平時都鍾意去黃埔覓食，餐廳選擇多，又有鐵路十分方便。今次朋友就選擇左一間係黃埔站一出就係的韓式餐廳，地點好方便。 餐廳除左韓燒外，仲有新鮮醬油蝦、醬和韓國料理，各式選擇都好豐富。 前菜有3碟，有泡菜、蘿蔔同菠菜，調味剛好很開胃，而且份量都唔細。 點左一隻醬油蟹，大大隻，好多肉，而蟹身仲帶有金黃色蟹膏，非常鮮味。 另外蟹殼部份仲加埋蛋黃，拌埋紫菜飯更加惹味。 點左牛豬燒肉Set C，好豐富嘅燒肉套餐，有調味牛肋骨、牛五花、五花腩同豬頸肉。款式都好多，而且每一款份量都唔少，一次可以試晒幾種牛和豬肉。 牛五花比較快熟，食落夠牛的鮮味。 五花腩一層脂肪一層豬肉，燒到外層金黃色，食落帶點油脂，味道好香。 豬頸肉好厚身，肉質爽脆。 另外仲有大大份泡菜、蔬菜同芝士。 仲點左個較清淡的韓式牛肉炒粉絲，加點麻油香味味道更好。

之前經過沙田好運中心，見到呢間台式餐廳都好多人排隊。今日下午茶時段經過，見到剛好有位唔使等，就入來一試。 餐廳裝修以木色為主，感覺光猛乾淨，坐落舒服。 下午茶時段食品選擇好多，而且價錢都好實惠。 鹽酥雞滷肉飯配紫菜貢丸湯及台灣香腸 ($48) 好豐富的下午茶，價錢只係$48 ， 真是十分抵食。 鹽酥雞炸得外層香脆，雞肉嫩滑。 滷肉飯嘅滷肉調味剛好，醬汁唔會太鹹，用嚟送飯一流。 再配埋滿滿紫菜的貢丸湯，暖意十足。 大腸麵線(輕量) ($32) 大腸嘅份量都唔少，夠味軟嫩又毫無腥味，而且唔油膩。 麵線食落順滑，湯羹細滑，唔需要另加任何調味已經好好食。 台式奶茶 (熱) 台式奶茶本身就已經帶有甜味，茶味夠香濃，飲落細滑。

朋友介紹荔枝角新開的居酒屋，位置稍為偏靜但超有人氣，星期三晚餐時段到達已經全滿。好彩只係等左15分鐘左右就有枱。 先黎一個IGable的金酒杯，最底層係松葉蟹肉，上面放了滿滿魚籽，吞拿魚蓉同金黃色海膽，每款海鮮互相配合，海膽鮮甜回甘，第一道小食就已經充滿驚喜。 另外仲點了同樣配搭的金龍珠海膽吞拿魚蓉卷， 飯卷內外都放了海膽，加上吞拿魚蓉，本身已經無得輸。最特別係師傅仲加了漬蛋黃，令整個飯卷口感更順滑，味道更豐富。飯用了赤醋飯，微酸香味更突出海鮮鮮味。 必試招牌菜式！金丼。月見海膽三文魚籽拖羅！用料新鮮，有海膽、魚籽、厚厚的吞拿魚蓉和蛋黃，堆到小山丘咁，單睇賣相已經食慾大增。 想試特別的配搭，粟米脆餅壽司。三文魚牛油果就啱晒。以脆卜卜粟米脆餅包住壽司飯，三文魚粒和牛油果，咬落外脆肉軟。加埋少少辣的沙律醬更加滋味。 超豐富的壽喜燒和牛鍋，大大片的A4和牛，雪花分明，入口即溶，充滿和牛鮮味同油香。 另外好鍾意壽喜燒和牛鍋的年糕福袋，外面的厚厚日式油揚吸晒湯底鮮甜，裡面係煙韌年糕。 串燒同樣高質，厚燒牛舌心夠爽口彈牙，黑豚五花腩好軟嫩，而最特別的係自家製雞皮蝦。用薄薄雞皮包住大蝦，食落有蝦的鮮甜又帶點雞皮咸香，味道好夾。

約咗喺荔枝角返工嘅朋友晚餐，先知地鐵站出口附近嘅工廈內有呢間超高水準的泰式餐廳。菜式選擇好多，價錢親民，重點係每道菜嘅水準都好高。 咖喱軟殼蟹 ($198) 好大碟的咖喱軟殼蟹。軟殼蟹炸至香酥，食落唔油膩。 咖喱底以洋蔥、雞蛋炒香，再加上椰奶的調味，甜而不膩。 黃咖喱海鮮 ($85) 點菜時沒有留意軟殼蟹已經係咖喱，再點左個黃咖喱海鮮。不過兩種咖喱食落味道同口感完全不一樣。 黃咖喱沒有加入雞蛋，香料味比起咖喱軟殼蟹為濃，帶有微辣，用黎點蒜蓉包味道一流。 海鮮都好足，有青口、大蝦、魷魚、魚塊等，而且肉質都好新鮮。 蒜蓉包 (+$15) 點咖喱類菜式均可+15玩換蒜蓉包一客。 一客有4大片，一上菜就已經聞到超濃牛油蒜蓉香味。蒜蓉包表面焗至金黃色，咬落香口，建議一定要加配。 泰式蝦餅 ($78) 超級推介這個蝦餅，即點即炸。食得出係用新鮮手打蝦膠，外層炸到超級金黃香酥，咬落蝦味鮮甜，啖啖彈牙蝦肉。 蝦餅配有甜辣醬，但其實完全不用額外醬料已經夠鮮味。 金鑽鮮菠蘿冰 ($20) 菠蘿冰的菠蘿粒好足料，水的部份唔係死甜的糖水，而係加入菠蘿蓉，令菠蘿冰味道更濃。 椰汁涼粉冰 ($18) 涼粉好多好滑，椰汁味夠濃。 椰皇三重奏 ($42) 香濃椰汁糕加上燒香的椰絲，底層係椰子水啫喱，加上椰皇內的椰子肉，每一啖都係滿滿椰香。必定要一試的甜品。

