滂沱大雨既今天, 為咗食餐好既我哋同事們無懼風雨來到魚一.  感恩兩層既餐廳座位頗多, 不用等位就安排在樓上雅座.  午市定食選擇多, 最後揀定壽司竹(炙燒), 喜歡佢全部都是炙燒食得較安心.  整個定食包括: (但無逐一影相)
~ 三文魚麵豉湯:  剩下既三文魚邊不浪費, 加在麵豉湯與白蘿蔔及豆腐同煮即帶出鮮甜味,  ~ 沙律菜配胡麻醬:  沙律菜新鮮, 配胡麻醬開胃 ~ 日式茶杯(碗)蒸: 因為用比碗高身既茶杯, 滑溜蒸蛋肉有冬菇/素翅/蟹柳
~ 炙燒壽司: 三文魚2件/松葉蟹柳/熟蝦/加洲卷2件/鰻魚(穴子)/帶子/牛肉/左口魚, 不是簡單既炙燒, 是有加調味/香蔥/乾蒜粒, 每款都好夠味不用加Wasabi也可以.   欣賞鰻魚(穴子)肉質有些嚼口, 不會太軟, 另有較特別既左口魚入口即溶.   唯一是牛肉較遜色, 沒有燒牛肉香味.
以午市$98不加一有這個套餐性價比頗高.

木系風格，和風小店定食，我每次去日本都喜歡到古村町屋享用這類型餐館。今日初次去南豐紗廠發現餐廳多的是，但就偏被這Book餐廳吸引一解思鄉愁。店舖樓底高，一半係書店，一半係餐廳，所以座位唔多也擠迫，勝在食物補回分數。 腐乳炸雞-雖不是和風，但份量夠，即叫即炸，上枱時熱辣辣，粉薄不油膩，不過腐乳味不足。 招牌五品定食-帶著日本町屋既影子，喜歡其健康食材，每件看似細細件，但有飯/薯蓉/麵包都好飽肚。先來麵豉昆布湯，有一個腐皮褔袋，藏著香菇/甘荀/山藥/年糕，很驚喜。 - 脆蓮藕伴芝麻菜: 芝麻菜獨特味道配蓮藕既清甜爽脆很夾 - 櫻花蝦玉子: 玉子軟熟，但櫻花蝦較細道唔突出 - 白色飯糰: 白米粒粒煙韌混了類似藜麥脆卜卜，飯糰微暖有調味唔單調 - 炸蘿蔔: 這款只睇外表以為係薯仔，原來係外脆內juicy既炸蘿蔔，好清甜，新鮮紫蘇葉味道中和炸物油膩 - 脆多士: 黑麥多士不硬很脆，鋪上香菇茄子蓉，還有2粒酸豆，很健康 - 薯蓉: 不知是否黃薑粉帶來既鮮黃色，薯蓉含薯粒有咬口，還配有和風味既糖漬甜栗及黑豆 飲品選了cold brew, 不過杯裡有一大舊冰，餐廳冷氣已很凍，再加大舊冰就更凍，我更不想咖啡被冰沖淡所以拿走了冰，點知剩回1/3杯份量，幸好咖啡夠香濃。 溫馨提示: 店內冷氣太凍要預備外套，繁忙時間上菜較慢

