良久沒有到荃灣區，碰巧昨日星期日假期，加上家中的人都早已經出外消遣。反正午餐都要在街外解決，唯有到荃灣看看。抵達荃灣沙咀道的時候，已經過左下午一點。由於天氣晴朗的關係，街上的行人比較多，由車內看到周遭食肆的生意亦特別旺場。其實在巴士車廂內，小弟曾經反覆地構思午餐地點，不過最後已經有答案。

曾經在雜誌內看過一篇介紹，有一間叫「豆腐主義」的豆品售賣專門店，坐落在荃灣區的中心地帶。其實店舖容易搵到，正好在沙咀道附近。

星期日的下午，食客人數特別多，豆腐主義都不例外。就現場所見，大部份前來光顧的食客以年青人居多。無論在食店的內外，都是那麼的熱鬧。店內固然有食客，店外正是售賣豆類製品，例如豆腐花、豆漿等等。

在評論店內食品之前，有一件事的確不吐不快。原來坐下來堂食，落單時都要大聲一點叫出來。原因是店外有一位女職員用咪高峰叫賣。本來宣傳及叫賣自家製產品是一件無可厚非的事情，但是咪高峰的聲量過大，再加上現場環境真是擠迫，店內的職員完全聽不到食客的柯打，要食客重複一次，當然包括小弟在內。這次落單蒸飯套餐定食，包括鹹魚肉片飯、紫菜豆腐湯、蠔油菜心和兩件煎釀豆腐。

鹹魚肉片飯 - 因為蒸飯不算大盅，所以進食時需要一點技巧。鹹魚切得比較薄身，可能和飯盅的大小有關。肉片痴埋一舊，要小心用筷子分開。雖然呢盅蒸飯沒有什麼驚喜俾我，但是豉油由食客自己落，總算留番些少印象分俾佢。

紫菜豆腐湯 - 雖然湯中的豆腐好滑溜，而紫菜份量都算多，但是發現湯本身有好多油浮晒上黎。

蠔油菜心 - 呢一碟菜心算係呢個套餐定食之中，做得最好的一環。灼菜時既保持到翠綠色，而且又有咬口，唔會灼得過淋。

煎釀豆腐 - 外表煎得金黃色，豆腐雖然切得較厚，但是食唔出明顯的豆味，鯪魚肉搽得比較薄。

有關的食店，已經採用了電腦落單系統。在水吧隔離有一個小型工場，那裡是製造豆腐卜和豆腐花的地方。包括豆腐卜和豆腐花在內，都是在工場內即場製造的。離開食店時，本來打算購買豆腐卜和炸枝竹回家。不過店員表示炸枝竹早已售罄，要翌日早上才有貨，結果只好購買四兩豆腐卜了事。

新鮮製造豆類食品，無可否認是這裡其中一大特色。而在現場亦看到門外店員，用咪高峰落力推銷產品。然而有關的舉動，特別是咪高峰過大的聲量，似乎又沒有理會到店內食客耳朵的感受。環境過份地嘈吵，的確會影響食客的情緒。所以希望有關的店員，請將咪高峰的聲量收細一點。

聽說店內的豆腐是師傅每日在店內新鮮製作,由於沒有運送途中撞爛的風險,豆腐中的石膏粉份量也自然減少,所以吃起來特別細滑.
1. 豆漿腸粉 ~ 有點心師傅即場拉製,很有新鮮感,入口也有豆香.
2. 煎釀黑豆腐 ~ 煎得兩面香脆,中間香滑富豆香,加上魚肉餡,並沒有單調感.

某日天時暑熱又唔想行廣場而且想食甜品，
見到呢間店舖成日有人講但自己又未試過，
不如去試下啦。聽侍應話豆腐布甸比較好食，
就叫左個香蕉豆腐布丁。質感唔似食緊豆腐，
香蕉反而又有幾塊，唔通所謂既豆味，
就已經融入左o係泡沫當中?!

