朋友成日睇韓劇，成日都有個場口，男女主放工會去街邊嘅小食檔飲酒食宵夜。最近喺IG轆到香港有間餐廳裝修相當韓國，於是今日就同朋友一試呢間還原度十足嘅韓式食店！ 一上到大廈頂樓出電梯，睇得出裝潢相當花心思，係乾淨版既大排檔～由大門口開始已經處處都係打卡位，氣氛同佈置都相當還原韓國場景，好有趣！好開心我地可以坐到個鐵閘位，影起梳相上嚟特別有feel～ 我地點咗三個菜加兩個飲品，好快就有得食！ 芝士蟹膏蟹肉蛋卷 朋友讚不絕口既一個蛋卷，真係必試，滿滿嘅半熔芝士撈埋鮮美蟹膏，加埋啖啖蟹肉，滑嫩鮮三合一，相信都無咩人唔愛😳 卜卜脆炒豬脆骨 拼拳頭飯 呢個做下酒菜好適合，豬脆骨口感爽脆，又夠香辣，相當惹味，忍唔住一啖接一啖🤣🤣🤣拳頭飯加咗紫菜同麻油，拌埋濃味嘅豬脆骨，夠哂夾！飲埋個荔枝梳打，冰凍清甜解渴，正好可以解解辣🤣 一雞兩味（自選兩款炸雞） 因為太想食炸雞啦！我地揀咗雙拼，醬油味同埋甜辣味，調味好好味，份量大大件又啖啖肉，但肉質又唔會話好乾，食完呢個炸雞真係好飽，要去散步消化～ 呢度完全係一個輕鬆自在開懷暢談嘅氣氛，見隔離枱一班朋友飲起韓國酒嚟就更加份外盡情！

雲海一線 最近成日食燒肉打邊爐同埋放題朋友提議簡單食個麵就搵咗銅鑼灣呢間食米線嘅舖頭試吓 明明諗住簡單啲，但係一見到個Menu我同朋友都已經各自揀咗幾款嘢食，話咁快又叫到成枱都係😝 野生山珍過橋米線 嚟到米線專門店，梗係要嗌一鍋米線啦！我哋揀咗呢一款係最多配料嘅，值得一提係個煲真係好熱，食到最後都仲keep到個溫度！而裏面嘅米線同雞肉都好滑～ 酸辣湯韭菜餃（8隻） 酸辣湯配料充足，可以就咁飲，韭菜餃大大隻，裏面餡料仲好豐富😛 小籠包（6粒） 小籠包係用蒸籠上嘅，咬開裏面都仲有湯汁！ 雞絲粉皮 雞絲同醬料仲多過粉皮，夠晒惹味！ 爆漿糍粑 揸得啱啱好，唔會好油膩，外面少少脆，裏面係軟腍腍嘅流心～ 餐飲我哋叫咗凍檸檬菜蜜同凍自磨豆漿，真係有檸檬片同埋飲得出係自磨豆漿！ 最後兩個人食到捧住個肚$300都唔使，銅鑼灣區嚟講算抵食！

朋友係個成日去深圳食玩買既人，佢話想試「西塔老太太烤肉」好耐，但係都仲未有機會。原來呢間烤肉喺香港都開咗舖，所以朋友就約咗我去一齊試吓喇～ 一去到餐廳就覺得好似韓國餐廳，裝修有格調，仲播住K-POP歌，環境舒適！我哋因為肚餓所以叫咗個二至三人餐，一點完菜，店員就上咗好多碟前菜，仲話食完可以免費refill㖭！ 我地張枱好快就被食物填滿啦，呢個餐有五碟肉，分別係老太太特色肥牛、老太太特色瘦牛、燒汁橫隔膜、雪花肋條同埋厚切豬五花。 芝士粟米係用鐵板上，滿滿溶到拉絲既芝士，侍應叫我地趁熱食咗先，食落無論係栗米定係芝士都好香甜呀～ 喺我地食住栗米諗緊食邊碟肉先既時候，侍應已經主動問要唔要幫我地燒，跟住就全程幫我地燒肉，我同朋友就專心吹水，辛苦晒侍應啦！ 呢個套餐一次過可以食晒肥牛同瘦牛，又有厚切豬五花，侍應會勁好心機將太厚既肉剪細，又會幫啲肉轉pose，烤到每一面都金黃色，好講究！ 燒完肉，除左有普通烤肉醬汁同辣醬，仲有西塔秘製芝麻醬大大碗，同埋無限refill新鮮生菜，用菜包住厚切豬五花嚟食夠晒解膩，係我最推介既食法！ 食晒啲肉之後，仲有一大包錫紙金針菇，入面調好晒味，辣辣地好正，食完就啱啱好～

