利寶閣 (已結業)

呢間係我短期內最快返兜既食肆, 因為上次同一班朋友食完 (個餐冇影相), 真係好回味, 尤其是訂左一隻乳豬 - 皮脆肉嫩, 個4隻豬腳仔先係珍品~ 個晚食得太開心, 所以朋友邀約食飯, 我即刻提議黎呢到食啦, 又可以試下其他菜式!2個人可以叫既唔多, 不過我地2個都冇理, 想食咩就食咩, 唔理食唔食得晒~ 一碟叉燒, 一個蟹砵, 一個菜加一個糯米飯, 呵呵, 點可能食得晒呀~叉燒好食, 落左過多既蜜糖, 甜到不得了, 不過上檯都仲少少暖, 咁就真係幾吸引! 菜係上湯什箘鮮腐竹浸菜, 一個鍋又咁多樣野食, 我最鐘意係鮮腐竹同豆腐, 好滑。個蟹砵係精粹, 個砵頭唔係大個, 不過蟹既精華入晒落去, 蛋汁都唔多, 佢基本上係 "屈" 左隻蟹係入面, 之後已經冇多餘既位置, 咁蒸出黎, 又食到蟹肉, 又唔過火, 又有蛋香, 呢個真係好~ 秋冬天當然想食糯米飯, 真係用左幾多時間黎炒, 都幾粒粒分明, 臘腸多, 料足, 好味! 當然我地2個人係唔會食得晒啦, 佢今日就成為左我既午餐啦~我仲未試佢個煲仔飯餐, 睇黎可以再去多一次, 呵呵~