難得唔洗加班 放工後與肥力去觀塘 試試工廈內cafe 工廈cafe 總是會給你不同驚喜 店內裝修及食物各有特色

我地大約7點半到達餐廳 已經差不到滿座 這裡的晚餐是以套餐為主 選擇也有不少 套餐包括了餐湯+麵包+主菜+甜品+餐湯 價錢大約$100 都幾抵食 當然可以加錢食特色甜品是日餐湯-蘑菇粟米湯 好特別 個湯似係自家製 有蘑菇溶 有d野咬下 唔似普通用濃縮罐頭湯開 又唔會太杰身 太多芡 餐包係吞拿魚多士 仲好脆 熱辣辣 又唔會太乾同太硬身主菜之一 羊鞍 份量十足 好大份 羊唔會太蘇 汁亦唔太濃蓋過羊獨有味道 肉質嫩滑 旁邊煎香的瓜菜薯仔 令到整體唔會太膩而另外主菜-煎三文魚 賣相好吸引 放係木板上 好有格調 加左不同香料 令到三文魚唔會腥 火口亦控制得唔錯 外脆內滑 唔會太乾身 好juicy 而且件魚冇骨 啖啖肉 怕骨既朋有冇有怕啦！唔好睇少加餐甜品 一d都唔馬虎 士多啤梨旦糕 加 雪糕 絕對唔係交行貨 都算係有心思我地加左錢 order brownie + 綠茶雪糕 brownie 上菜時仲係熱辣辣 再加埋凍冰冰雪糕 正呀！brownie 內仲有唔少合桃 而且都幾濕潤 綠茶雪糕唔會太重奶味 綠茶味都幾出 差不多我一個人食哂成個甜品最後餐飲 見到menu 上有「榛子熊仔餅朱古力」咁特別 試試先！原來係有兩粒熊仔餅係出面 朱古力唔會太甜太重奶味 榛子味都幾重幾濃 而飲品上加了熊仔圖案 可以呃到like 今餐 整體黎講幾滿意幾滿足 份量相當足夠 賣相有心思 但價錢又唔算太貴 店員服務好殷勤有善 大家有機會可以問下老闆wifi password 係咩 可能會有驚喜 （心心眼）

星期日 打算去塔門行下 親親大自然 但懶床 遲左入西貢 於是係西貢市中心逛逛 晚餐已經預先訂左位 米芝蓮一星菜館

本小姐唔係太食得海鮮 會有敏感 所以 決定去西貢食飯 可以慳唔少 我地兩個人決定叫三餸一湯 加 白飯 (冇得任裝)

西貢魚湯- 好濃魚味 個湯係奶白色 係用蕃茄薯仔煲 唔太咸 應該冇落味精 兩個一叫一碗都夠 一碗有兩隻飯碗份量

椒鹽鮮魷-份量都幾多 好大碟下 炸粉一d都唔厚 脆卜卜 魷魚好新鮮 好爽口 一d都唔腥 有鮮味 唔會過熟同林身 

鹽水煮西貢魚仔-好簡單材料去蒸 陳皮同蔥 就已經食到魚仔既鮮味 好有魚味 肉質唔會莓 雖然細細條 但唔多骨 之後問左個侍應 魚仔叫齊頭閘

咸魚炒涼瓜- 即叫煮炒 上菜時熱辣辣 出哂煙 飄來陣陣咸魚香味 雖然係有咸魚 但一d都唔咸 好好味 涼瓜都好爽口 唔會煮得太甜 食到涼瓜既苦味 

飯後仲有清甜既哈密瓜畫上完美句號 員工殷勤有禮款待 值得讚賞

想係澳門想宵夜 其實一d都唔困難 周圍都有麵檔 燒烤 年三十晚 總要遲一遲先去訓 要迎接羊年 所以決定去遊下車河 順便睇下有咩好食

經過狗場附近 俾老記懷舊裝修吸引左 好似拍古裝戲既格局 又係米芝蓮推介 所以決定要試一試 入面裝飾擺設都好古式古香 老伙記都穿上整齊制服 今晚係年三十 所以未有服務費加二情況

