平時去屯市，多數係食壽司郎或者拉麵，上星期無意中發現有天丼天婦羅，上次因為落場時間，所以冇緣食。今日終於有機會食喇。 11點半去到，岩岩開門，唔駛等位，即刻可以入座。餐牌大約有8款天丼選擇，另外仲有幾款定食。我地一心想食天丼，所以毫不猶豫揀左巨星天丼。有虎蝦，帆立貝，紫菜，菇，魷魚，蟹柳各一，仲有兩條四季豆。店內已張貼告示，天婦羅即叫即炸，所以需要等15-20分鐘。落左單後計，真係剛剛等左20分鐘就到。賣相豐富，初初以為飯會比較少，但食完都好夠飽。不過汁略為少，枱上有天婦羅汁，可以自己添加。各款炸物都好新鮮，特別係虎蝦，口感爽口彈牙，炸漿岩岩好，唔會好厚，完全食到虎蝦鮮味。魷魚就比較遜色，太淋，冇乜特別。如果想食平價天婦羅丼飯，呢間值得推介，$100唔駛就可以食到天婦羅。

疫情以黎，都少左出街食飯。難得去尖沙咀，又掛住台灣美食，就求其搵間台灣小店醫肚。 呢間店舖雖然細細，但總算坐得舒服。叫左碗招牌紅燒牛肉麵，提提大家，需要自行到cashier落單，直接俾埋錢。 牛肉麵一到，先呷一啖湯，好濃既紅燒牛肉湯底，肥而不膩。牛腩同牛筋比例好好，牛筋唔會太淋，有咬口。牛腩夠入味，肉質嫩滑。除左牛腩同牛筋，仲有紅白蘿蔔，蘿蔔清甜，唔會太味精。 大家去開尖沙咀，不妨試下，價錢合理，用心之作。

甚少在香港吃鰻魚的我，今次都被這間日本過江龍的備長炭鰻魚專門店吸引前來。 大約中午1:30到達，已經有十多個人在排隊中，幸好也不算太多人，等了半小時左右便可入座了！ 舖內座位都算多，眼見仍有座位未有客人坐下，應該是廚房應付不來，所以未有安排門外排隊的客人入座。 等待座位期間，已經決定了吃那一款鰻魚飯，所以很快便可以落單了。 我們點選了兩客鰻魚重上、蒸蛋、鰻魚肝湯。 落單後，店員都有告訴我們需要等20-30分鐘。等了20分鐘，先來蒸蛋，再等多10分鐘，便有鰻魚肝湯，最後等到40分鐘，主角終於來了。 蛋蒸得很嫩滑，想不到蛋入面的鰻魚也很大塊。 鰻魚肝很爽口彈牙，還有一條幼細的柚子絲在湯內，味道很正宗，跟日本喝的一樣。 等了40分鐘，急不及待要馬上品嘗！ 鰻魚香脆內軟，雖然沒有炭的味道，但燒得很脆，略嫌鰻魚本身不夠肥美。整個飯的精粹在於鰻魚汁，配上白飯實在令人回味無窮！鰻魚近尾部位置的骨較多和偏硬，進食時小心一點。 以這個價錢能夠品嘗超水準的鰻魚飯，實在可以覆桌。但建議如果趕時間的話，便不適宜前來。不是因為等位太長時間，而是等吃的時間太長。

見到唔少廣告介紹呢間由台灣藝人納豆開既珍珠奶茶店，而且仲要荃灣區，好少過江龍會揀新界地方開分店，所以趁今日放假就黎試下。 可能今日唔係假期，所以都唔算好多人。叫左一杯招牌飲品，豹紋黑糖珍奶！ 等左大約20分鐘就有，一攞上手，杯底珍珠熱，珍珠上面既鮮奶凍，店員教我地先要用飲管拌勻。黑糖味好突出，而且店舖注明使用日本明治奶，可能因為咁，媽奶味濃郁。雖然比一般珍珠奶茶偏甜，但都好好味！一個人飲一整杯會比較漏，建議男女朋友可share 。

喺新宿食過一次，一試難忘！除左一蘭，呢間係第二間過江龍拉麵店我會願意花時間排隊。 中午1點去到，等左40分鐘，終於有位。好彩今日天氣唔算太熱，所以等40分鐘都可以。排隊期間，職員已經俾定紙仔我地填。 口味除左原味蝦湯，仲可以要豚骨，不過本人覺得原味先可以食到蝦湯既精髓。 入到去第一個感覺係冷氣好足夠，夏天食拉麵如果唔夠冷氣會好辛苦。而且座位好寬敞，一啲都唔迫，坐得好舒服。 同男友一人一碗拉麵，再加一個蝦飯糰。 我揀左原味蝦油鹽味粗麵。 拉麵一到，影完相之後，第一件事當然係飲啖湯啦。如果未去過日本分店食，會覺得湯底好濃，蝦味好突出。但如果有比較之下，就一定覺得日本湯底濃味好多。 麵質方面，都有3款，我揀左粗麵，因為我自己比較鍾意食有質感既拉麵。每一條粗麵都非常彈牙，又唔會太淋，軟硬適中。 香港分店限定蝦味飯糰，一場黎到點都要試下。 建議先食飯糰，後食拉麵。咁樣一來包住飯糰塊紫菜唔會因為接觸空氣太耐而淋左，二來食完拉麵飲完湯，口腔已經充滿濃烈蝦味，再食飯糰，就試唔真飯糰既蝦味道。 店內職員都好好禮貌，如果未試過既朋友，都不妨一試！

