技巧樹熊 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2024-02-05
好耐無探過邵師傅,上次去紅棉已經係成年前,難得有朋友搞唔駛安排寫菜咁好嘅局,當然幫下手安排約人食飯。 邵師傅真心有難得嘅魄力,我唔夠膽講食個紅棉好多次,但食過四五次後,基本上今次全個menu不單係新,仲要好出色,呢個冬季menu,絕對係近來我好喜歡邵師傅嘅一個Menu之一。最好嘅係,之前食咁多次好似都冇寫過,今次寫下啦。 前菜以前我好喜歡佢整嘅瀨尿蝦,今次係椒香蔥油酸薑阿拉斯加蟹配芥末兒菜,淨係個主角阿拉斯加蟹已經夠勁,佢今次嘅味覺強勁好多,當然有佢嘅拿手椒香好戲,加上蔥油更加香,再加上酸薑嘅衝擊,同淡淡微涼的芥末兒菜,完全係精彩示範。 鮮螺頭甲魚清湯又係非常好,首先甲魚係非常補嘅,個湯加上螺頭之後更加之細緻,但最緊要係好清好甜。 主菜黃燜一品燴係一個豐富到不得了嘅菜式,大條嘅海參,雞湯,加上旁邊輕輕炸過嘅燕窩,你食得出大師嘅細膩同佢嘅手工工價,記得上次朋友攪局都有食過一個差唔多嘅菜式,但係今次upgrade同進步咗。 相對簡單嘅魚香蝦球帶子,但味道其實幾好,而且好靚,隻帶子應該係刺身級。 檸檬葉燴珊瑚黃花魚柳件魚真係好大舊,佢件魚加上左蝦膠同蟹黃,清新嘅檸檬葉加上點點嘅汁,呢件真係好好食,味道好多層次,好有特色,絕對食到師傅嘅心機。 全晚最得我心嘅一定係咖喱香酥美國牛小排,首先個美國牛小排係炸得非常完美,長方形嘅牛小排肉質同密度都堪稱完美,最重要係個咖喱汁,大家都知道小師傅曾經喺印度做過一段時間,所以佢係對咖喱好有研究,而呢個咖喱味道適中,唔係好辣,而且帶甜係近北方咖喱嘅色彩,好味道我哋要再加飯送個咖喱汁。 香煎臘味糯米飯拌蔬菜絕對係精彩,長方形嘅香煎臘味糯米飯,外層煎得脆香,雖然食到呢度已經好飽,但係都冇剩,炒糯米飯見得多,要做得好食唔容易,呢個做得好食仲要咁有特別,係好值得欣賞嘅。 甜品係未見過嘅狀元茶湯丸、雲腿酥,個人覺得雲腿酥好特別,當然仲要加上佢嘅芝麻卷同山楂卷,呢個係每次都要食嘅邵師傅signature 。 食完即刻想攪番局,有冇興趣? 評分: 味道 5 環境 5 服務 5 衛生 5 抵食 5
2024-02-02
限定三個月的 The Italian Pop-Up 由意大利籍行政總廚 Davide Bruna 以食材為本,係大館對面嘅Schnitzel & Schnaps HK 提供了一個非常精彩的意大利東北menu。 David 對於佢嘅家鄉弗留利-威尼斯朱利亞 (Friuli-Venezia Giulia) ,精挑細選當地出品的食材整左個menu,lunch同 前菜的意式多士配生牛肉及日式高湯,牛肉他他小多士精緻得很,少見濃味的法索纳生牛肉同底有加日式高湯的鰹魚蛋黃醬為主調,個多士脆到一個點,樣子西式但又夾雜日式感,好有fusion感覺。 不是只有西班牙才有紅蝦,在西西里的馬扎拉-德爾瓦洛,David為你找到最精彩的紅蝦,加上柑橘,蝦身沒有任何烹調,先嘗炸過的蝦頭,佢嘅醬汁以柑橘及橄欖油做base,點蝦身更突出鮮味。 