店內食品以小菜 粥品 炒麵為主 唔想真係變肥過肥年 所以我地兩個人決定一個粥一個炒麵 齊齊食

狀元及第粥 - 個粥好綿 好香 粥底唔咸 冇咩味精 食落有好香遙柱味 唔太食內藏既我都接受到 豬潤好爽口 唔會有好大浸腥味同怪味 

豉油皇炒麵 - 個麵一放低就聞到好香 顏色好靚 炒得好有鑊氣 好乾身 麵唔會太軟身 碟底冇油 簡直係高手 加埋芽菜 九王好爽

食飽飽 周圍行 係澳門渡過充滿炮仗的新年 大家 新年快樂！

又到一月 係慶生月 四小花之一想食西餐意粉薄餅 所以決定去好評不錯既小酒窩

我地預先訂左7點 4位 去到時已經見到門口好多人 侍應姐姐 話半數入先入得 點知黎左3個 又話齊人先入得 終於人齊 又要我地等 之後要落左單先入得

餐廳好細 係最小既空間放最多既枱 我地4個要同對情侶搭枱 位同位之間迫迫貢 肥少少都唔得

我地order 左4樣野加沙律 一人一杯冇酒精飲品 坐底冇落 已經上得菜 快餐店既速度 張枱都唔夠位擺

招牌沙律-份量都好大 菜都好新鮮 幾爽脆 dressing 係蜜糖介末 配料有雞蛋 牛油果 都好豐富 五顏六色

豬仔骨(半份)-半份都幾多 一人有兩三條 幾入味 肉質幾林 唔會食到冇哂儀態 但覺得冇咩特別出色之處

四季薄餅-好多人推介 薄餅以芝士為主角 每一塊都有粒水牛之士 但奇怪在有泰式辣醬係面 餅底係薄脆底 都幾脆身 勝在夠熱

尼泊爾餃子-又稱momo 饀料係免治雞肉 餃子上菜時都幾熱 所以個餃子皮都幾軟 一啖咬落去 好重香料味 唔係太啱口味

什菌意大利飯-個飯唔係好腻 都有唔少什菌係入面 都幾香 

剛放低餐具 侍應姐姐 已經急不及待 幫我地執拾枱面 坐都坐得唔安落 唯有走 其實呢個餐廳價錢都算幾抵食 樣樣份量都好大 只係冇咩特出之處 普普通通 加上坐得唔係好舒服 再光顧既話 要諗諗

難得早些少放工 就去搵麻甩佬食晚飯 最近 佢見網友們推捧尖沙咀拉麵 (前址係好好味既agura 拉麵) 所以就去試一試

拉麵站位於韓國街 店鋪較為細小 可以容納10 人到 可以邊食邊望到準備拉麵過程 每個位前都有調味料(拉麵糊椒 魚油) 同配菜 湯面則以辣味 醬油 鹽味 牛乳 為主 仲可以俾雇客選擇麵身軟硬 湯底濃淡

我地分別叫醬油同鹽味 可惜餃子沽清 只係加左雞蛋($10) 我地沒有特別偏好 所以選擇左「普通」 希望可以試清湯底既個底 係等既時候 眼見廚師大哥不停左吱吱 右吱吱 不停加入「調味」 心感不妙

拉麵上枱時 已經見到一層厚厚厚厚既油 好重黑椒同楜椒 湯底好濃 個麵都算ok 唔太軟身 叉燒用左火槍燒過 入口唔係太林 隻蛋唔係好糖心 冇咩特別 雖然知道佢出名係濃拉麵 但愈食愈咸愈口渴 食食下 兩個湯底已經變到一樣味 分唔出口 

因為坐係門口 部電視機不停重複又重複店內拉麵廣告 有些煩厭 唉 只能回憶惜日既Agura

腸胃炎好番 戒口戒左幾日 好番緊係要放下肆 落尖沙咀逛逛 去到 K-11 附近 就俾呢隻牛吸引住

雪糕店貼住"試業期間 供應有限" 雪糕主打4隻口味: 粟米 海鹽 朱古力 薰衣草 再配上不同既配料 可以揀筒裝或杯裝 所有牛牛都好色彩繽紛 好難選

最後㨂左火牛牛 雪糕上既綿花糖係即整 好耐冇食過 係做小朋友時既回憶 朱古力雪糕 冇咩特別 唔係太重朱古力味 配料朱古力酥餅好似潮左 濕濕地 唔酥脆 雪糕筒好有顏色 只係上左顏色 但冇添加味 不過比較厚身 唔脆

總括 係個外形比較特別 味道冇咩特別 食咁多顏色落肚 覺得有些不安 試一次就夠

因為連續幾日加班 週末放假唔想又留係港島區 所以決定去荃灣 遠少少 搵下野食
 
其實知道荃灣有好多野食 既然黎左 緊係要試下出名既冰室 地點唔難搵 搭西鐵 沿如心廣場行 再行入街市就係 雖然冰室周圍環境麻麻 又多人又多貨車 但勝在夠耐歷史 有懷舊風味

