身為西環人, 秋冬想食蛇羹都唔使落銅鑼灣, 近近地就去蛇王海打包返屋企食

蛇羹價錢唔貴, 不過都唔會話偷工減料, 蛇肉頗多, 其他配料如筍, 冬菇絲, 木耳絲也足, 加上檸檬葉, 味道很滿意, 食得滿足

另外也要了糯米飯, 呢個既味道就一般啦, 及不上蛇羹咁好食

食完暖笠笠, 秋冬果然係最適合食蛇羹

同媽媽2個人行完街搵晚餐食, 響中環中心對面見到香滑咖喱屋既廣告牌
好似幾吸引, 就去試試了

2人既食量都唔係咁大, 所以只要了一個咖哩牛腩. 另叫了一份羊肉薄餅

咖哩要了小辣, 味道唔錯, 牛腩份量不少, 又稔又入味, 啖啖肉, 用薄餅包住食, 挺有風味

羊肉薄餅就等左約20分鐘先上枱, 新鮮煎出黎, 拎上手仲熱辣辣
上下2片薄餅夾住羊肉碎, 淡淡的羊膻味, 而且應該加左d辣椒碎, 愈食愈辣, 味道幾刺激

老闆態度幾友善, 會同你介紹下, 有時間仲會吹下水咁
雖然店較小, 也沒特別裝修, 不過食得幾開心, 價錢也經濟, 會再來!

收到生日禮遇, 可享用一頓免費晚餐
不想浪費又不想一個人食咁無聊, 自然會帶人一齊食, 佢既promotion都係利用呢一點遮

閒日既8點都好多人, 等了幾個字終於可以入到坐
入面既位都幾迫, 都了解既, 銅鑼灣仲要係sogo喎, 地方當然串金尺土

免費set dinner要了鴨胸, 另一個餐選擇了安格斯牛柳
好肚餓, 不過等個餐湯都等了近15分鐘...
附近幾張枱都聽到漏單的投訴, 侍應亦忙到一頭煙, 不必期待有什麼服務可言

終於等到有野食, 多士如圖所示, 燶左少少, 龍蝦湯味道少少苦而欠鮮味, 相比之下磨菇湯就較好

主菜上, 鴨胸都幾滑, 味道亦ok
到安格斯牛柳, 7成熟, 肉質唔錯, 幾有咬口, 不過就稍欠肉味. 以原價近200蚊黎講, 真係物非所值

餐飲的咖啡是全晚最滿意的亮點, 為是次晚餐挽回一些分數

翡翠拉麵小籠包同金滿庭都試過了, 下一站就帶爸爸媽咪黎試下小南國
萬宜店既人當然比不上銅鑼灣人多, 感覺地方更清淨同寬敞
3個人不用等位就坐低左, 一早做定功課, 諗定叫咩野, 所以好快就有得食

前菜是蘿蔔, 我向來不好此道, 父母親就食得津津有味

先來一個醉雞, 咸味啱啱好, 雞肉滑嘟嘟, 不過份量就少左d

招牌生煎包出場, 一共5個, 入口後灌湯一湧而出, 鮮味無窮, 父母都很欣賞~ 但就一定要襯熱食, 唔係比個包索哂d汁就大打折扣啦!

