大廚小館 (鰂魚涌)

呢日約左個朋友食晏, 想飲茶但係星期日酒樓又勁多人, 突然諗起之前經過呢度見到星期六日公眾假期下午兩點後飲茶大中小點一律計小點價錢, 免茶芥加一, 所以就黎呢度一試~

果度果然冇咩人, 仲啱我心意, 我就係唔想咁嘈雜!~ 呢度都幾舒服~ 我地兩個人叫左4個大點: 流沙包, 蝦餃, 雞札, 魚湯鮮竹卷~ 流沙包幾好, 真係好流又唔會太甜, 蝦餃都幾好, 同出面不相伯仲, 而雞札同鮮竹卷先係今餐嘅主角! 佢地都比酒樓嘅份量大, 餡料又多, 個魚湯仲好鮮添呀! 所以真係值得一試~

我地食到好~飽~ 仲坐左好耐~今日食嘅點心都係即叫即蒸所以好熱辣辣架!~ 埋單都係$52仲平過食快餐啦!~

P.S. 佢個流沙包除左蒸之外原來仲有炸架!~ 大家可以試試~

新曼谷泰國菜館 (銅鑼灣)

今日下午3點約左朋友食飯, 佢地話想食泰國野所以尋晚就search下銅鑼灣有邊間有好評喇~見到呢間都幾好回響, 價錢又相宜, 所以就揀左呢間了~

佢冇下午茶餐, 但係午餐由11點半做到6點, 都有幾十款選擇架~~ 我見之前嘅食評都有介紹個椰青焗飯($48)所以就叫左~ 之後我地仲叫左個炒金邊粉($38)同個香葉炒豬頸肉配飯($38), 個餐包一杯野飲, 可以揀椰汁紅豆冰, 椰汁西米冰, 龍眼冰仲有一款唔記得椰汁咩野冰~ 我地都揀左椰汁紅豆冰~

三樣野都幾好味, 炒金邊粉同其他地方差唔多啦, 其他果兩樣就幾特別~ 個炒豬頸肉有茄子, 辣椒同香葉, 所以辣辣地又好惹味~ 個焗飯幾濕潤同埋有d椰肉好正~~野飲都ok啦~呢餐都幾滿足!佢呢度唔需要加一, 我地又好耐冇見所以傾左好耐, 坐到五點幾, 侍應姐姐都幾nice架, 我下次黎一定會試第二d野~

Das Gute (上環)

我試食過好多唔同舖頭嘅芝士蛋糕, 有好多都偷工減料但係賣到貴一貴, 不過呢度嘅可算係落足料! 真係值得大家一試~

今次我就試左藍苺芝士蛋糕, 佢d芝士味好濃郁, 個餅底都造得好好, 好味過聖雅多同italian tomato好多~ 起碼佢真材實料冇稀到! 宜且價格合理, 所以我會繼續試下呢間店嘅蛋糕!~

順帶一題, 呢度嘅麫包都好一流架!! !大家不妨都去試下啦~

潮客 (北角)

今日我last day所以就同一大班同事去飲茶喇~*

之前知道呢度全日都免茶芥加一, 所以就趁今次去試試喇~

食物質素都好好, 可以話係有水準, 我地叫左都幾多野架:

1. 帶子莧菜鳳眼餃, 蝦餃: 個鳳眼餃造型好特別, 係開住口好似隻眼咁嘅, 味幾好, 菜唔會有渣; 蝦餃我冇食, 但係見到個餡都好多~

2. 什錦鹵水拼盤: 有別於一般嘅潮州食肆, 佢係用一個大湯碗上嘅, 我個人唔太鍾意太咸, 呢度嘅鹵水汁就合晒我口味喇~

3. 蒜香灼通菜, 生菜: 炸蒜粒雖然只係點綴, 但係好香, 菜又唔會太油, 幾好

4. 潮州叉燒飽x2: 我冇機會試lu, 但同事都話佢皮薄餡多, 仲有佢個樣似上海式嘅菜肉飽, 係冇爆開口嘅, 外型同廣東式嘅有d唔同*

5. 潮州手打魚蛋河(窩): 推介呀!!! 河粉好薄好滑, 有芽菜, 魚蛋同魚片都幾彈牙, 好清好好味!~

6. 蠔仔粥(窩): 好多蠔仔呀係另一推介! 好好味~

7. 雞紮, 鳳爪, 排骨陳村粉: 普通野, 但都幾好食~

8. 豉油皇炒腸粉: 同上

9. 胡椒豬肚: 我冇食但同事反應良好*

總括而言, 呢度係絕對有下次架! 因為我今次冇機會試蠔餅同芋泥! 下次可以同屋企人再黎*
11個人閒日午飯只係食左四百七十幾咋~~ 真係超值!~

一生任食和式火鍋 (銅鑼灣)

阿瓜星期一終於都番左黎喇~ 所以我地就約左星期二我放工之後出銅鑼灣食晚飯喇!~ 之前從openrice見到呢度好評如潮, 於是就黎左呢度睇下有咩驚喜*

大約七點去到, 唔係咁多人, 個環境幾舒服, 服務員比左4人嘅位我地, 都幾好唔似得平日去開果d有時會好逼~

個侍應生首先同我地介紹下兩張點菜紙, 一張有幾款特別推介嘅, 另一張就係其他所有嘅食物, 仲有個自助沙律吧~ 除此之外仲有野送! 我地好彩喇今日係最後一日送北海道鱈場蟹腳呀!!!

自助沙律吧唔係只得沙律架, 除左一d蔬菜同沙律之外, 仲有5-6款一兜兜嘅日式前菜小食, 幾款壽司, 日式咖喱, 飯, 炒烏冬同埋兩款湯~ 值得一提嘅係佢嘅日式薯蓉沙律同鮮什果沙律都幾正架*

要點菜嘅方面, 刺身非常之新鮮! 三文魚好肥美, 色澤好靚, 希靈魚唔係度度都有得食, 甜蝦好鮮甜, 好多蝦膏, 嚮螺都好正!

炸野就建議大家一早叫, 因為愈遲叫果d就愈放得耐所以唔好食, 我地一去到就叫左什錦天婦羅幾正! 蝦好正!~

其他菜式有好多都好特別, 未能一一列出, 出面一般嘅日式放題冇可能食得到, 真係一分錢一分貨架~ 佢有d係西日撈埋嘅菜式, 例如意式三文魚~ 最特別嘅係佢連新鮮蘆薈都有!!!~

個送嘅鱈場蟹腳得兩段時間有得送架咋, 到時就會有個部長走出黎宣佈架喇~ 另外佢都有sell下佢地嘅特飲, 以優惠價發售~ 不過我地冇試*

差d冇講呢度有得自己燒肉架! 個爐的的式式幾得意~ 仲有如果你叫鍋仲會有個gas爐係度比你慢慢食添*

總括而言, 呢度嘅食物比起其他同類食肆係高水準之作, 款式都好特別, 貴幾十蚊我就梗係黎呢度啦~ 下次一定會再黎*