18蚊呀.....去飲杯野都唔駛咁價錢啦。

我超級喜歡吃豆腐製品，於是朋友帶我去食豆腐主義，
今次是第二次啦!

這次我們兩個人吃了以下食物:
*上湯生菜豆卜
*豆漿腸粉
*椒鹽豆腐角
*豆漿蒸蛋
*豆漿
*紅豆豆漿 (這個比較淡，大家可試其他口味)
*煎釀豆腐豆卜雙併
*煎魚茸豆腐餅 (這個比較多油)
*脆口粢飯

豆漿六元，每款小食約十多元，
幾抵食，試好多款色都不"肉赤"，
整張桌子都放滿食物，感覺很滿足呢!
好吃又飽肚，
吃了這麼多都只是$81元!
食物多款，服務都不錯。

我想，愛烹飪的你們吃過"豆腐主義"後，
可以"偷師"，然後烹調一些具創意的豆腐菜餚 : )
若不下廚而又經過"豆腐主義"，都不妨外賣加餸，
下午茶﹑晚餐前有特價呢: )

突然有小小肚餓,左想右想不如食豆腐花..之後就行到豆腐主義
見到$8碗唔算太貴,就入左去食
地方係迫左小小,但等左唔係好內就見到我碗豆腐花
黑豆腐花...有好香芝麻味,個碗都好滿.好好味

之前已經係雜誌見過介紹豆腐主義~~
本身覺得佢好多野都係用豆腐整幾特別咁所以都食下!!
我覺得有時去食下豆腐花都還可以, 因為都平~~
但唔建議食炸物, 因為真係麻麻地, 唔係特別好食...
係就係抵食, 但無雜誌講到咁正..!!
所以有小小失望~~

香蕉豆漿杯$10:飲後香蕉豆漿有香蕉肉味汁,豆漿很淡麻麻~有香蕉肉粒ok~

sp:下次我會幫襯,因為我想試吃豆漿蒸蛋,豆腐燉奶,豆腐布丁,椒鹽豆腐~~

突然心血來潮想買杯野飲
見到呢間店好似d豆腐幾出名
心想..佢d豆漿應該都不差吧
於是就叫左杯紅豆mix豆漿$10杯
希望愈大失望愈大!!!
d豆漿淡如開水
d紅豆又硬...又冇味!!!
咬落去仲要係粉來的~~
一睇都知未煲夠時間啦....
唉..如此質素....我飲到一半已飲不下了
這間店是第一間我飲過最唔好飲的豆漿!

評題的一句話, 其實是想向我丈夫講嘅......

原因是今晚我和丈夫到荃灣行街街, 喺眾安街嗰頭食咗一餐又平又抵的晚餐, 飯後再向前行吓, 行吓行吓, 見到一間外型時尚,又黑又潮的豆腐鋪, 埸面車水馬龍, 我丈夫望望嗰牌, 佢寫住「豆腐花 $7碗, $10兩碗」, 丈夫二話不說衝咗入鋪, 我正想叫佢睇清楚喺唔喺for外賣先就已经唔見咗人。 入到去都有五、六枱客, 我見d價钱都算ok, 豆腐花$7碗, 薑汁豆花$9, 即撞豆花$25, 重有其他貨,但唔記得咁多。我叫咗個「西瓜豆腐燉豆漿」$18, 基本上我估到喺什麽味道, 因為之前煮飯都試過用豆付、豆漿、雞蛋蒸帶子肉(即是帶子蒸水蛋, 但我不用水而用豆漿另加少少豆腐), 我記得鮮味到無得弹, 難得飯煲無飯剩。