擔擔麵: 也是出名之作, 不過味道黎講個人就覺得麻麻, 可能因為我唔太好花生醬味, 我都係鍾意用酸辣湯襯拉麵較好食

菜膽雞: 叫了2盅, 都是用雞翼. 上湯好鮮甜

菜肉水餃: 水餃皮薄而滑, 很對口味. 個醬幾惹味, 不過太細碟, 唔夠8隻餃子點

煎小黃魚: order要2隻起. 雖看似很普通的煎魚, 要整得好都唔係一件易事. 上枱煎得好靚, 唔太油又唔會乾, 魚肉入口熱辣辣, 一梳梳的煞是好吃

糖水要了紫米露, 微甜又多紫米, 也是我喜歡的味道

地方, 食物同服務都比銅鑼灣店好, 值得一讚

需要改善的地方: 無咩有特色既茶可供選擇. 呢樣真係要學下金滿庭啦

經過上環, 看見此店於永安對面新開張, 就黎睇睇

價錢都不算貴, 有幾款包都想試試, 如blueberry muffin都係6蚊而已

最後睇中了綠茶紅豆包, 12蚊有4大舊

紅豆幾多, 但又唔會太甜, 麵包既包有好多芝麻, 好香口
如果麵包既綠茶味多d就更好

會再黎買其他包試下

睇到湘川滬做promotion, 可以半價食幾味菜, 而且食滿200蚊仲送100蚊coupon, 都幾吸引, 所以就同爸媽黎左試食

叫了滬江清炒蝦仁, 特價48蚊
味道較淡, 蝦仁好細粒, 幸好還算爽口

另外土匪搶鴨也是做緊特價, 賣48蚊
勁多辣椒, 好辣, 不過辣得好過癮, 鴨肉很滑, 不會死實實, 唔錯

紅油抄手: 個紅油汁十分好味!

排骨拉麵: 排骨炸得幾脆, 拉麵頗彈牙

最後要了個馬蹄糖水, 不太甜, 味道是ok的

呢排食左唔少店舖既小籠包, 實在令我愈發記掛金滿庭

茶要了人參烏龍, 同小籠包都是一貫的高水準, 沒令我失望

前菜是怪味雞, 醬汁惹味, 雞肉嫩滑, 正!

新試了啫啫XO班球, 魚肉彈牙, 調味也夠香辣, 配菜如蒜子也吃清光

另外要了半隻香酥鴨配鴨仔餅, 呢個要等半個鐘, 皮是很香脆, 味道也不錯, 不過鴨肉稍嫌乾了點, 扣左d分. 而鴨仔餅只是一個形狀較得意的饅頭, 味道就無甚特別

第一次食譚魚頭, 朋友極力推介蕃茄鍋
6點幾去到, 先叫了個湯底慢慢煲, 再諗下叫咩食
服務唔錯, 侍應好快手幫我地分好一人一碗湯

個湯底又真係唔錯, 好清甜, 我添左幾碗
而加湯又係用返蕃茄湯, 所以個湯底食到最後都仲係好濃

野食方面, 叫了水晶奶黃包, 肥牛, 鮮蝦韮菜餃, 香菇水餃, 竹笙, 芋絲, 娃娃菜, 秀珍菇, 帶子片拼珊瑚蚌, 蝦丸拼墨魚丸. 大部分食物都唔錯, 特別係奶黃包, 要小心個流心呢!

野飲叫了豆漿, 因為做緊特價, 都幾好味

地方清潔, 廁所都好乾淨

為左個湯底, 一定會再黎!

這陣子抽中了八達通日日賞積分, 所以多了去東海堂用積分買麵包做早餐

香粟包: 做promotion, 5個半有交易, 好多粟米, 甜度啱啱好, 叮返熱黎食一流, 推介!

粟米咸牛肉: 咸牛肉只有薄薄一層, 粟米也少, 而且兩者味道格格不入

脆皮藍莓: 都幾脆, 味道就無咩特別

鮮奶包: 表面平平無奇, 不過飽質好柔軟, 入口清甜, 唔錯

麵包全部獨立包裝, 感覺好衛生, 不過就有d唔環保呢!

此店冒起一段日子, 直至新年先有機會一試

蝴蝶酥似乎好出名, 就先試一塊, 唔... 我又覺得無咩特別, 唔係好脆, 又唔係好香, 吃罷並無再試一塊既衝動

再試曲奇, 反而真係唔錯
最好味既係中間黑色哈哈笑圖案既朱古力曲奇, 又薄又脆, 朱古力香味濃郁但又唔會過甜
芝麻曲奇亦值得一試, 咬落啖啖芝麻香
而五穀籽曲奇同樣有芝麻味, 不過同時又有其他穀籽, 很有咬口

朋友話川椒榛子曲奇同咖啡合桃曲奇都好味, 試完覺得味道算特別, 不過個人就鍾意以上3款多d

另外幾款多d牛油既曲奇, 我就麻麻地鍾意

曲奇黎講, 我鍾意無咁大陣牛油味既, 所以曲奇四重奏亦幾啱我胃口, 不過就貴左d
另外如果可以自由配搭自己鍾意既口味就更好啦, 咁就可以淨係買我鍾意食既果3款