灣仔有幾間越南湯粉, 但以全牛打造既就寥寥可數.  這間餐廳外貌似日式菜, 因為原址是日本咖喱飯, 相信是同一集團, 但改造成和牛越南湯河店.   餐廳內座位不多, 我們1行6人已佔了半間店, 店員殷勤地為我們調動食客拼出6人枱.  餐牌上9成都是牛,牛,牛.....全部都是牛, 令我們一班牛魔王很期待, 每款材料都差不多, 只是你想大滿足地試晒全部牛, 還是小試牛刀.   價格不是相差太遠, 更係一次過大滿足啦.   餘下1成食品就是季節限定 "鴨絲湯粉", 不過當天未能供應.  另外還有其他不是牛肉既小食.  
大滿足全配料牛肉河包括: 半生熟安格斯板腱牛肉、澳洲牛肉丸、慢煮牛肉條、蘿蔔粒 $98.  牛肉湯底色澤深啡, 清而不油, 湯頭帶有蔬菜, 蘿蔔及牛骨既甜味, 嘴唇還沾有膠質顯出湯頭充滿牛肉精華.   安格斯板腱牛肉是半生熟, 就算浸在湯內耐了仍很嬾滑.   慢煮牛肉條像牛𦟌很入味, 夠厚身夠軟綿, 很驚喜.  不要少看牛肉丸, 來自澳洲的, 充滿牛味, 質地像食牛肉有嚼勁, 不像港式牛丸般彈牙/結實.   至於店員推介既河粉比金邊粉粗一些很滑溜, .
招牌春園春卷 $36, 即叫即炸新鮮鬆脆, 滿滿的包有豬肉, 木耳, 粉絲及甘荀. 蒜蓉牛油雞翼 $36, 比春卷更突出, 看不到但食得出濃郁蒜香, 粉薄, 雞翼大隻. 又是即叫即炸很回味.

是晚又來佐敦振興經濟, 帶著要求多多既老爸去食飯真不容易, 老爸最愛食海南雞飯小炒,  除了好味仲要抵食, 在店外驟眼只睇價錢同餐牌多款小菜已合佢心意, 再轉眼見到吊在門面既幾隻肥嘟嘟海南雞 , 一個箭步衝入去開飯啦...........   餐牌加埋牆上手寫菜牌, 有多款小食, 碟頭飯及小炒選擇, 價錢大部份都係$28, $38, $68, $88, 最貴都係星斑$198, 一行幾人食多幾款都好實惠. 欣賞小店做街坊生意, 就算你係一支公來食個碟頭飯都係$38, 份量唔小又真材實料, 真係益街坊, 所以就算最近市道差, 但店內仍然座無虛席.   $38海南雞飯餐, 老爸讚不絶口, 誠意製作絶無將貨就價, 無骨雞肉有雞味, 浸過冰水既雞皮下有啫喱又爽脆.  油飯帶有香茅味, 原來不只白米咁簡單, 是溝了糯米, 所以口感煙韌, 有點像香芒糯米飯.   而餐湯內黃豆也無味精.  小炒又點少得海鮮, 以香港仔煮法- 白灼/椒鹽/豉椒炒任客選擇:
- 蜆更係豉椒炒先惹味, 新鮮乾淨無砂, 只得1隻無開殼, 豉椒汁辣味適中, 連配菜既甜椒洋蔥都沾鋪豉汁.
- 椒鹽鮑魚, 粉漿薄而香脆, 鮑魚夠軟身, 廚師細心地一開二更容易入口, 令我期待下次來要試椒鹽鮮魷/九肚魚.
- 白灼東風螺, 必備甜醬辣醬, 十足少時在香港仔食既風味, $38份量頗多. - 菠蘿咕嚕肉, 似是豬扒肥膏少啖啖肉, 酸甜汁卦汁很開胃, 佐飯最佳. - 蒜蓉炒豆苗, 鑊氣夠油份少, 菜苗翠綠不黃, $58真心抵食, 大排檔都不止這價錢. 兩款原盅杏汁湯, 相同杏汁湯底, 杏仁味極濃, 沙沙地口感尤如加了鹽既即磨杏仁茶.  花膠本身味淡, 質地偏結實不黏口;  反而豬肺較出色, 口感脆脆. 最後加插一大碗海蟹魚茸粥, 即叫即煮所以都要些時間等候, 但值得換來一整隻花蟹, 雖是小蟹, 但肉質鮮甜;  白色魚茸為粥底增添海鮮味, 粥底夠棉不是水汪汪, 粥內更加有幼幼既薑絲驅寒僻腥. 欣賞廚師無味精但又做到原汁原味, 經濟實惠有冷氣做到大排檔風味, 仲要無加一, 讚! 