首先我的「西瓜豆腐燉豆漿」先到, 原來是豆腐燉豆漿上淋上"所謂的" "假甜到死"的 西瓜汁和四粒西瓜波, 食一啖原味豆腐燉豆漿, 吓！無味嘅???,不只是一點豆味也沒有是直情無味, 拌混來吃, 根本西瓜汁和無味糕是合不來的, 還在脷根處帶出一啖一啖的苦味
後來丈夫的薑汁豆花到了, 糖要自已落, 可是"所謂"薑汁, 我相信不是新鮮揸出來的, 是現成一樽樽買的, 因為很黄及質地"杰撻撻", 帶有辣及苦味。 我自己煮飯時也揸過薑汁, 它們都是水水的及有少少粗糙感, 正如生磨washabi 及普通壽司店一小包一小包的washabi 分別。 豆花同樣是沒有豆味。真是由背脊骨落, 足足浪費了$27。

最後,我只好向丈夫說:「幸運之神是不會永遠眷顧我地！」

第一站，幾經辛苦先o係楊屋道果邊搵到呢一間!!~
一行到去，佢個店面係用黑色做主色，感覺好in 咁~
但門口d店員用mic sell 豆腐，太大聲，重要冇停過，真係耳仔受罪！

一入去，會有店員問幾多位，唔似其他咁你有你搵位，你叫佢先行埋黎~
我地3人share︰

煎釀黑豆腐($10)︰我乜野醬都唔加，食左一啖，果然係豆腐，冇乜味，最慘佢連少少咸味都冇......得個實字~

:煎釀豆卜($8)︰真係好失敗！！！係un架lor！d油又係咁滴，個嘴好似飲油咁！個賣相先搞笑，好似chocolate咁一粒一粒相連咁！佢同煎釀黑豆腐都係冇味可言~

煎釀琵琶豆腐($10)︰呢個得呀！佢個味岩岩好，而且係有咬感，唔係只係食粉漿咁~為左呢個，如果有機會去，只order呢個！

油豆腐粉絲湯($18)︰請真，$18呢個價，佢可以多番少少菜 / 粉絲，湯就好大碗，不過味道可以~

其實我真係有d失望，成一年前睇openrice後好想去食，但今日試完，真係唉...不提也擺~

原先打算去肥媽車仔麵,不過要搵,但個肚又不停叫,終於忍唔住.

一間主打乜都係豆腐專門店,時尚的門面及裝潢,的確比起一般豆腐舖吸引得多.

簡約的擺設,空氣中灕漫著黃豆的香味,細看餐牌,的確化身成各種不一的食品或飲品.

麻辣豆卜 : ($10)自己想試多幾款,一碟六件要十蚊都幾貴,鹵水同麻辣各一半,即係各三件,但放上檯時明明是麻辣豆卜,眼前是一碟豆腐,唔通我真係咁都唔識分,仲要再三講多幾次先比返啱,而由於麻辣豆卜不足,先上檯的明顯浸得好耐,已經變得色澤深沉,及後的一件是淺色得多.

先講麻辣味,豆卜吸收大量麻辣汁,辣是足夠,但麻味不足,至少我的咀唇唔多覺麻痺.鹵水豆卜真係唔得,由於汁太多,所以變得好咸,好難食,仲要咁既價錢,唔值.

油豆腐粉絲湯 : ($18)一個我認為合理既小食,黃芽白的豬骨湯底夠鮮甜,再加上釀豆腐及釀豆卜,認真之餘,味道居然不錯,主角之一~~~粉絲亦相對地吸取湯汁之後變得冶味多了.

豆漿 + 四寶 : ($19)考立名目搵飯食,明明煎釀三寶變奏版,包括:煎魚茸豆腐餅,煎釀豆卜,煎釀豆腐及煎釀黑豆豆腐, 味道幾款都差不多,早知真係食三寶都仲有青椒,紅腸吖!

比門面呃晒,其實係一間門面好靚既豆腐舖,唯一唔同係貴.

