圓貝 (將軍澳)

周末上完堂同小朋友去Mother Pearl
用天然食材同人手製作嘅健康版茶飲
最近出咗KID MENU🥤

Mother Pearl 用上不同天然食材
以茶飲製作方法創出新元素
自家製植物奶、天然糖漿同手工珍珠都係人手製作
KID MENU入面嘅茶飲每一杯都有非加工食材
會食到牛油果蓉、菠蘿、奇亞籽、開心果 等等
一系列「零罪疚感」而且有營養嘅茶飲🧋
無咖啡因小朋友都啱飲
而且口感豐富😋仲好飽肚

私心推介🤭✨
🍋Baa Baa Black Pearl 爸爸羊
🍫Cookie Monster 曲奇怪獸

泰海鮮 (屯門)

早幾年同朋友嚟過三聖食海鮮，喺海鮮檔買完就拎去隔離啲餐廳加工就得。最近又約大班朋友去三聖，今次朋友先入去買海鮮，大家再喺泰海鮮集合。


喺泰海鮮可以選擇喺大廳定包房，包房當然會貴一啲，不過都只係計算加工料嘅價錢每兩加$1，而且多咗私隱度同空間，一班朋友嚟都唔錯。如果想熱鬧啲咁食海鮮就可以喺大廳，價錢就更划算。 

食海鮮雖然都係蒸炒焗，但係交俾泰海鮮就可以變出唔同款式。

最親民嘅貝殼類可能就係花甲，聽過有人唔鍾意食唔同嘅貝殼類，但花甲真係好少人唔鍾意。唔似蜆仔得丁點肉，花甲肉一口剛剛好，肉身爽口又鮮甜。無用傳統豉椒炒花甲，換上西式嘅忌廉汁，甜甜哋散發濃濃嘅白酒香，提升花甲嘅鮮甜。
平時配海鮮可能用伊麵底，今次轉放有咬口嘅烏冬，掛汁力十分強，每條都沾滿白酒忌廉汁，超級惹味！

喺泰海鮮最愛嘅小食一定係芝心蝦丸！雖然話係海鮮，但蝦丸嘅芝士心真係邪惡！而且包住外面嘅麵包粒炸得非常透徹，超級邪惡！不過唔好咁心急食，小心芝士辣口呀！
個泰式辣醬令我諗起嚟親泰海鮮好似都無食過泰味喎！下次再嚟記得要試冬蔭湯煮先！

仲有一樣都算係泰海鮮嘅經典，就係佢個海鮮蕃茄薯仔湯！
喺街市買完海鮮，店家通常都會半賣半送畀多袋雜魚、蜆仔乜都有啲嘅海鮮你，只要拎埋去泰海鮮，加多每位$18加工，就可以飲到呢盤鮮味十足嘅海鮮湯。因為用料足所以餚出嚟嘅湯極鮮甜，記得趁熱飲呀～ 

總結一下，山長水遠入三聖係麻煩啲，不過成班朋友去係開心嘅。味道我覺得好啱香港人口味，清蒸又得，重口味又得，仲有得揀配伊麵、烏冬、飯，幾癲！
隔咗幾年再嚟無乜好挑剔，埋單除返開人頭計500蚊有找，係抵食嘅！

是次小分享完畢，有興趣可按其他分享

The Farmhouse 咖啡廳 (北角)

早排朋友約食buffet，見就喺公司附近，Happy Friday就蒲下頭啦！地點就喺北角碼頭旁邊，7月先開幕嘅海匯酒店Hotel VIC。

The Farmhouse無金碧裝潢，整體用咗earth tone設計，有梳化位又有露天位(暫未開放)，充滿田園氣息，反而更舒服。

食物方面，分開冷/熱兩大區，海鮮雖然無即開生蠔提供，但係選擇都豐富，有龍蝦、蟹腳、凍蝦、翡翠螺、青口同蜆。最緊要有refill，未見過吉咗。
旁邊刺身櫃都唔弱，魚生即點即切，有牡丹蝦、帶子、八爪魚、吞拿魚、三文魚，同幾款手握壽司，仲畀我發現有人點即開海膽做軍艦，我當然即刻都order一份！

後面個雪櫃仲有沙律、ham、煙三文魚同芝士，款式唔算多，但係都足夠。隔離竟然仲有即榨新鮮蔬果汁，有雪梨、甘筍、橙、西芹等等畀你任揀任mix，第一次見酒店buffet咁招積！當然飲品仲有coffee or tea同汽水。

熱盤區就喺餐廳最入面，長長雲石枱放滿中西東南亞菜，一入去就係石燒，有燒牛肉、串燒、羊架，每晚仲有煎法國鴨肝或者焗生蠔。

沿長枱行過去仲有唔同嘅即叫即煮，好似意粉、通粉、闊條麵、拉麵、河粉等等，將材料自己食幾多夾幾多交畀師傅，保證熱辣辣。
仲有個特大蒸籠，入面有各款中式點心，旁邊仲有燒味、水煮牛肉等等中菜。
但我覺得最正都係個燉湯，我去嗰晚係螺頭蟲草花！

最後去返甜品區，其實就喺一入門口，都係冷凍區就有部好大嘅旋轉雪糕櫃，閂咗門入面就會一直轉，開門就會停，望住佢轉好治愈。入面放滿Movenpick、Haagen-Dazs同牛奶公司雪糕杯同雪糕批。
旁邊仲有師傅即點即制crepe同waffle，仲可以自己DIY豆腐花，有得食又有得玩！雖然小件裝嘅甜品款式唔算多，但係賣相相當精緻，都有泡芙、Tiramisu同抹茶蛋糕等等。