逢星期三都要去某超市特賣日，今晚去完康怡，過條天橋就搵到呢間涮涮鍋補充體力！ 我同朋友都揀咗骨膠原美顏玫瑰花膠雞白湯(+$10)，勁香玫瑰味，仲有慢慢溶化嘅花花，剩係個湯底都夠晒吸引呀！ 我哋揀咗Ｂ餐，QR Code落單有好幾款牛肉、豬肉同雞肉揀，而丸類、炸物、蔬菜就唔駛慢慢落單，行出去就可以自己拎！ 肉類就試咗特選美國CHOICE牛肩肉、特選美國CAB 牛肩胛肉、精選美國牛五花、美國豚肉、美國豚五花肉～ 炸物款式多，refill得快，所以食落仲好熱好脆，又唔駛怕手機落單叫多咗啦！我就食咗薯角、魷魚、帶子同埋蠔～ 飲品方面，款式好多，除咗有比較特別嘅韓國飲品，竟然仲有生可樂！ 唔想飲凍嘢都冇問題，可以拎個茶包沖杯熱茶消滯解膩！ 甜品方面，有蛋糕、泡芙、多款香港製造雪糕同雪條任揀，蛋糕細細件，可以試多幾款唔同味道～ 服務方面，職員好爽手幫我地收碟同加湯，態度亦都好好～

最近經常同親朋好友出街大魚大肉，係時候想食返啲健康清淡嘅食物～喺香港成日見到TREEHOUSE呢間素菜餐廳，即刻約咗同樣追求健康嘅朋友去試吓！ 店內以全植物素食為主打，可以自由配搭麵包或沙律，再揀自己喜歡嘅配料，花多眼亂！唔緊要，呢度竟然仲有兩部自助點餐機，既清楚又方便！ Snowdrop雪降烤餅普通沙律碗 （雜穀米飯&雜菜沙律） 呢個好有驚喜，原本以為食素好dry，估唔到呢度嘅沙律好香口，配埋個醬汁就變得好豐盛！我哋最鐘意佢有塊燒茄子，好juicy呀！ Margherita瑪格麗特酸種薄餅 薄餅厚度剛好，上面嘅芝士當然都係素芝士啦，放材料一啲都唔手軟，羅勒葉新鮮又大塊，加埋蕃茄醬，好清新開胃！ 炸椰菜花 睇落好似炸雞咁，咬落炸衣好薄，調味好香，入面嘅椰菜花仲係好腍，唔會炸到乾晒，好正！ Walnut Brownie核桃布朗尼 食素都食到飽飽，但係都忍唔住叫埋甜品，Brownie俾人印象一向都係一個非常甜嘅甜品，但係呢度做出嚟甜度啱啱好，夠晒健康！ 唔甜相對比較食得放心！ Treehouse喺香港仲有分店，以後想食得健康都可以好就腳🥰

春暖花開，今日約咗好朋友一齊行太子花墟，行完花墟大家都好攰，喺太子地鐵站附近見到呢間好有格調、以貓頭鷹做主題嘅餐廳，就衝左入去醫肚～ 朋友叫咗個燒紐西蘭特級肉眼扒 8oz 配自家製南瓜蓉套餐，加$32轉配五重芝士醬焗薯條；而我就單點咗香草蒜油燒加拿大厚切保濕豬架(9oz）配蜜糖芥末醬，另外單點一杯Many Berry Smoothie~ 個豬架估唔到咁厚肉都可以燒到咁腍，食落仲係勁juicy，調味亦剛剛好惹味，忍唔住拎起條豬骨食乾淨佢，而店員都好細心，即刻遞上濕紙巾俾我😳 食肉獸朋友揀嘅燒紐西蘭特級肉眼扒都好正，我都切咗塊嚟試😋平時唔食太生嘅佢揀咗7成熟，但切開唔會太熟，仲係啖啖肉汁，好juicy😍要拿揑到熟得嚟仲係飽滿肉汁都唔係咁易，真心有d驚喜😚 兩款肉都份量十足，大大件，肉味濃厚。本身靚肉點少少鹽其實已經好好味，但醬汁淋上肉面同肉完美融合，又唔會搶咗個肉味，唔覺唔覺，成碟都撈哂嚟食🤣🤣🤣 我地加錢升級嘅配菜四重芝士薯條，上碟熱辣辣，夠哂脆口，而且佈滿好多芝士😆芝士迷一定要叫！啖啖芝味濃郁，食唔停口🤣大滿足呀！ 朋友跟餐另外仲有餐湯同紅菜頭沙律，個餐湯夠滑，帶淡淡煙燻味，鐘意食煙肉嘅朋友一啖接一啖，好快就見碗底🤣 誠意推介各位行花墟嘅朋友，可以嚟呢間餐廳！