　　下午跟友人路經位於街市中的豆腐主義，愛吃豆腐的我提議入內一試，於是晚上就在這小店中用膳。想不到一片吵鬧的街市中竟然有裝潢不俗的食店，我尤其喜歡鏡面牆身的設計，有美感。本想讚讚店內環境，但正想坐下時，竟發現椅子滿佈油漬，桌子亦如是，喚了店內的姐姐好一陣子才得到回應，旁邊沒有人的桌子亦有油漬，衛生情況不算太理想。

　　MENU中的大多是小食，於是我和其餘兩位友人都選擇了套餐。$34，豆腐火腩飯、配豆漿或豆腐花、菜心或生菜及煎釀豆腐四件。若除去了蓋在煎釀豆腐表面的餡料，這跟普通蒸豆腐沒太大分別。吃不出煎應有的香味，但有豆味，可以接受。火腩飯的菜汁不錯，用作拌飯十分美味，豆腐味道一般，豆味不如煎釀豆腐的濃。

　　價錢來說相當廉宜，而且份量不少，我吃了半碗飯就已經很飽，所以十分抵食。不想多費金錢又不願待薄肚子的時候可以選擇此店。

同朋友係楊屋道打完波諗住食LUNCH, 嘉樂又排長龍,
小出荃灣既朋友建議食特別D 既野食....咁就出事啦!
行下行下見到呢間豆腐主義勁多師奶係度買豆腐, 入邊又坐好多人,
諗住食下豆腐清清地都好啦,
根本都唔會個一會事,
所謂既豆腐...其實同煎讓三寶無分別, 只不過係無左茄子青皮椒你簡, 淨係得炸豆腐( 仲衰..)
炸到油淋淋...點健康法?
講真我食唔太多豆味, 四舊炸豆腐無咩分別, 好似食緊舊油咁...

價錢平? 煎讓三寶大多6-7蚊4舊, 佢就10蚊4舊, 魚肉又小講平唔係平...
環境?....更加唔好講, 同街市豆腐檔差不多,
如果唔係朋友想試我先唔會入泥...

想健康...m 記可能仲好..

今日同朋友行街既時間見肚餓,見到呢間出名主打用豆腐做主食好似幾健康,所以入左去食

2個人叫左個煎魚茸豆腐餅,椒鹽豆腐角,黑白豆漿同埋2個碗仔翅豆腐花

煎魚茸豆腐餅-真係要加左d辣醬先夠好味囉

椒鹽豆腐角-唔夠味....勁淡

碗仔翅豆腐花-食落好奇怪,味道一般

黑豆漿都ok,但白豆漿就好似維他奶咁........

埋單每人都係三十幾蚊
總結黎講d野好淡,唔夠味

終於一試lee間之前好出名o既豆腐主義
佢基本上係主打豆類製品, 以健康食材為大前提
overall口味係偏啖, 不過清清腸胃都唔錯

黑豆花, 層次俾一般豆花為高, 我所指o既層次係佢真係一層一層咁, 好似d梯田一樣, 唔會一攪就散開~~~ 其實我覺得lee個黑豆花似芝麻類o個d多少少, 可能黑豆味唔夠重, 得個色多d!!!

咸豆漿, 佢個形態係半liquid半solid咁, 都幾得意, 面層有少少油條, 咸咸地咁, 幾好味, 不過熱d會更好

佢lee度有得order"二寶" or "四寶", 其實佢d豆腐類小食揀幾款o既combination!!! 不過之前miss左, 所以order左2款豆腐小食 每碟4舊!!!

煎魚茸豆腐餅, 好似酒樓食o個d魚餅咁, 不過我相信佢加左d豆腐入去, 魚肉相對較少, 都ok o既, 不過油多左少少, 同埋塊餅太薄唔夠咬口, 可以整成細塊d, 不過厚d可能會更好

煎紅菜頭豆腐, 之前想order煎黑豆腐o既, 可惜已經售罄, 嘩..咁好賣o既......... .於是order另一款啦~~~ 貴過煎黑豆腐$2...................其實個樣就幾靚, 不過食落分別不大, 其實唔知係咩o黎o既添~~~

umm........行過試食當然無坊, 不過專登去試食的話就會覺得有d失望~~~ 反而有時另一間出名o既豆腐鋪, 佢地d煎豆腐更合我胃口啊~~~真係各花入各眼啦~