點左尊貴海鮮套餐，哩個價錢($419)一共十款海鮮連埋菜同粥，食得出每款海鮮都好新鮮，真係好抵食。如果覺得套餐的海鮮唔夠，仲可以單點，除左海鮮，仲有肉類同蔬菜的選擇。 全程都有店員幫手蒸海鮮，好精準咁設定蒸的時間，唔洗擔心會煮到過熟。店員都好細心，主動換碟及介紹海鮮，加分加分。 青口同刀貝蚌新鮮到仲識噴水。 蟹膏超多，未食已經流晒口水。 龍蝦好大隻，啖啖肉，由尾部一夾就成條肉起左出黎。肉質夠結實彈牙，夠鮮甜。 大赤蝦肉質爽口，食落鮮甜。 店員特別提醒刀貝蚌唔洗點醬油，因為已經好重海水味。蒸熟後蚌內還有滿滿水份，一咬落去真係好濃味。 翡翠螺同樣結實爽口，完全唔會韌。 膏仔蟹真係真係超多膏，食落清甜回甘，鍾意食蟹的一定要試。而且蟹肉都唔少，超滿足。 饅頭蟹相對少膏，但味道好濃好鮮。 鮑魚好新鮮，雖然好厚身但蒸熟後完全唔韌，好易咬得開。 青口係另一推介，因為真係好新鮮，食落完全無苦味同雪味，食到青口的淡淡清香。 食完海鮮後仲有蔬菜，蒸出黎保留左菜本身的清甜。 蒸海鮮時的精華都流到鍋底的粥肉，個粥本身配料唔多，有點肉片提味，加埋海鮮精華變得好鮮味。 小食的魚皮，暖暖地加埋炸蒜夠香口乾脆，唔油膩。 點左杯桂圓紅棗杞子茶，飲落清甜滋潤，好足料。

想食高質日本嘢，總會諗起呢間黑門水產。裝修跟日本的居酒屋一樣，令人有置身日本嘅錯覺，而且食品質素很高，每次同朋友嚟，大家都會食得好滿足。 鱈魚白子 白子綿密柔滑，口感獨特，入口即融。加上辣蘿蔔蓉和柚子醋調味，食落完全無任何腥味。係一個不錯的開胃小食。 池魚刺身兩食 池魚夠新鮮，完全冇腥味，肉質都好柔嫩。一半魚肉切成較大片的刺身，食到池魚本身的鮮甜香味。 另外一半切的較幼細，加上微酸的醬汁調味，配上紫菜，味道口感更豐富。 海膽蟹味噌甲羅燒 這次選擇了加入海膽的蟹味噌甲羅燒。超香濃松葉蟹味噌，加上滿滿的蟹籽和甘香的海膽，入口濃郁的鮮甜香味，一定一食愛上。去居酒屋必點的食品。 海膽燒帆立貝 帆立貝本身都厚身，加上半菇、秋葵和海膽作配料，用清酒煮熟。食落淡淡酒香，再加上黑胡椒提味，將海膽同帆立貝嘅鮮味大大提升。 鐵板宮崎柚子胡椒香蔥牛舌 牛舌份量不少，咬落爽口香濃，加上脆蒜，香蔥同洋蔥炒香， 十分惹味。 壽喜牛肉鍋 配料超豐富，有豆腐、冬菇、金菇、京蔥、芋絲等，用淡味的醬油做湯底已經好夠味，特別是牛蒡絲煮熟後令湯底變得好香濃牛蒡味，十分惹味。我們兩人幾乎把湯底都喝清光。 牛肉唔算好多油脂，食落好鮮甜重牛味，而且肉質軟嫩，沾上蛋汁後更為順滑。

