SEAMART (已搬遷) 新店位置

見過幾本雜誌介紹，星期五終於約左幾個朋友試試佢個海鮮火鍋！早一晚打電話去訂四人餐，放工唔洗周圍撲去買餸就可以喺屋企打邊爐都唔錯。加左錢轉做花甲蟹湯底，兩樣都好鮮甜我地個個食唔停口，蟹預先切好左所以好容易食。自選配菜揀左牛肉汁(都幾大枝) 、蒜蓉、蔥花、菠菜麵同稻庭烏冬(好好食)！個湯底本身好夠味再加埋啲蟹(個餐另外有三隻細啲嘅蟹+一隻麵包蟹) 其實唔洗落其他調味料。另一個重點係好爽甜嘅象拔蚌刺身，下次唔打邊爐都可以考慮下齋買一條番屋企食！四人餐份量都幾多最後我地五個人都係食唔哂，有啲料食之前擺左入雪櫃都無拎出黎。整體黎講好滿意一定會再order！