酸菜魚食得多，原來最近香港開咗第一間台式酸菜魚！雖然佢哋嘅酸菜魚有小中大選擇，標榜「一個人去食都得」，但我同朋友都好鍾意食酸菜魚，我一搵腳同我食，就即刻有朋友報名喇！ 首先吸引我嘅係舖頭嘅風格，同傳統食酸菜魚嘅舖頭好唔同，設計走年青活力風格！為咗可以試多啲款，我哋叫咗兩個細嘅主菜，分別係經典嘅「極道酸菜魚」同埋「極道明太子奶香魚」～ 極道酸菜魚（小） 第一次嚟食，當然要試佢個招牌經典口味啦！雖然係細，但其實份量已經好足！酸菜同埋酸蘿蔔係店家自製，湯底酸度同辣度都啱啱好，而魚片係用烏鱧魚，肉質勁滑～ 極道明太子奶香魚（小） 店員推薦我哋另一款魚揀呢隻，湯底係牛奶、芝士同埋明太子，又香又邪惡！海鮮份量都好多，呢個和風夠晒特別！ 鬼摩酒蒸鮮沙白 用咗日本清酒同米酒兩種酒，成粒沙白肉都吸晒精華，好入味！ 鐵漢小酥肉 炸走肥五花肉，個麵衣好薄好脆，調味好正！ 椒鹽雞軟骨 雖然已經食到好飽，但食完個小酥肉都係唔夠喉，即刻再落單叫個雞軟骨～店員推介話用咗同平時雞軟骨唔同嘅軟骨部位去整，我同朋友都係第一次食咁大件嘅雞軟骨，真係好罕有，唔係度度有得食！ 檸檬冬瓜茶 食咁濃味嘅菜，當然要一人一杯凍飲啦～留意返佢真係有放檸檬片落去，仲要勁大杯，價錢仲平過出面手搖飲品店，超抵呀！ 值得一提係店員全部都好好人，會主動推介食物同埋問客人意見，另外雖然佢限食90分鐘，但用餐時間其實啱啱好～見到全晚座無虛席，就知道台式酸菜魚有幾大吸引力了！下次要嚟試埋其他味！

香港生活節奏急促，小店生存空間又窄，會用時間心機去煮嘅餐廳實在太少。今日專程坐車去上環呢間居酒屋🏮 明太子玉子燒 $98 一嚟就忍唔住點玉子燒，一款看似簡單，但其實好考功力嘅菜。其他餐廳甚至會用預製冷藏貨去奉客，冇晒蛋味，食落得個甜字。呢度個玉子燒中間仲保持到濕潤，上枱仲要熱辣辣，裡面啲明太子多到流出嚟，絕無偷工減料！又香又滑嘅玉子喺口腔內爆發，係我人生中食過最好食嘅玉子燒！ 炸蓮藕片$48 新鮮炸起嘅薄片，又係熱辣辣咁送上嚟，食到最後仲係好脆口，可惜我唔飲酒，送酒應該會更加正！ 生蠔煙肉卷$48 又係一碟熱到冒煙嘅菜，一上嚟聞到燒蠔味勁香！餐廳用咗大大隻廣島蠔，燒完都唔會變細隻，入口熱辣辣勁Juicy！ 免治雞肉軟骨棒 $58 店家自製嘅雞肉棒，唔係急凍貨，點住蛋黃嚟食，好有日本風味～啖啖肉夠晒滿足！ 醬油茄子 $68 六嚿賣相精美嘅茄子🍆吸滿晒醬油精華，個醬油送飯應該好正，但每一款食物都份量十足，唔食飯都食到好飽了！ 雖然有啲人覺得上菜慢，但當感受到佢嘅熱力就覺得等待係值得！每一道菜都即叫即整，熱到辣口🤣食落好溫暖～ 加上店內充滿氣氛嘅裝修同燈光，同健談嘅女老闆，好啱同朋友嚟吹水飲返杯，慢慢渡過一晚時光～朋友聚會實會推薦呢度！

