佳佳甜品 (佐敦)

跳舞之前唔想食正餐咁飽, 最好就係食甜品~

見呢間人氣咁勁, 就試下佢~

但天口有D熱, 所以叫左凍燉木瓜. 其實係糖水加木瓜一個好簡單既甜品.

木瓜料好足, 舊舊大舊同硬度適中. 糖水既溫度係剛剛可以消暑又唔會凍到頭暈既好溫度.

甜味FIT SAI. 糖水同木瓜本身既甜味混係一齊, 唔會過份甜~

GOOD!

下次應該試下大家都讚既合桃露,蕃著糖水同湯圓!

好多人. 我話可唔可以企係度堂食(有D趕因為我), 佢話好快有位, 轉個頭真係就有位啦.

詩餅坊 (西環)

話說要發掘下中西區既美食, 搵搵下就比我俾到呢間餅舖.

見人人LIKE 紅豆綠茶蛋糕, 當然係要試呢個~

媽媽係附近跳舞, 於是就叫佢買番黎~

個盒都好靚, 計設得甚有心思. 不過無映到相...

買左2件紅豆綠茶蛋糕, 1個檸檬TART同1個藍莓TART.睇食評D相以為咁既SIZE, 見到, 原來比我想像中細得多.... $30一個, 真係要試真D!

一開始食D綠茶卷就已經不得了! 拎起唔會黏手, 食落去唔駛咬就咁嗒已經會慢慢融化, 口裡面充滿住好香好濃既綠茶味. 而裡面既綠茶CREAM溫度稍為凍D, 令到口感食落去好特別, 當外層融緊既時候, 你就會FEEL到裡面凍凍地既但又唔漏既綠茶CREAM. 甜度適中, 做呢D卷卷應該用左好多時間.

然後食埋裡面既蛋糕. 綠茶加埋紅豆味超OK~ 鬆軟,同埋濕度唔係話太濕或者超乾. 另外你唔會覺得要特別咬D紅豆, 好似紅豆同個香濃綠茶蛋糕已經融為一體咁. 仲有講埋D 蛋糕既綠茶CREAM, 因為只係佔個蛋糕一小部份, 所以唔會話太多太creamy'濟'左

簡寫既話: OISHI!之後就試LEMON TART. $28

聞唔係好聞到檸檬既味, 但係原來食落口感係咁豐富~ 佢唔似芝士餅咁實既豐富感, 佢係滑SAI SAI然後係你口度溶左, 幾乎好似液體咁落左喉嚨. 個質感真係幾過癮, 可以講係蛋撻再硬少少既感覺. 食落一開始有D酸, 以為酸得濟. 但嗒嗒下先FEEL到LEMON既香同甜味散番出黎.

而個曲奇皮就無咩特別, 不過做得幾薄就真.

最後就係藍莓TART. $28

對比之下真係比下去, 因為實情係無咩內容, 得藍莓同個TART, 藍莓用料OK, 唔酸, 仲爽. 但係28唔值.

總括黎講, 最正當然係紅豆綠豆~ LEMON TART都其實同佢有得揮!

再試其他呀要!!!!!

南記粉麵 (中環)

南記~我細細個就聽過佢個名, 睇下佢D招牌麵~ 仲有D新野~

中學成日食午飯都食~ 好耐無食過, 趁今晚無住家飯食, 黎左呢黎食~

中環夜晚都咁多人食快餐? 好誇張.

叫左個以前黎到必食既墨丸春卷河!

而家都係$21 JA! 以前好似係$16? 唔記得...

唔~ 佢湯底D味同以前無咩點變! 好懷念以前既日子!

墨丸春卷都係咁既樣. 春卷無細條到, 咬落去都係咁既質感, 墨丸都係幾彈下!

咁食好滿足! 但如果大碗D會開心D!

查理布朗咖啡專門店 (尖沙咀)

與好耐無見既朋友girls talk, 尖咀大家都方便, 就揀左呢間食評都OK既charlie brown cafe.

去到, 原來係行一層上去既~ 感覺不俗.

因為同朋友吹水, 唔係好留意環境, 不過去廁所見到一幅lucy馬賽克牆~ 絶對係有心思既設計.

同朋友3人share 3 款cake~ 要左薑汁芝士餅, 軟心朱古力同豆腐芝士蛋糕(lucy light). 自己就點左杏仁鮮奶咖啡.講下D cake, 印象最深刻係軟心朱古力. 嘩! 佢個味做得濃, 又有唔同layer, 最底係朱古力味蛋糕底, 中間係紅莓味既JELLY狀物體, 上層係朱古力mousse. 食既時候感受到佢唔同layer質感之餘, 仲食到佢唔同既味道. 雙重朱古力質感係口裡面徘徊既時候, 紅莓既甜酸味就慢慢湧上黎. 呢個配搭令到個cake唔會太漏, 又有新鮮感, 絶對值得一試!之後講豆腐芝士蛋糕, 成舊都係mousse質感, 加埋塊餅底, 一嗒就feel到豆腐既味道, 幾滑又唔係好甜, 諗番係以前ok既豆腐雪糕隻味. 反而芝士味就唔係好食到. 不過豆腐呢隻味真係唔錯. 仲有薑汁芝士餅, 薑汁味係OK~ 幾特別, 呢舊就濃D芝士味. 仲有個餅底. 但係唔知係咪太濃太漏, 食呢舊好快'劑'左, 同埋佢個質感好實, 比平時既cheese cake實好多, 一啖食落去就覺得太多唔駛再食第二啖. 但係鐘意薑汁味既人仕都多可試下.講埋杯杏仁鮮奶咖啡, 見到拉花當然即刻映相, 味道其實又無咩杏仁味, 所以下次可以叫其它.

整體ｏｋ～　再去可以試其他款既ＣＡＫＥ同咖啡～～～～

不過越晏就越多人,有ｄ嘈.

福元湯圓 (北角)

本來有d驚又俾食評'厄'左, 但係黎得呢頭真係點都試下, 一次又好, 有下次當然最好!

於是晏周5點幾黎到. 看似少客, 可能未到食糖水時間. 見到大家都讚湯圓, 當然試呢樣. 但又見到自己like既杏仁糊, 所以就叫左杏仁糊加湯圓.

一路等既時候, 有幾個客人黎左, 有d叫外賣, 有d就食得快快咁又走左.

都真係幾多人幫襯~

等左差唔多十幾分鐘就有啦. 聞落去, ok香, 有杏仁既味道, 飲落去唔係好甜, 甜度適中, 杏仁味出度, 個人覺得ok~

到重頭氣湯圓, 試左芝麻先. 皮唔厚, 厚度岩岩好唔會薄到漏餡, 咬落去煙韌唔會好粉.一咬, D芝麻就係個口度流出來, 流到成隻匙都係. 聞到D芝麻香, 未食已經覺得好濃D味.

食落去, 嘩, 不得了! 好正, 芝麻既香同濃味係我個口度徘徊, 甜味岩岩好. 簡直係無得頂!

之後再試花生, 餡亦都係好充足, 有一粒粒既花生仔, 食落有口感, D味都好濃, 白芝麻既香同花生混得岩岩好.

但係成碗杏仁糊個人認為太多, 下次可以淨叫5粒湯圓.

下次黎呢頭都要食!