甜甜地甜品屋 (深水埗)

係深水埗行到冇野做，就入左呢間甜品店食下野，hea下時間。去到先3點幾，d客人都有唔少下，不過就唔使等位。店鋪入面幾有舊時冰室既feel。坐d一陣，叫左個芒果水晶。芒果水晶（$22）
呢個價錢黎講都算幾抵。底面既涼粉唔會苦，芒果也算新鮮，整體黎講就普普通通。

之後食到一半，有小小肚餓，見佢有小食賣，就叫左燒賣魚蛋各一串。燒賣6蚊6粒，魚蛋6蚊7粒。
燒賣既醬油係店鋪自己配製，但我食落就甜甜的，同普通甜醬油冇咩分別。魚蛋十分彈牙，配上既醬十分野味，辣得黎有好香。之後將d燒賣點魚蛋既醬汁，食落仲好味！

紅蔥頭 (深水埗)

是日黎到深水埗，本來想品嚐下街邊的特色小店鋪，可惜由於天氣太熱，只係係西九龍中心行下算，見到呢間野都好似唔錯，就入去試下。去到果時12點幾，人唔算多，等左5分鐘就有位。

一入到去，間野既氣氛其實幾好，幾多西歐的風格，靜靜地食個lunch都係唔錯既享受。一行兩人揀左兩個套餐。芝士焗白汁菠菜龍利飯同什扒飯。+6蚊有湯同餐包。芝士焗白汁菠菜龍利飯（$44）
要注意剛上檯時個碟十分熱，本人已被燙過幾次。芝士加白汁，幾特別既配搭，食得出濃郁既芝士味同時又有淡淡既白汁既奶味。友人話芝士味好淡，但本人就覺得還可以。龍利柳就一般般，同普通既魚柳分別唔大，勝在肉質比較新鮮。什扒飯（$44）
有豬扒，雞翼，腸仔同煎蛋。煎蛋煎的好好，蛋黃流心，將d蛋漿撈埋d白飯一齊食，啖啖飯都食到濃濃既蛋味。豬扒食落幾有肉汁，不會乾乾的。雞翼有用香料‘葉’製過，食落幾香口。腸仔就是一般的腸仔啦。唯一驚喜既地方係佢d配菜，平時去食西餐既配菜都只係用水煮一煮就完，食落完全冇味，但係呢度既好唔同，可以食得出佢係用一d有調味既湯去煮出黎，d菜吸曬d湯汁，食落唔會淡茂茂，由此可見呢間野十分細心，最終當然清曬所有配菜啦！

餐包：呢度係蒜蓉包，不過本人覺得烤得太脆了，同食餅乾冇咩分別。
白湯：很濃郁既奶味，飲落都幾creamy
紅湯：有點而太辣，可能本人唔太食得辣吧。

整體黎講，呢間野都係一間唔錯既用餐地方，得閒試下都無妨。

皇室甜品 (九龍城)

是日係荷里活廣場行完，冇野做就去做九龍城食野。於是上openrice睇過呢間野的評價不錯，就入去一試。達到果陣先晏就5點幾，所以唔使等位，入面都算幾寬下。坐低睇左餐牌都幾多款式。最終揀左宇治金時同龍王二世。宇治金時（$30）
個底係綠茶沙冰，上面家上綠茶雪糕，小丸子同紅豆。沙冰不太甜，配上甜甜的紅豆能夠中和味道，說真的，綠茶加紅豆十分配！用此製作既甜品根本唔會難食得去邊。不過呢度勝在雪糕同沙冰都能夠食到濃郁的綠茶味，同埋紅豆很‘沙’。而且小丸子十分彈牙，混合沙冰一起食有特別的口感。龍王二世（$30）
個底係芒果沙冰，上面配上鮮芒果，黑珍珠，朱古力雪糕，西米。一上來，唔知點解個雪糕球融融地，有少少失望，不過好彩個雪糕食落有濃郁的朱古力味，還有一粒粒既朱古力粒，食得出唔係用雀巢雪糕伶出黎賣。芒果十分新鮮十分甜，整體黎講呢個甜品不錯，但係試一次就夠。

食完覺得唔夠喉，叫多個日本雪米糍紅豆豆腐花。日本雪米糍紅豆豆腐花($24)
一上黎個樣都幾吸引下，一開始以為那是糯米糍，原來係雪米糍，食落都有幾濃郁既紅豆味。但係一試個豆腐花，十分失望。一d都唔滑，就算係凍既都唔應該係咁，可以見到係一粒粒狀既豆腐花，有d懷疑係咪過夜豆腐花= =此時已經冇乜意欲去食...呢個野令到成餐甜品劃唔上一個完美既句號!

P.S.係店度見都佢地開緊好多金枕頭！超大陣榴蓮味！睇落去都好新鮮。有機會要黎試下佢d榴蓮甜品，都有好多款下。