勝香園 (中環)

無論食幾多次，都係覺得唔夠，會仲想再食

是日叫咗茄蛋腿通同兩隻檸蜜米奇，再加鹹檸七


小妹喜歡食通粉，而且唔知點解通粉個蕃茄底係比麵底濃啲同杰啲，簡單黎講就好味啲，所以好茄嘅朋友記得食通粉喇
其實勝香園有好多款脆脆，不過小妹偏愛檸蜜米奇，食落甜度適中，帶有檸檬皮嘅小少苦味，食兩隻都唔會太漏，正。

小妹曾經試過趕時間打包一路行一路食，但係會變咗唔好食，所以一定要坐低就叫，等食完粉個包就整好，跟住即刻食就最好味喇

提示：有啲人會覺得班呀姐服務態度麻麻，其實只要禮貌啲，唔該前唔該後，班姐姐就會好好相處

公和荳品廠 (深水埗)

未知是否太耐無飲，從前懷舊的紙杯豆腐，今日已變成膠杯，而且是是已密封的。

雖然無選豆漿的味道，豆味香濃，滑溜溜唔會飲到一舊舊豆渣

而且可以按個人口味選擇少甜，在一箱冰中取出，夠晒凍。

極尚大喜屋 (尖沙咀)

朋友聚會，聽講極尚好掂，好好食，所以大家決定試下。
因為是星期五，就大家放工，所以訂了第二場8:45。
從openrice得知好多人食，我們也不敢太遲，8點半到已經排了二、三十人，在我們等候期間，隊尾已轉彎，實在太恐怖了。
所以建議有心想食嘅人就派個人早啲去排隊喇。

等等等，終於等到9點左右，才能入坐

餓咗成晚，六個人坐低就打算分頭點野食，又得一支筆，於是我地好聰明咁拎出自己嘅私家筆畫野食，點知個服務員收紙果時同我地講：「你地唔可以用其他筆咖，因為可能會甩色，又或者會睇得唔清楚，我地唔負責咖」然後就俾返叠紙要我地再寫過！

雖然係咁，但啲野食的確唔錯

魚生好新鮮，每樣叫16件就真係黎到8成，而且冰底夠厚，食到尾都無水浸嘅情況

壽司有好多選擇，飯底唔算多，可以食多幾件都得

火炙壽司選擇多，不過略嫌燒得唔夠，另外穴子原來即係鰻魚，正

燒物一般，普通貨，無特別影

沙律有太多選擇，味道差不多

最後甜品每樣點了一份
上圖全為芝士蛋糕，不過唔同口味囉。
下圖分別係朱古力慕絲，太甜！白酒啫喱，怪味！芒果布丁，千祈唔好試！

當然有傳聞中嘅H字頭雪糕啦，不過每人限食一杯。

總結9點坐低，搞一輪再到有野食都9點半，10點半叫我地埋單，10點9就last order，加埋之前企街嘅時間，同埋呢個價錢，我俾多少少錢去食自助餐仲好啦，起碼可以食多幾杯H記雪糕嘛

大快活 (慈雲山)

放假搵奶奶食lunch
佢話想試下叉燒煲仔糯米飯
幸好只是叫了一個餐，因為食少少已經好飽
叉燒又瘦又乾，白雪雪，淡茂茂
反而個糯米飯幾好味，有少少花生撈下
雖然明知唔會係用煲仔燒出黎，
但食到底有少少飯焦，
似係有燒過下，都算有誠意啦
希望可以改善下啲叉燒

南龍冰室 (銅鑼灣)

冰室呢個名不禁令人覺得好懷舊，
但食嘅野又好新潮。
坐低見到隔離兩位小姐食緊金磚咖哩飯，
見到就吸引，可惜一個人一定食唔晒。
唯有叫是日午餐啦

揀黎揀去，最後決定食最普通嘅B餐

估唔到汁同意份原來是分開上的，客人可以自己選擇落幾多汁，真係好貼心喔

一邊食一邊撈，汁裡面有好外火腿同雞絲，又有好多粟米粒，用料充足
個汁就係忌廉汁，甜甜地囉，由於份量算多，雖然已經好努力食，但都係食唔晒。