上個月特登黎食，點知冇開門，今日終於食到喇，好開心！ 同男友7:30黎到，唔駛等位，可能平日關係，入面座位唔多，order 枱有12個位，再加bar枱4個位，如果假期想食，真係要早啲黎。 我地要左一個三色海膽飯，同埋刺身飯。 主菜未到，先有一碗海澡湯，同埋一片煙薰芝士，老闆娘仲好細心叫我地食左芝士先飲湯。 好快就到主角出場，非常期待！！ 海膽舖滿飯面，再加生蛋黃，撈生蛋黃我都係第一次食。可能我覺得海膽夠新鮮，所以唔撈生蛋黃我已經覺得超正！三款海膽，最鮮甜係深橙色，自從喺北海道涵館食過海膽後，呢度既海膽真係拍得住。 刺身飯有牡丹蝦，吞拿魚腩，海膽，油甘魚，魚子，鮮甜不在話，仲要每件切身都係厚切，每一啖都好有口感。 能夠喺屯門有一間咁高水準既日本丼飯舖頭，真係難得，單睇價錢，會覺得貴，但以食物質素黎講，一啲都唔貴。

未夠12點就去到，唔駛等位，坐低一陣就開始多人。 食物款式唔算好多，我地叫左四喜烤夫，生煎包4隻，炸排骨菜飯。 好入味既四喜烤夫，每一件都入晒味，仲有雲耳，紅棗，冬菇。兩個人當小食，份量岩岩好。 黎到冇理由唔食生煎包，有2件同4件揀。包皮算滑，唔會太厚，而且煎得脆口。包內肉汁豐富，所以要小心咬開後，啜晒入面既湯汁，先再慢慢食。 炸排骨一般，味道偏甜，唔夠脆口。但菜飯幾好味，飯一粒粒，唔會太黏口。而且菜既比例都好多，每一啖都有菜。 店內座位都算寬敞，唔會好迫，唯一不足係冷氣唔夠，一路食，一路流汗。

好耐冇去過荃昌中心搵食，原來已經開左咁多食肆，有日本野，小食檔，米線等等。 見到有間食all day breakfast，細細間舖，得6張枱，咁岩有位，所以入去試下。 枱上面有點餐紙，自己有填選野食同飲品。我地要左egg benedit同carbonara，飲品揀左凍mocha同香蕉奶昔。 egg benedit 既流心蛋唔夠流心，中間蛋黃有啲熟。荷蘭醬味道唔錯，唔會俾醋味蓋過。反而透明杯裝住既沙律菜有驚喜，菜新鮮，而且有芥辣味既柚子醋好開胃，好岩夏天食！煙肉煎得好香口，唔會太硬。 Carbonara 意粉味道一般，忌廉唔夠，而且意粉太淋，冇口感。蒜蓉包應該焗左一段時間，因為已經唔脆，加上淋身。 兩杯飲品配餐，只需半價就有。如果以原價四十幾蚊，呢個水準就唔值。

今日特登同男友去西環試，其實都預左要排隊，不過咁熱天氣排隊，真係好辛苦，但食完後覺得唔值得排隊。 我地各要左一個餐，吉列豬扒濃豬骨湯意粉，配炒蛋方包。另一個係牛尾蕃茄湯通粉，配黑松露炒蛋方包。 意粉份量少到嚇親，完全覺得係人地食剩俾我。如果要俾四十幾蚊，但得到既係呢個份量，一啲都唔值。吉列豬扒好“鞋”，根本唔想放入口。 唯一讚賞既係咖啡同鴛鴦，可能用十字牌沖既關係，所以奶味好香！ 未食之前都有啲期望，點知比想像中仲要差。另外，成間餐廳完全唔夠冷氣，一路食，一路流汗，好似條街仲涼過間舖入面。

今晚男友突然想食咖喱，記得銅鑼灣角落位有一間咖喱店，所以試下。 可能時間仲早，店內只有一枱客，所以唔駛等位。 我要了一個甜而不辣配炸豚肉飯，所謂既甜而不辣，就係蕃茄醬，不過個人認為蕃茄味不夠，而且炸豚肉不夠鬆脆，肉汁不夠。 另外叫左一客餃子配柚子醋，唔知點解柚子醋有好多油浮面，醮完柚子醋放餃子落口，成口都係油。 而家做緊promotion，5點後啤酒買一送一，都幾抵，而目星期六日都有優惠。 店內冷氣唔係好夠，未開始食，已經覺得焗，食食下仲更加熱，好彩有啤酒飲下。