由於好多人都慕名而黎 我地兩個都排左差不多一個鐘 入到去仲係迫迫貢兩個坐一邊卡位 食物以湯麵 三文治 奄列為主 飲品就有懷舊蓮子水 雞蛋水 

我地兩個人參考左附近幾枱後 叫左三樣野食 一人一杯飲品

蛋治烘底 (烘底+$2) - 個蛋好厚好厚 一啖都咬唔哂 相比下塊麵包就變到好薄但亦然好脆 蛋好滑 好夠熱 食食下就覺得好膩 膽固醇應該會上升

炸菜肉雲吞 - 饀料係九菜豬肉 皮唔厚 唔會一啖咬落去成舊粉 好脆好香口 不過係多油左少少 好底食 一碟有10粒

雞翼 - 本身冇諗住叫 但俾對面枱吸引到 雞翼好大隻 色水好靚隻隻都上哂色 脹卜卜 食落去唔會有浸雪味 食得出有麻油香 

飲品就冇特別 我諗呢餐係食茶餐廳最貴之一 不過有特色 試下又冇

一早約咗好耐無見嘅歡樂小姐係新年嘅第二晚飯聚。果日大家都要返工，忙到七點多先離開公司。原本約咗去世貿某新餐廳食飯，點知去到果時已是 waiting list 第九張檯。實在太肚餓，唔等喇！
靈機一觸，諗起之前朋友提過係希慎嘅 Shelter, 就立刻open rice 電話，打去問等位情況。當時將近八點，接線小姐話有位，即時幫我留咗檯，好嘢！
去到即刻入座，雖然整個地方都係室外，不過餐廳放咗足夠嘅暖爐，唔會覺得好涷。不過人手好似唔係好夠，我坐低左好耐都無人理我同比menu我. 
餐廳既食物選擇好多，有海鮮、牛扒、頭盤、意粉、飯、pizza. 因餐廳亦都係一間bar，所以飲品款式更多。
最後我地兩個叫左頭盤：牛油果配蟹肉沙律，主菜：北海道帶子櫻花蝦義大利飯另加一個side 嘅薯條，同各人一杯白酒 Riesling.
Order 完無耐，眼見隔離檯都有麵包籃，而我地又等左好耐都無,就禮貌地問侍應係唔係每張檯都有，佢話幫我地跟，隔左5分鐘後先有，不過放低時亦無講任何野。

麵包的確幾好味，外脆內軟，唔怪得之唔肯比人食啦，哈哈。
牛油果配蟹肉沙律正常，蔬菜算新鮮，蟹肉份量ok, 鮮甜D會更好,總括不過不失。

薯條好夠熱，略嫌粗左D 同唔夠鹹、無咩味。

義大利飯軟硬度適中，不過帶子煮得老左少少同蝦可以爽口D。

最後兩人食左大概$800。 覺得食物同服務都有進步空間，不過環境就好好。短期內未必會返里用饍，可能飲嘢會適合D。

連續5日ot 日日差不多9點幾10點走 所以星期六點都要出去行行 輕鬆下 對自己好d 漫冇目的去到灣仔 行下舊區 行行下就去左以為灣仔舊街市 見到有間好吸引cafe 就貢左入去

餐廳以綠洲為主題 好似個森林 有好多植物 旁邊係花店 中間係餐廳 去到既時候已經3點幾 店員提醒我地3點後只有三文治蛋糕同咖啡 我地冇咩所謂 因為都係想搵個地方坐下

蕃茄牛油果三文治($45)- 係新鮮熱辣辣 個包烘得好香脆 食落唔似法包 有d似中式炸饅頭銀絲卷口感 幾好味 入面餡有好多牛油果醬 一d都唔估寒 蕃茄亦好大塊 好新鮮 整體感覺好fresh 

紅桑子芝士蛋糕($38)-蛋糕唔係好甜 芝士味唔太重 咬落去食到一粒粒籽 係紅桑子肉 蛋糕有餅底 餅底唔太薄 跟落去又冇散開 加左唔少分

Apple and peach smoothie ($46)-杯野飲係成餐最貴 飲落去唔似用新鮮水果整 好重香料味 飲唔到蘋果味 只係有浸好假既桃味 比較失望

呢到係一個可以慢慢坐底 假期同朋友傾下計既好地方 環境又靚 

開始放長假博殺既星期日 同家中獎門人去黃埔逛逛 見到有間食西餐 未試過 又好似幾吸引 咁就行左入去

門口附近係open kitchen 見到廚師們準備食物 但唔會聞到油煙味 抽風應該唔錯 晚餐除左散叫意粉薄餅之外 仲可以揀set 大概$90 有湯/沙律+主菜+飲品 都幾抵 好少可星期日假期有set

獎門人鐘意食天使麵 所以叫左大磨菇黑松露天使麵 跟沙律($98) 跟餐既包都唔錯 暖暖地 有烘過 入面仲有唔少亞麻籽 好似好健康 

沙律菜有陳醋 不過好似重手左 好酸 刺激到個喉嚨 而菜都算幾新鮮爽脆

意粉一放低就陣陣黑松露味 傳入我的鼻 大磨菇略為濕左少少 如果煎一煎 收乾少少 應該會較為香同爽 除左大磨菇 意粉入面仲有唔少白磨菇 係鐘意食菇既朋友必定要叫 可能因為天使麵比較幼身 易索汁 食食下好杰 同埋漸漸濃味

夏威夷薄餅($78) 配菜比較簡單 有火腿煙肉菠蘿 但已經足夠 因為即叫即整 好熱辣辣 雖然係薄身 但好香脆 同埋冇咁多麵粉冇咁易飽 所以我地兩個人都食得哂 鐘意食厚批既可以加$20

雞翼拼薯角($36) 薯角呢d冇咩難度同特別 但雞翼個賣相就麻麻 唔食都唔知原來係燒烤汁 黑蚊蚊 以為係煮窿唒 太多醬汁 所以味道太濃 要不停飲水

員工服務唔錯有禮貌 不過得個3、4 個侍應 見到佢地都做到踢哂腳 辛苦哂