可能因為5歲以下免費，夾夾埋埋啲優惠真係好啱家庭客，同場大部份枱都有小朋友哈！
以五星級酒店嚟講，食物、環境、服務都好好，只係無其他大酒店嘅「排場」。就算你未有小朋友，想試下新場或者喺港島東搵地方gathering不妨一試！

－成人：星期一至四 $598/星期五至日 $668
－6-11歲小童及65歲或以上長者：星期一至四 $299/星期五至日 $334
－5 歲或以下小童免費
*另收加一服務費
*消費滿$1000以上可享3小時免費泊車

仲有只要Like Hotel VIC FB/IG就可以獲得85折，優惠做埋9月咋！

桃園眷村 (旺角)

來自上海嘅早餐品牌網紅店「桃園眷村」早前已經登陸香港，地點就係朗豪坊原Mos Burger位置。桃園眷村賣嘅係台式古早味早點，主打鮮製豆漿、古法手工燒餅、油炸鬼，三年前喺上海開張，而家已經發展到全中國有超過30家分店，真係個個都去打卡，唔通個個都專登去打卡咩！
桃園眷村裝潢用上文藝風，牆身簡約乾淨，店入面嘅「時間，在舌尖」充滿文藝腔，呢種台灣文青氛圍，無疑是近年大熱嘅中港台餐廳包裝。
香港租貴地方有限，所以嚟到香港就要走快餐風 ，店入面以開放式設計，而且要用再生紙杯紙碗嚟節省清潔時間，加上位置連室外位，基本上都唔太需要等位。不過就無咗碗底嘅文青短詩，呢方面就差咗少少。
國內店環境
你可能會覺得桃園眷村賣嘅豆漿、油炸鬼都係普通嘢，不過原來都係店內用獨門方法每日鮮製現磨！ 而且豆漿豆味清新，甜度仲可以按口味加減。
除咗鹹、甜豆漿之外，豆花都有鹹、甜畀你揀！我就試咗鹹豆花（$32）配菜有菜脯、蝦皮、紫菜、葱末。第一啖好特別，就係好多香口配料嘅滑豆腐咁囉，不過口感的確出奇過癮。
另外飲品仲有米漿、紅茶豆漿、紅棗豆漿選擇。

香港人習慣用油炸鬼配粥，喺台灣同江南等地就用嚟配豆漿，不過今日好似已經賣晒。。。（桃園眷村的確每日都有部分食物係唔提供㗎！）

桃園眷村第三寶就係手工燒餅，燒餅就係傳統台式芝麻燒餅，新派做法就將佢切開再放配料，芝士、沙律菜、燒雞扒、炸魚柳等等。今次就試咗芝士蛋燒餅（$42），燒餅脆卜卜，如果可以熱啲，啲芝士有少少溶就好喇！卡卡～
另外功夫辣雞腿燒餅 、燒餅油條蛋、豬排蛋燒餅都係推介喔！

桃園眷村除咗三寶之外，我仲好喜歡食即包粢飯，餡料好豐富㗎！唔同上海鋪嘅獨孤一味得肉鬆油炸鬼粢飯，所以我就點咗青瓜肉鬆飯糰（$34）， 除咗青瓜之外，仲有炸到卜卜脆嘅肉鬆同增加口感嘅菜脯。如果想試下台式啲嘅口味可以食台式香腸葱蛋飯糰同肉燥滷蛋飯糰㗎！
是次小分享完畢，有興趣可按本站內其他分享

Espuma (中環)

ESPUMA嘅下午茶一向大受港女們歡迎，無他嘅，只要經常轉下款式，加一啲糖果元素（就好似一舊大棉花糖），影出嚟嘅相就可以完美呃Like！
之前都有同朋友嚟到ESPUMA食Tea同甜品，中環店好開揚，望出去就係半山勁優雅。最近佢哋搞搞新意思推出火鍋同大家過一個暖笠笠嘅冬天。
今次Afternoon Tea set有5款甜點同4款鹹點一共有9款小食。甜點分別有香脆窩夫、自家製藍白雲棉花糖、馬卡龍波板糖、三色芋圓同鮮雜果。而鹹點就有炸雞格仔餅、八爪魚配鮮芒莎莎、迷你炸魚薯條筒同忌廉粟戈一米肉碎脆餅。
「湯底」就有2款甜湯可以選擇，分別係伯爵茶火鍋同紫米露火鍋。我就點咗紫米露，直接將Waffle沾「湯底」食又得，或者將芋圓加入火鍋煲煲佢仲可以當糖水食。
火鍋上面一舊棉花糖真係好Suprise，可以撕落嚟食又得，等佢溶咗落「湯底」亦得。嚟到ESPUMA當然少不了最回味佢嘅自家製scone，配鮮忌廉同士多啤梨果醬好滋味！
下午茶可以選西班牙Novell即磨咖啡、伯爵茶、綠茶、烏龍茶、紅茶，如果想飲品都嚟個特別啲，可以加$15轉配其他特色飲品。
是次小分享完畢，有興趣可按本站內其他分享

棉花糖火鍋下午茶 Cotton Candy Fondue
價錢：$248/2位(另收加一)
供應時間：2:00pm-5:30pm