平日於灣仔區有不少西餐廳提供SET LUNCH, 以意大利餐廳居多, 價格介乎$120-180.  如果想品嚐法國菜又附合這個價位又唔想忽忽忙忙, 可以到這小店慢嘆午餐, 你一定會發現驚喜, 因為不會因應午餐收費而隨便製作, 從每道菜中既配菜及味道配搭, 你可發現廚師既心思和對食物既要求. 餐廳座位不多但不會枱連枱, 仍留些微空間感.  $168包括3道菜午餐, 由頭盤, 主菜及甜品都有3款以上既選擇, 感覺已經好豐富.  牆上放滿很多品種既酒, 所以午餐都能以價惠價$68享受一杯酒.   像我們不喝酒的不打緊, 餐廳也會提供tap water. 麵包有兩款, 較特別是紅莓合核包, 與我喜歡既某間麵包店那款類似, 餐廳很少用上這較高成本既麵包, 頓時將旁邊那款酸種麵包比下去. 每人有2片麵包頗慷慨.頭盤, 分別選了磨菇湯及Green Salad. 磨菇湯材料十足, 質地濃杰, 湯面畫了2圈油, 但不是橄欖油, 味道似中式的芝麻油, 很fusion.   Green Salad沙律菜新鮮, 包括幾款菜類, 簡單淋上油醋. 主菜, 豬柳3塊厚切, 肉質軟熟, 但對於伴菜更有驚喜, 尤其那條中式蔥煮到焦糖化很惹味, 另外搭上一片紅色菠蘿, 味道帶有紅酒香料味, 這個fusion配搭很特別, 唯獨不喜愛中式白菜仔. 主菜, 牛腹,不知是否我們慢嘆頭盤導致上枱時已不是熱辣辣.  初次嚐牛腹, 原來油脂較少, 所以肉質較乾, 但牛味卻濃.  同樣伴菜也驚喜, 炸藜麥薯球, 外脆肉軟, 不只是薯蓉, 可以食到薯粒.   甜品, 朱古力心太軟配雲尼拿雪糕, 蛋糕不夠軟心, 但朱古力味足夠. 另一款甜品侍應形容類似Panna Cotta, 但比奶凍更豐富更有層次感, 最面層有Wasabi味忌廉, 開心果雪糕, 另外更有清新既香茅味道, 最底層既草莓醬雖甜, 但混合一起食就中和了甜味.   

十年前已幫襯既日式小店, 在這租金成本澎脹既經濟環境下仍屹立不倒, 繼續客似雲來, 當中還不乏演藝人及日本人, 相信是全靠食材新鮮取勝.  是夜和朋友再次光顧, 像日本居酒屋一樣座位不多, 預先訂位較穩陣.  點選時令海產就知食材是否新鮮, 吧枱上放有好多新鮮貝類, 有北寄貝, 蠔, 螺.......每款都很有份量, 最吸睛係象拔蚌經店員推介刺身拼盤包括吸睛象拔蚌, 牡丹蝦, 油甘魚, 三文魚腩及帶子.   每樣都很新鮮肥美, 尤其象拔蚌極其爽甜, 牡丹蝦大隻肉厚, 蝦頭既膏夠甘甜. 唯獨帶子較薄身稍微失色.居酒屋必選燒雞泡魚乾及串燒.  帶甜味既雞泡魚乾不會燒到很乾還很juicy;  配合串燒佐酒一流.串燒包括白鱔，和牛，牛舌，青椒;  燒鰻魚就常食, 但燒白鱔就坊間餐廳較少提供,  我更喜歡燒白鱔肉質爽彈, 沒有鰻魚那種肥膩.   和牛及牛舌很爽, 對於我和朋友就覺得略為調味過濃.   青椒用上一般甜椒, 不是我預期既日本青椒仔般爽脆. 刺身拼盤還未消化, 還是心思思想encore, 朋友一向unlike本港餐廳既海膽質素,  但卻俾like這客北海道海膽壽司, 有口感帶微甘, 拖羅壽司拖住覆蓋飯團, 滿足了我倆大胃王.食材新鮮真的嬴到客人歡心, 就連看似平凡既芥辣八爪魚小食及每人一小碟既帶子裙邊, 也可食得出鮮味.有甜點做結尾才叫完美的一餐, 店內甜點不多, 只有原個椰子雪糕, 清甜味道像雪芭, 不會太飽肚又能滿足慾望.  