去居酒屋，首先就點咗飲品，我哋點咗荔枝Sour同巨峰乳酪梳打。果味加碳酸，好Refreshing，超級適合夏天飲用。 呢度嘅飲品選擇都好多，而且價錢都唔貴。 . 先點個刺身，開胃小食，店員推介胡麻白身薄切。用的時令食材，當晚新鮮用的是池魚而。白肉魚刺身透得透光，彰顯師傅的刀功。 鮮甜的池魚王，加上特製的酸醋汁，十分開胃。 另外仲點左幾串串燒，雞肉釀青椒，配上日本生雞蛋，食落更加順滑。 牛肉蘆筍亦係其中一款好鍾意嘅串燒，牛肉夠嫩滑，配上爽口蘆筍。 夏天最適合食蕎麥麵，選擇了海膽蕎麥麵。Creamy豐盈的海膽，味道清甜，加上蕎麥麵，好味到停唔到口。 廚師發板10件壽司，全部都係當晚的新鮮食材，有厚切的帆立貝，肉質好軟好鮮甜。 另外仲有三文魚、吞拿魚、油甘魚、牡丹、蝦和海膽等。 餐廳嘅店員都好有禮貌，而且介紹食品好清晰，令人會想再幫襯。

同朋友話講起好耐無食過放題，於是朋友帶我黎兆萬極上帝王水產。一出𨋢就係餐廳，門口掛滿日式燈籠，好有氣氛。 . 由到店等位到食完飯後，店員都超級有禮貌，哩個真係要一讚。 . 記得以前2個人食放題都會被安排坐好細張的枱，食物成日都唔夠位放。哩度好好，每張枱都好大，座位又夠闊落，坐得舒服。 . 用QR 落單，食物都好快送到。 . 食物種類好多，除左一般的刺身、壽司、天婦羅、串燒等，竟然仲有壽喜燒可點。 . 每張枱都會送上鍋物，我地揀左壽喜燒。餐廳會連埋湯底、牛肉和蔬菜盤送上。唔夠食可以再自己落單點火鍋配料。 . 先溶牛油，再加牛肉同湯底。湯底味道調得幾好，甜甜地更帶出牛肉香味。牛肉唔會太肥但都夠嫩。煮過牛肉的湯底都係牛味香味，就加蔬菜繼續火鍋。 . 哩度的刺身款式都多有10幾款，有三文魚、帶子、北寄貝、八爪魚、希靈魚、甜蝦、赤蝦等。質素都唔錯，三文魚同帶子夠晒厚切。 . 串燒都多選擇，但係唔係日式的串燒，點左牛、豬、雞、牛舌等，大多加左孜然調味。牛舌夠大件又爽口，Encore左幾次。 另外都幾鍾意哩度的一口牛肉，夠香又肉質夠軟。 埋單前店員仲細心問下我地的食物上齊未，又提醒我地記得係攞埋雪條食。雪條都係日韓牌子，仲要款式都好多，另一加分位。

粥底海鮮火鍋食過好幾次，哩間蟹仙真係好值得一試，因為哩度的海鮮真係好新鮮好高質。而且仲有侍應幫手蒸海鮮，完全唔洗自己動手。 同朋友2個人點左尊貴海鮮套餐，起初都擔心會唔會唔夠飽，但食到最後係超滿足好夠份量。 尊貴海鮮套餐有10幾款海鮮，個人最鍾意當中的野生琵琶龍蝦，啖啖肉又夠鮮甜。 鮑魚同珍珠蠔又係另一推介。鮑魚好厚身，蒸完肉質好爽口。而蠔雖然唔大隻，但好Creamy，完全唔會有苦澀味，連唔太食蠔的朋友都大讚。 貝類仲有青口、刀貝蚌和月亮貝。青口係意料之外的好食，肉質好軟，仲帶點海水的鮮味，同平時食的青口完全唔一樣。刀貝蚌和月亮貝就本身都偏咸，完全唔需要點醬油 蟹都有2款，饅頭蟹同膏蟹。饅頭蟹細細仔唔多肉食，係食佢的超濃鮮味。而膏蟹就真係不得了，滿滿蟹膏，好濃郁好滑，而蟹肉都唔少，同樣鮮甜。 日本野生大赤蝦夠大隻，肉質爽口。 蒸完海鮮後仲有蔬菜盤，清蒸的蔬菜估唔到咁鮮甜，保留埋菜的原味。 最後要食埋個滿滿海鮮精華的粥，加埋香蔥同菜脯更加提味。粥的份量好多，超滿足。

本身鍾意食餃子，之前經過哩間餐廳已經想試下。餃子款式好多，仲可以揀煎餃或者湯餃。湯的話會跟上狀元九鼎湯。 食餃前食左佢地的醃蘿蔔，酸酸咸咸，清新開胃。 今次揀左壽喜燒牛肉餃同龍鳳松茸雙餃，都係煎餃。 平時比較少見到有壽喜燒牛肉口味的煎餃，估唔到咁好味。皮薄多餡，一咬開勁多肉汁，好Juicy，而且仲係濃濃的壽喜燒湯味。 龍鳳餃即係黑白松茸松各一半，8隻餃煎到金黃香脆一咬開就有好香濃的松露味，尤其黑松露味更突出。 四川涼皮 (小辣) 晶瑩的涼皮，加上帶點麻香的辣油，花生碎同香蔥的調味，十分滋味。 食餃子要佢地哩個酸酸辣辣的辣醬，更好味。 蜂蜜檸檬薏米水 超級足料的薏米水，帶有淡淡蜜糖檸檬香味，口味清新又滋潤。