而且配埋洋蔥一大啖咁食，真係超滿足。睇落簡簡單單的料理，都幾難得會令我咁記住呢間餐廳！ 茶碗蒸，湯品都很不錯，而且茶有得揀熱同凍，好貼心既居酒屋！以呢個價錢食到高質素既海鮮，而且餐廳位於地鐵站附近幾分鐘距離好方便，住係附近既朋友都可以去試下啊！

最近生存技能爆滿既男朋友話帶我見識下食omakase, 作為一個唔會拒絕好意既女朋友一定應承兼食盡佢。

晚 17品 （$980 +10%）

先付（3品）



✨芝士魚糕、螢光魷魚及淮山麵
唔好覺得佢睇落普普通通，魚糕好重魚味，螢光魷魚雖然睇落乾身，但食落去好香仲有汁！配埋清爽既淮山，酸酸甜甜好開胃！

刺身（4品）

✨ #伊左目
師傅俾左我地睇呢條魚既身份證，教左我地每一塊唔同既食法，可以齋食，點小小藻鹽或者wasabi ，就係咁簡單既食法先食得出佢既味道！

✨藍澳產龍蝦刺身配紫蘇花、蝦膏
蝦膏係師傅突登調過味，第一塊龍蝦肉建議配少少青檸汁，第二塊肉配埋濃郁既蝦膏，好食到上天堂！

✨北海道章魚
話說一隻章魚腳都成米長，今次食左佢既吸盤同肉，師傅醃到酸酸地更加帶出佢既清甜！

✨ 灸燒千葉 #金鯛
又係兩條有身份證的魚，好清爽但又有啲肉感既魚，灸燒個皮少少，更加有外脆內軟既感覺！

煮物

✨煎三文魚下巴
男朋友係個挑食既公主，平時特別討厭有骨既魚，今次佢連皮都想埋我個份，炸得好香脆又啲魚油又逼哂出黎，魚肉好滑，配啲酸酸既醬汁，唔會好膩！

壽司6貫

壽司用左女王米，大粒得黎有啲嚼勁，師傅手勢都很好！

✨ #蜜柑鯛 ：呢款魚係由愛湖縣黎，三日熟成，因為佢地由細到大食既糧有柑皮，所以魚身食落有蜜柑味，味道好豐富，甜中帶少少甘！

✨ #池魚 (donchichi)： 呢款有名既池魚意思係小朋友，油脂味超濃郁！

✨青柳：係日本omakase先會見到既魚，香港比較罕見，比起北寄貝個類貝殼類明夠爽口又軟身，帶少少甘味，好有層次！

✨大 #拖羅：實在太愛拖羅，雖然我一般比較愛中拖羅，但呢條本身有8.7kg（不計魚頭）既三重拖羅（真係有種係係豐州市場食既味，油膩得黎冇筋，真係人間享受！

✨ 天使蝦 ：我不嬲就鐘意食生蝦多過熟蝦，但呢隻蝦簡直顛覆咗我對熟蝦既睇法，甘甘地蝦膏味，又有肉感！

✨ 銀鱈魚：一個字- 肥～佢有種左口魚既油膩味，但有比較清新啲，食落真係估唔到係鱈魚！



✨鹿兒島A4 和牛丼
又有種係日本食和牛既感覺，配埋蛋黃漿，真係visual killer，係香港食到咁高質既真和牛，好感動！

✨吸物（蔥花 豆腐 蛤蜊）
就咁清清地，岩岩好洗走哂嘴裡面油膩豐富既味道，暖暖地好舒服！

✨甜品：#綠茶 奶凍
上面每一道菜都咁高質，老實講對甜品都冇要求，點知呢杯奶凍，筆起身個texture已經知不得了，食落去有好濃郁既綠茶味，仲有啲磨成綠茶粉粒粒既感覺！好想瘋狂encore

Free-flow ($188) ［sparkling, 清酒，梅酒］
最開心係任飲酒～3種酒都好好飲，梅酒尤其正，味道好純好甜，完全唔覺自己飲緊酒！

感謝老板帶我黎食呢餐，估唔到香港都有啲咁高質既omakase, 其實$1000多啲食到咁多款加環境有舒服，好有禮貌既師傅同員工，真心覺得抵既！會再返黎食😍✨