意大利聖丹尼火腿伴藍紋芝士醬、烤梨、合桃及葡萄醋,火腿風格好有鹹香,加甜烤梨、同藍紋芝士醬、香脆合桃同葡萄醋組成一番精彩的表演,唔係平時嘅凍肉盤咁簡單。 當你要食意粉,風乾豬頰羊奶芝士番茄大管麵又係要推薦,阿馬特里切一帶最有名生醃豬肉,廚用上最優質的面頰肉生醃,不用太多調味醬汁已好夠,加上新鮮番茄更fresh,灑上香濃的佩克里諾羊奶芝士,造就一個好精彩的菜式。 除了意粉,主食米蘭小牛肉伴香草沙律及黑蒜蛋黃醬一定係大推,經典米蘭小牛肉可能好多人無食過,連骨烹調至外層香脆,肉質係半熟的細緻口感,勁似日本嘅炸豬扒,有一刻我不夠膽相信佢係牛肉,完全唔似,蘸上新鮮檸檬汁勁爽,但我最愛係佢嘅黑蒜蛋黃醬,又係少見,食多幾件加上旁邊的香草沙律,更有多層感覺。 甜品就簡單點,意式芝士餅配煉奶,添加了一層濃稠的煉奶又係你未試過的特色,都幾得人歡心。要食特別嘅甜品就選格拉帕酒意式奶凍伴莓果醬及雲呢嗱脆脆,甜甜地但chef話平時家鄉係用來做感冒藥,幾得意。 下次想再食其他意粉,想試下lunch menu,有冇中環人有興趣? 評分: 味道 5 環境 5 服務 5 衛生 5 抵食 5
2024-01-23
大家都應該識得德昌魚蛋粉,但你又知唔知其實土瓜灣都有分店?記得兩年前佢開張嘅時候好開心,難得附近有間傳統嘅粉麵店,唔駛再特地去九龍城買火鍋料同食魚蛋粉,不過原來最近自己屋企嘅反而最少去,前幾日無約飯局心血來潮就去食個簡單晚餐。 係土瓜灣嘅分店唔係叫德昌,叫同一,唔駛擔心,絕對係同一分店,可能因為個名,佢無咁九龍城咁火熱,但食同坐得更舒服。 簡單一碗魚蛋粉,湯頭甜,河粉勁滑,魚蛋爽而口感好,基本上無懈可擊,同我最愛的夏銘記各有優點。 朋友點的蝦球撈麵,好似好食過七喜,特別係個牛腩汁撈嘅撈麵,蛋香濃而沾上腩汁的感覺,係魚蛋粉外一個更好選擇。另一個點的撈米更正,健康好多,配牛筋後更加突出個汁嘅出色。 單點左個豬手,呢個又係絕對大推,食過軟淋淋嘅豬皮就知道佢地炆得絲絲入扣,下次除左食蝦球撈,豬手撈都唔錯,如果錯過了深水埗的祥發你覺得可惜,咁唔好考慮,過黎呢度食。 四寶當中我最愛魚皮餃,個皮好薄而且入面好豐盛,貪心嘅都值得叫因試到好多唔同種類嘅野,當然唔可以錯過仲有佢嘅炸魚片頭,再加過炸魚皮,更佳。 聽員工介紹佢哋而家推緊新湯底,朋友試左個嘅冬蔭公湯底配魚蛋粉,幾有特色,呢個隱藏menu,有興趣你過黎食問下呢到嘅員工啦。 評分: 味道 5 環境 5 服務 5 衛生 5 抵食 5
2024-01-22
朋友搞日本清酒局,話有間尖沙咀嘅新餐廳推薦,有人訂唔駛煩,即刻跟。 $1288二人海膽x和牛餐,朋友話好好打卡好啱影相,兩樣咁貴嘅食材放埋一齊,價錢又唔係好離地。 有強烈日本居酒屋風味,裝修得唔錯。每個食客會有一個coin ,可以即刻做一個扭蛋抽獎,抽到嘅獎都可以即晚用,例如當晚即刻有折,又或者有飲品食品送,都幾有心思。 又係基本上刺身、壽司、天婦羅、串燒、煮物,乜都有,你想食乜都得,就算你唔食生冷嘢都可以嚟食嘅日本餐廳。先睇吓呢個餐有啲咩食: 芒果蟹籽沙律 海膽甜蝦刺身杯 火灸和牛他他 海膽拖羅千層塔 火灸和牛海膽卷 海膽黃金蟹膏烏冬 芝麻綠茶雪糕 前菜嘅芒果蟹籽沙律作熱身,呢個相對簡單,大份嘅程度令我諗起從前元朗嘅長長壽司店。 