城中小閣 (尖沙咀)

常言道，民以食為天。食，當然要講究，今時今日，除了色香味外還要健康，養生，簡直是天方夜譚。但今天，我為大家帶來一個驚喜，一個色香味健康養生再加上價錢公道得可怕的一間尖沙咀中菜館。
城中小閣，位於尖沙咀及佐敦交界，柯士甸道與彌敦道之間的中菜館。
一聽餐廳名字，就聯想到繁華的城市裡有一閣樓給大家放鬆心情之餘亦品嚐佳餚的地方。餐廳位於一樓，轉入柯士甸後的咖啡店旁有一商廈。在商廈門口只放上一塊板(不算顯眼)
電梯打開，給人感覺很清幽，再加上餐廳的落地大玻璃, 陽光直射入內, 令整個環境白色一片, 非常舒適。菜單上寫上＜高雅菜式　家常演繹　天然粗菜　巧手呈現＞這句說話令我想起當年小祖，出入都是家﹑學校﹑補習社。如今，工作已佔用了大部分時間，自己一人生活，回家後空無一人，想要家常小菜﹑滋潤湯水更是困難非常。人大了，自然會珍惜以前，可惜時光這個壞人偏卻冷酷如許……
茶是六安茶－一個我完全陌生的茶種，因為成本高，很小茶樓有。不說來歷，一渴茶質不錯，有微微的普洱味，茶水亦十分甘甜。功效更是可以下火﹑消滯及祛濕，最適合捱夜一族。砂窩雲吞雞餐＄１４８／２位用
1. 砂窩雲吞雞湯是濃濃的奶白色，一看已經垂涎三尺，二話不說喝了頭啖湯，無比鮮甜，反而覺得娃娃菜經過雞湯洗禮後，小祖覺得比雲吞及雞更為好味，娃娃菜才是主角呢！
2. 陳醋雲耳青瓜
小祖認為青瓜很清甜，但不算特別。
3. 小閣石窩海鮮飯小祖不是很喜歡石頭窩飯，感覺很焗促，很難呼吸的感覺，不覺同事想吃，沒辦法…...但飯炒得很好，粒粒都是金黃色，亦不會過濕，口感很好，午市能夠有此水準，值得一讚。
金銀菜燉白肺$58店內最受歡迎的燉湯之一，這個原盅燉湯簡直是物超所值，足料之餘，最重要的是豬肺清潔的十分乾淨，湯如其名：白肺，清甜下火。
ＸＯ醬炒腸粉＄４８小時候每次去茶樓，爸爸都會叫一碟炒賜粉，簡單又飽肚，所以今次下單炒腸粉都走唔甩，哈哈！
玉盤艷素＄８８名字十分吸引的健康素菜，材料有冬瓜、雜菌等，落鑊一炒再加上湯打茨，味道很香，吃下也清新但不油膩，不論素食者與否都應嚐試一下。
香煎馬蹄糕＄２５這個馬蹄糕真的很好吃，已經沒有一個詞彙去形容。煎得剛好，香之餘又不會有很多焦，水準真是一流！
楊枝甘露(凍)＄２８「觀音用楊柳枝撒下甘露般令人神清氣爽」

現在除了回母家吃飯是健康外，基本上每餐都是味精很多的，難得工作範圍內有一間感受到家常小菜的地方，一定會好好珍惜。

滾得囍宮廷火鍋小炒 (北角)

天寒地凍，最適合打邊爐。奈何每次都好難約齊人去滾下！今次難得新年前食個團年飯，當然要去間舒適d啦！

位於北角的滾得囍，主打宮廷火鍋，環境亦恍似置身于宮廷之中。另外不論鍋爐及餐具及菜式亦配合得很好。

坐得當然要叫個象拔蚌刺身啦！
新鮮又好食！
之後當然唔小得牛牛！本地牛好有牛味！

另外黃金響鈴，一班女士真係好愛，不過一舊起兩舊止好啦，好肥呀好飽呀真係，野食好味，服務環境都不錯，美中不足係刺身比較慢先黎，可能太忙吧，不過都值得體諒既。

京林屋 (銅鑼灣)

自從上次係太古食完之後一真都念念不忘，見到原來銅鑼灣都有間就即刻入去，想試下上次冇食過既野。
讚岐烏冬：
叫得讚岐烏冬個精綷梗係係個烏冬度，但係估唔到個湯底一啲都唔輸蝕。湯底勁濃郁，個烏冬索哂湯底既味，配埋魚餅冇得輸。