相信無咩香港人未聽過星爺喺食神裡面既黯然义燒飯，大家講就講得多，但又食過未? 之前灣仔有間酒店中菜部曾推出過黯然义然飯，酒店級數所以索價過百蚊一碗。小妹真係唔捨得食，位於炮台山這間新潮版燒味店，價錢平一半外, 賣點是由正宗食神裡既菜式創作師傅做餐廳顧問。 這店位於街角位加上大大個招牌很搶眼, 跟傳統燒味店一樣, 離遠已望到掛滿燒味, 店內模仿大排檔格局, 鋁枱/摺椅/鋁筷子筒/鋁乾淨企理, 難怪午飯時間有不少外藉人士及OL/OM光顧, 打破了傳統燒味店只有男人的浪漫, 或老一輩才光顧. 入正題, 餐廳標榜用本地豬, 雖然價格較貴但食得安心.   想一次過試多幾款燒味可選擇三拼飯$68連熱飲, 我揀了傳統玫瑰义燒, 燒腩仔及燒鵝.  這店既傳統义燒是半肥瘦帶著濃郁玫瑰酒香, 有趙口略為不夠肉汁, 但比起坊間很多為迎合健康用瘦义已經加分;  燒腩仔咸味適中, 皮脆肉爽;  燒鵝肉嫩但不夠皮脆, 勝在皮下無肥膏唔覺油膩.    三種燒味本身都好有味道, 也不用加豉油拌飯.    主角黯然义燒煎蛋飯 $80連湯及熱飲, 完全打破傳統义燒做法, 是另一味道及口感.  有層次既豬腩肉外表帶點邪惡, 但口感卻很爽不油膩, 玫瑰酒香比傳統义燒微, 但焦香較濃, 個人認為可以再烤多些焦, 特製醬汁很惹味, 原來是用紅蒽頭調製,  太陽蛋既蛋黃味香濃甚有驚喜, 看介紹才知是選用初生蛋.  兩種义燒比較下, 真是黯然义燒較出色, 難怪星爺咁喜歡.    這餐飯當中有趣事, 我們被白飯內既黑啡色長條物嚇一跳, 原來是混了野米,  因比例少初時只見到一條....哈哈!!   如能加多野米比例感覺更健康. 補充一點, 這店飲品也不只咖啡奶茶, 熱飲可以選擇支裝熱維他奶, 坐摺椅邊食燒味邊飲熱維他奶, 重拾校園飯堂回憶.  另外, 見到近天化板放了好多樽自家浸咸甘桔咸檸檬, 真材實料.