先打卡嘅係海膽甜蝦刺身杯,甜蝦勁多隻,海膽有兩種,有魚子醬同紫蘇葉嘅點綴底下,整體嘅形象幾靚,不過食落由於質素好,雖然唔係超級夾,但係都睇得打得。 火灸和牛他他雖然唔算靚,但係食落去個口味係幾好,個醬汁、洋蔥同埋和牛夾得幾好。 海膽自己一個主打嘅海膽拖羅千層塔,加上紫菜可以自己做個卷物,好食好玩又係愛好打卡嘅好選擇。 呢個係全晚最好味又打卡最佳嘅火灸和牛海膽卷,燒過嘅和牛再加北海道嘅海膽,再加上點點嘅魚子醬風味,入面包著嘅係滿滿軟軟的壽司飯,絕對係我成晚最鍾意嘅菜式。 又係最吸引人目光嘅海膽X 黃金蟹膏烏冬,個蟹膏烏冬真係味道好濃烈,但係海膽就冇前邊嗰兩個item 咁好。 甜品真係最簡單,芝麻或者綠茶雪糕,隨你喜歡,唯一唔好嘅就係應該甜品太簡單吧。 以一個唔算貴嘅價錢,食到一間幾有氣氛嘅居酒屋,一班朋友吹吓水打吓卡食吓嘢,如果你鍾意新餐廳嘅好地方,可以試下感受下。 評分: 味道 5 環境 5 服務 4 衛生 4 抵食 4
2024-01-21
尋日有個好識食嘅飲食版主大讚安娣瑪萊,突然令我食完想講吓,大家有聽過海南少爺嘅話,呢間新餐廳就係喺尖沙咀海港城海南少爺嘅舊址,佢哋sell嘅都係馬來西亞菜,但當然走嘅路線係優雅得多。 主因其馬籍華僑主廚 Chef Wee Hor Han 堅守家鄉風味的創意味覺,他曾於浮羅交怡St. Regis米芝蓮一星法國餐廳L’Orangerie和馬爾代夫 Four Seasons 等知名酒店擔任主廚,相信講到呢度都估到佢有返咁上下,唔會係好似以前海南少爺咁簡單。 welcome snacks迷你魚醬蝦米春卷一食就食到停不到口,聽講而家近農曆新年先至會有,送酒一流。 前菜有焦糖脆魚皮同蟹肉雜菜薄餅卷,脆魚皮加蜜糖嘅感覺真心特別,而蟹肉雜菜薄餅卷呢個item係平時少見嘅馬來西亞菜,幾好食又啱打卡,而上邊嘅蝦米先至最搶鏡。 甘香炒蘿蔔糕好惹味,同平時香港食到嘅XO醬炒蘿蔔糕完全係兩回事,個人特別鍾意呢個菜式。 蠔仔塔塔蛋餅有少少似我哋嘅潮州蠔餅,但大大粒嘅蠔仔同埋蛋餅嘅質地同厚度都同我哋嘅蠔餅完全兩回事,當日我哋都幾鍾意呢一個咁特別嘅蛋餅。 主菜嘅黃金軟殼蝦個味道唔算太濃,冇平時種強勁嘅力度,但送飯一流,蝦肉都好食又彈牙。 亞參酸辣沙巴仔配黃金油條,我唔食魚所以唔算食咗好多,但係沙巴仔嘅肉質好嫩同埋都啖啖肉,個汁點油條一流,佢哋附上嘅配菜沾汁都好好食。 仁當牛面頰肉配燒肉鬆糯米飯卷又係好新奇,基本上呢度嘅所有主菜同前菜都係好少見,燒肉鬆糯米飯卷點個汁極佳,仁當牛面頰肉淋到可以無牙都食到。 芥蘭都有二食絕對令人驚嘆呢度嘅大廚嘅創意,當然佢做嘅炸脆芥蘭係最出色。 海南雞鑊仔飯絕對係今日嘅主角,成個表演咁,放晒火,睇都賞心悅目。海南雞非常之滑,配合個鑊仔飯,比平時香港食到嘅煲仔飯,多咗一種與別不同嘅感覺。 甜品有三個班蘭咖椰多士,薑汁焦糖布丁,娘惹七彩香蘭糕,都係一般見到嘅馬來西亞菜式,由於前菜太吸引呢啲就係Business as usual 。 另外我都幾鍾意呢度嘅奶茶,有跟大讚好嘅朋友食下lunch同試吓一啲典型嘅馬來西亞菜先,如果鍾意馬來西亞菜嘅朋友,又想食吓啲新嘢,嚟呢度應該都冇乜錯。 評分: 味道 5 環境 5 服務 5 衛生 5 抵食 5
|