金目鯛魚定食：
唔好見到個樣好似平平無其冇乜特別咁，一食落去就知道外表唔可代表一切。金目調魚既味道一啲都唔寡，味道好豐富，一下子就食哂成個定食。


抹茶卷蛋：
抹茶卷蛋入面既抹茶忌廉做得好幼滑，食得出係用心製作。卷蛋仲配埋抹茶雪糕同紅豆，滿足哂想食甜品既慾望。


林屋抹茶芭菲：
見佢寫住依個係全店最暢銷既甜品，忍唔住就叫左黎試下。果然冇令我失望，除左有厚厚既一層抹茶雪糕，仲有好多唔同既配料，好似抹茶蕨餅、小丸子咁，真係過足口癮。


焙茶牛奶忌廉：
試得多抹茶都想試下其他味既茶品，飲落有烘焙過既味道，比起抹茶多左一份新鮮感。而且口感非常幼滑，仲好香焙茶味添。


京林屋所有食材都非常優質，而且服務態度好好，下次要再試下其他野食。

京林屋 (太古)

身為抹茶控既我，係太古行街見到京林屋，即刻就入左去試下。內部環境舒適，充滿日式風情。

京式鰻魚飯配桃味焙茶：
依度樣樣野食無論係甜品或者定食都會擺得靚靚咁上枱，令人未食都已經流唒口水。京式鰻魚飯面頭鋪左厚厚一層鰻魚，配蛋絲同紫菜絲食落去層次好豐富。

桃味焙茶一黎到已經聞到好香桃味，估唔到飲落去桃味更香濃，即使沖到第三杯，茶香仍然好足夠。

林屋和式料理：
抵食之選！！依款定食有鯖魚、日式麵豉湯、帆立貝、八爪魚沙律等等。俾你一次過試哂唔同既野食。

抹茶牛奶忌廉：
黎到京林屋又點可以唔試下佢既抹茶產品呢？一試果然冇令我失望，茶味香濃之餘配埋牛奶忌廉又別有一番風味。

秘製抹茶蕨餅：
抹茶蕨餅一食落去有濃郁既抹茶味，加上甜甜既黑糖漿令佢既味道提升左去另一個層次，抹茶控必試！



香港限定芭菲：
因為見佢寫住香港限定，所以就叫左黎試下。一如其他食品既高質素，抹茶雪糕有抹茶味之餘仲有牛乳既味道，配埋紅豆、小丸子等配料好夾，令人一試難忘。

京林屋既食物選擇好多，而且質素極高，下次要再試下其他野食。

Non Kitchen (觀塘)

身為食肉獸既我，一見到non kitchen推出左個任食澳洲穀飼肉眼扒既promotion, 忍唔住即刻要試下。每人都係二百幾蚊，仲包埋自助沙律吧、飲品同甜品，真係抵到估佢唔到。




新鮮生蠔：
去到有服務員同我講話只要係facebook like & share就有兩隻生蠔送，即刻二話不說就照佢說話做，唔好以為係送既就唔好食，估唔到食落又幾鮮甜仲幾重海水味，連我唔係好食生蠔既friend都食左隻。



自助沙律吧：
有好多唔同既選擇，望落好吸引，我自己都忍唔住夾左幾碟黎食。食得出佢啲食物有用心製作，唔係求求其其。








澳洲穀飼肉眼扒：
重頭戲就梗係佢個主菜澳洲穀飼肉眼扒啦！！！個肉眼扒好足料，塊扒仲大過我塊面呀！食落好嫩同好juicy，加上佢落左啲黑椒同鹽吊起左塊扒既鮮味。食完一塊唔夠喉即刻叫多塊黎食，真係過足口癮。



戀愛世紀：
食左咁多肉想叫杯酸酸甜甜既飲品，服務員就推介左依杯戀愛世紀俾我，係一杯士多啤梨既特飲，飲落好開胃，啱哂食左咁多肉既你。



蜂蜜紅棗杞子茶：
我個friend就揀左蜂蜜紅棗杞子茶黎飲，飲落清甜又潤喉，加埋紅棗同杞子夠哂健康，係一個唔錯既飲品選擇。



奶油窩夫配雲呢拿雪糕：
個餐包埋甜品，食落唔錯。個窩夫夠鬆化，仲有奶油夾心，食落好夾，配埋個雪糕一絕。仲有啲生果伴碟，夠哂賞心悦目。



任食澳洲穀飼肉眼扒既promotion性價比極高，多野食之餘仲要高質素，好值得去食多幾次。