朋友介紹大圍有間專食肉餅既餐廳食過番尋味, 荃灣都有分店, 店內主打肉餅, 相信一定有綽頭.  今晚就專程請他帶路邊食肉餅邊聚舊.   餐廳在美林邨內, 火車站一條直路行去大約10分鐘, 唔係大圍友介紹都唔知屋邨內有好西.  以往既大排檔冬菇亭很熱鬧但較熱, 現在變靚了, 還成了一間間冷氣鋪, 也較衛生.店內座位很多, 間格闊落坐得舒服 餐牌內可選既肉餅真係多, 除經典口味蓮藕/土魷/鹹魚, 你會發現好多大膽創意既配搭: 黑松露, 墨汁, 鵝肝, 龍蝦, 柚子, 好立克.......睇No.就知最新一個數字係34 花膠, 家常既肉餅可以變奏出34款出來, 真佩服.   我哋點選鵝肝煎肉餅配菜飯及羊肉蒸肉餅配南瓜粥.  初時以為係將鵝肝撈入肉餅, 原來係將煎香既鵝肝放肉餅面, 睇到都流口水.  而羊肉肉餅, 就係將羊肉混和豬肉造成, 羊味較淡, 怕食羊既都可選擇.  個人較喜愛煎肉餅, 比蒸肉餅較香口. 南瓜粥味道偏淡, 質地似潮州粥. 每塊肉餅超厚好像漢堡扒, 每人一份肉餅對於女士來講都頗多. 菜飯既菜頗翠綠, 和肉餅頗配.   食了咁多肉, 係時候要食菜, 要推介這個"海味雜菌雜菜煲", 蝦乾/乾魷魚鬚炸香後很惹味, 將淡味既菜味提昇了. 店內飲品一律都係原裝價錢又唔貴, 好像這支椰青水只係$10.

唔嚟唔知係旺中; 唔食唔知泰好味.  唔係睇網上介紹都唔知旺中已經唔係我年輕時蒲既旺中, 一來多了好多外傭來行街, 二來多了好多小食店, 而大多都是年輕人創業攪攪新意思.  今天我係慕名而來搵新穎刨冰, 本身我愛食芒果糯米飯, 尤其係白糯米較甜及煙韌, 但溝埋刨冰真係未試過, 只見泰國逹人胡慧沖介紹過這是泰國最新食法.  唔知泰國賣幾錢, 但我見到這店既實物咁大份量$48也不貴, 仲好過要飛去泰國食. 店面似水吧, 年輕老闆一手包辦, 見佢很用心製作每個步驟, 尤其最面層既椰奶花, 單看賣相已大讚. 這個椰奶花比一般椰奶杰身, 椰味香濃.  用芒果汁製成既棉棉冰好幼細, 沒有想像中越食越凍既感覺, 就算唔加旁邊既芒果汁拌食, 棉棉冰都有足夠芒果味, 加上不會過甜搶去芒果味.  食吓食吓, 終於食到芒果肉及糯米飯, 很煙韌, 同棉棉冰很夾, 而最底有雪糕筒威化, 又帶來另一層次,  老闆話遲些會轉用早餐粟米片更有脆口,  食法真的有創意.  最要讚這個碗既設計, 最下原來係手柄方便在此立食,   另一驚喜係泰式奶茶, 泰國茶葉比一般香港既紅茶葉帶有甘味, 而顏色也帶紅啡.  老闆告知我們, 奶既比例好重要, 佢翻覆試了幾次先沖出最有茶味既比例. 多口問老闆, 牆上一樽樽是什麼, 原來是泰國梳打, 比一般梳打更多氣. 老闆務求將真正泰好味引入旺中.

灣仔皇后大道東一帶有好多小街, 你唔走入去探索都唔知原來在corner位有間cafe, 有間外賣店, 甚至係法式餐廳.  今日捐到去在灣仔工作很久既朋友都唔知既一條街"麥加力歌街", 品嚐法式小店既午餐滋味.  長條型既鋪位分地下及一樓.  雖然是法式餐廳, 但餐廳卻擺設好多懷舊玩具, 相信是店主既珍藏.  Set lunch 做得不馬虎給我驚喜, 尤其我所點既蕃茄醬煎帶子risotto, 煎到金黃既帶子有3大粒, 沒有雪味沒有overcook帶口感.  微酸既蕃茄醬很fresh, 不會有飽滯感.  朋友點既煎西冷, 雖然熟了點, 但肉質軟熟, 充滿炭燒味.  Set lunch百幾蚊還有餐湯及餐飲跟灣仔一般西餐廳價錢相約, 至少這趟令我有驚喜會再幫襯.