影片
更多
2014-03-21
6217 瀏覽
二姨媽移居美國多年，回港次數不甚頻密，碰巧農曆新年與家人同遊日本，回程時就順經香港並逗留數週，與一眾親友相聚。二姨媽喺中肥哥哥個契媽，亦係小肥寄宿時代o既監護人，關係非常密切，多年來即使分隔兩地，大家感情仍然要好，經常有書信來往，其中姨媽姨丈最愛閱讀細佬喺openrice刊登之食評作品，故此今次回港前已決定好要盡量嚐試一啲佢地未曾去過o既餐廳；大肥爸爸聞訊即第一時間推介我地一家四口最喜愛o既韓國燒烤「秘苑韓國料理」。「秘苑」地點其實幾隱蔽，光顧o既客人大多以韓國人為主，如果唔係因為有Auntie介紹，真係唔知金鐘有間咁正o既韓式燒烤店。「秘苑」身處於o既美國銀行中心離金鐘巴士總站唔遠，位於中環地鐡站及金鐘地鐡站中間，喺兩個地鐡站落車都只需要行大約五分鐘，附近又有小巴站、電車站，門口仲有個的士站添，交通方便得很！餐廳地方都幾大，有兩間好光猛o既廂房，廂房坐六個人最舒服；大廳就有十幾張散枱，全為卡位，每張最多坐四個人，人多就要分開坐，又或者要坐房；如果一行八人想一齊坐，又冇房，大家不妨提出坐餐廳正門隔壁間開咗o既兩組四人卡位，雖然嗰一角較暗，不過就多少少私人空間。小肥好少食韓國餐，因為最怕
「秘苑」地點其實幾隱蔽，光顧o既客人大多以韓國人為主，如果唔係因為有Auntie介紹，真係唔知金鐘有間咁正o既韓式燒烤店。「秘苑」身處於o既美國銀行中心離金鐘巴士總站唔遠，位於中環地鐡站及金鐘地鐡站中間，喺兩個地鐡站落車都只需要行大約五分鐘，附近又有小巴站、電車站，門口仲有個的士站添，交通方便得很！餐廳地方都幾大，有兩間好光猛o既廂房，廂房坐六個人最舒服；大廳就有十幾張散枱，全為卡位，每張最多坐四個人，人多就要分開坐，又或者要坐房；如果一行八人想一齊坐，又冇房，大家不妨提出坐餐廳正門隔壁間開咗o既兩組四人卡位，雖然嗰一角較暗，不過就多少少私人空間。
小肥好少食韓國餐，因為最怕食完成身一陣油煙味；「秘苑」喺抽氣方面做得算唔錯，起碼餐廳門口都未聞到燒烤味，坐房仲有圍裙用添。
如果客人有要求，所有烤製食物更可由廚房代燒，因此肥肥家族都唔係好抗拒，幫襯完一次又一次。大肥最唔鍾意食涷咗o既食物，故此我地每次去都係由媽咪負責燒，亦因而得知餐廳嗰啲姐姐仔們對燒烤爐好講究，每燒一陣佢地就會自動幫我地換燒烤盤，絕對唔會有燒燶食物o既情況發生，好衛生。除此之外，因燒製不同食物時所用o既火力不一，姐姐仔都會不時幫我地調高或調低火力；見食客手忙腳亂之際更會幫忙燒食物，服務認真細心體貼。礙於小弟有感韓籍女經理有性別歧視之嫌，佢好明顯對女性食客態度不及對男賓客客氣，所以就扣咗一分服務分。我地一年都會黎「秘苑」幾次，所叫o既食物都離不開生牛肉，燒烤牛肋骨、牛脷、煙肉等。每次落完單，姐姐仔都會先送上多款韓式小碟，如果有任何小碟唔啱口味，可以喺姐姐仔未放下食物之前同佢講，佢會換過幾碟。
韓燒小碟之炸魚餅：大肥爸爸同媽咪二口同聲都話煙煙韌韌o既炸魚餅要放喺燒烤爐上輕輕燒過先好食，因為熱食層皮會變得脆啲，食落又會香口好多。
韓燒小碟之芽菜：小肥怕食菜已經係街知巷聞o既事，所以好奇怪，對於「秘苑」多款用菜所製o既小碟，細佬不但冇反感，更可以話係食得津津有味！芽菜細細條，易入口，而且爽脆清甜，正呀！
韓燒小碟之泡菜：泡菜辣得黎唔會麻，啲菜又唔會腍pat pat，濕得黎依然爽脆，夾埋烤煙肉或者係烤牛肋骨一齊食簡直係冇得彈呀！講真小肥食過好多唔同牌子o既泡菜，不過真係冇一隻及得上秘苑嗰碟咁好味！
生牛肉：經醃製過o既韓式生牛肉麻油味香濃，質感滑得黎食落又唔會話好油，撈入爽甜o既梨絲同脆辣o既蒜絲，集香脆爽甜野味於一身，大小雙肥勁鍾意食！
白切豬肉包心菜（大$250；小200）：此道白切豬肉包心菜乃家中三姨媽最愛吃之秘苑菜式也！雖然睇唔到有醬汁，但係半肥瘦o既白切豬肉本身已經有味，肉質亦一啲都唔乾，用西生菜包住，再夾上泡菜一齊食，感覺好似食三文治咁，幾得意！
烤牛脷（$130）：超薄o既牛脷夠爽脆，點上秘苑以麻油同鹽調製o既醬汁非常香口。大家要注意，牛脷好薄，所以好快熟，建議大家唔好一次過放哂成碟喺爐度燒，要食一件先燒一件，唔係好易燶，食時唔夠熱。
烤煙肉（$150）：媽咪話煙肉要用慢火燒，時間雖然會長少少，不過先可以確保豬肉熟透，外層又唔會過燶，同時又可以鎖住肉汁。唔知同媽咪o既超卓廚藝有冇關呢，半肥瘦o既烤煙肉外層香脆，內層肉質軟熟肉汁足，連小朋友都食到嗦嗦聲，仲話要encore添！
烤牛肋骨（$180）：肥肥家族一家都係牛魔王，肉類中最愛吃牛肉，黎過秘苑咁多次，食過佢地不同牛肉菜式中，可以話比大家聽大家只需食佢地個烤牛肋骨就夠哂數，真係絕對唔洗嘥彈藥食其他牛o既部位或牛肋骨o既煮法。每叫一份烤牛肋骨，姐姐仔都會連剪刀上，供食客自行將牛肋骨剪成一件件；當然，食客亦可要求姐姐仔代剪。牛肋骨肉質鬆軟，甜甜o既調味醬濃得黎唔會過火，連同泡菜一齊食，送白飯一流！
秘苑地點方便，餐廳地方大而企理，抽氣做得唔錯，感覺都好衛生。大部份服務生態度誠懇落力，對燒烤過程及爐具亦好講究，最重要係食物高質美味，所以就算價錢略為偏高，肥肥家族都繼續幫襯。眼見秘苑成日都唔係好滿座，XO仔真係好想建議餐廳調低價格，或推廣較抵食o既套餐，吸引吓本地食客。張貼