行完荔枝角大型超市，被超市門口一間燒肉店吸引住，見到裡面用列車送餐咁得意，就同朋友衝咗入去食燒肉～ 套餐勁多選擇，眨吓眼，我哋就叫到成枱都係食物，首先當然係最吸引嘅和牛套餐啦！ ［1++韓牛日韓極上套餐］ 本來想要$288嘅300g，點知原來150g份量已經有咁多！ 呢個餐可以試勻晒1++韓牛前腿肉、宮崎A5和牛肉眼蓋、宮崎A4和牛三角腩，其中要特別介紹三角腩（又名肩胛小排），油脂分佈均衡，職員仲特別教路燒一燒、加少少鹽花，生生地咁食係最好食。 再散叫［宮崎A4和牛肩肉50g］，試勻晒所有和牛，每一款都好好食～ 根據以往經驗，我同朋友本身都擔心油花勁嘅和牛會好肥好漏，會好似食肥膏咁一味得個油字。點知呢度嘅宮崎和牛，油花分布啱啱好，入口甘香牛味，唔會俾d油脂搶晒味，簡直顛覆我哋對和牛嘅印象！朋友已經話下次要帶男朋友嚟再叫～ 成個set都好高級，墊底嘅肉係用紫蘇葉，紫蘇香氣同燒肉非常夾，大家可以考慮好似我咁食埋塊葉喎！ 另外我再叫咗我嘅最愛［薄牛舌100g］，平時去開嘅燒肉店，都係一塊好「彈牙」嘅肉片，呢度嘅牛舌真係食到濃郁肉味，又唔會咬極唔爛，正！ 雖然我哋仲叫咗生菜用嚟夾肉食，諗住夾菜冇咁肥膩，但因為啲肉太靚又唔會肥，最後啲菜就咁俾我空口食，每片菜都好新鮮好靚，完全唔澀，非常新鮮～ 飲品方面當然要試特別啲嘅，米漿飲係用韓國嘅玄米同大米製成，我之前都喺韓國餐廳叫過，收到貴一貴但得細細杯。Bingle Bingle大大支送上嚟，竟然都只係收$20，價錢真係非常合理！ 最後仲食埋個甜品雕魚燒，校細個爐火慢慢烤，烤到外脆內軟，正呀！ 每樣食材都好好食，侍應仲非常好服務，竟然仲不收加一，我同朋友已經周圍推介俾朋友，絕對會再嚟幫襯！希望開多ｄ分店啦～

今日天氣涼涼哋，最啱就係去打邊爐😂最近食過日式、台式同泰式火鍋，今日就決定去大鍋口食返個港式邊爐～ 一坐低，侍應就幫我哋斟豉油，同埋擺低咗一排配料俾我哋混醬，唔使我哋行出去醬料區😜 侍應問我哋要唔要食雞煲先，我哋就選擇直接開始打邊爐～我哋揀咗鯊魚骨猴頭菇湯底，一嚟到就飲咗碗湯先，奶白色嘅湯底好香好滑好補身🤣 邊爐當然先嚟食牛啦！肥牛賣相夠靚仔，仲識出煙😆食落去亦都好驚喜，充滿肥牛嘅鮮甜味～ 另外仲有網友大推嘅手切鮮牛，血色紅潤，睇佢好似好厚咁，其實食落口又滑又冇筋，充滿鮮牛香味，難怪係必點項目啦！ 再睇吓張點菜紙，剩係魚類都有咁多款，即刻每樣嚟一份先！日台火鍋比較多肉類選擇，但就好少有魚食，大鍋口除咗勁多魚揀，仲有平時邊爐少有嘅配菜，例如：鵪鶉蛋、海帶結、吊桶，同我通通嚟一份！ 海鮮類叫咗蝦、帶子、吊桶，全部都鮮嫩多汁，食材質素好高！仲有手打丸類都好鮮味～ 飲品方面都好多選擇，罐裝嘅、餐廳自己煲嘅應有盡有！ 服務亦都好好，上菜快，收碟快，加湯又快～阿姐仲勁有禮貌提返我哋落單要寫人數😂 港式邊爐總係有種無法取代嘅味道，而呢間平靚正嘅火鍋店，絕對值得再嚟品嘗！