華悅海鮮酒家 (觀塘)

難得平安夜休半日，收工去附近飲個午茶先鬆人。兩條友費事四圍揾就黎呢度。

好耐冇來以前好似叫"金X"，轉咗名，門面依舊。上到樓，嘩! 乜仲殘過之前嘅?! 枱布仲變咗D永遠唔會換，只會抹兩抹的膠枱布，好"地茂"喎!

坐底叫茶，見有個牌話午茶每人免費有二兩蝦，問下坐收銀似經理嘅阿叔，佢話: 有! 除即係部機襟兩下。

好快蝦已送來......嘩! 冇乜賣相可言
，兩個人有6隻。免費就算la 唔好咁多要求。

點心原來不是寫紙，係自己出去攞。咁啱幾條痲甩老一齊走咗去，阿姐揭開所有籠由我地自己攞，不過冇腸粉，炸野囉。

食咗5籠，味道過得去，碟頭ok. 不過選擇少囉。





食飽起身去收銀埋單，個好似經理阿叔計咗我六個點心，好彩我望下張單!佢話唔好意思，佢睇錯喎!


之後望下食評先知呢度咁多負評，真係執番身彩!講真心! 好難有下次la。

翠園 (沙田)

在新城市廣場，由N年前同系的美心開始，到現在的翠園，相信是不少沙田友的集體回憶。碰巧家人聚腳，說有信用咭新優惠套餐，又即管試下。

週六晚坐冇虛席，人齊即上菜:

1. 冬瓜盅: 用料算新鮮，味道比較清
2. 黑椒珍珠爆雞球: 算是惹味，但翠肉瓜有苦味
3. 芝士上湯焗大花蝦: 算是好食的一道菜，花蝦大隻，唯伊麵少D
4. 蒸原隻吉品鮑魚: 完全冇味，似湯渣多D，好明顯鮑魚殼只是裝飾，不是原身鮑魚。
5. 金衣花枝球: 冇味，又靭
6. 瑤柱杞子菜苗: 味淡普通
7. 蠔皇鮑螺片: 大路貨色，no comment
8. 黑白胡椒雞: 隻雞好似浸咗好耐，D雞肉上碟時已幾乎散晒，而且完全食唔出胡椒味，雞肉好"鞋"。
9. 椰香芒果凍: 夠凍，果肉多，ok la

服務嘛....只能用"亂嘈嘈"來形容。套餐點啤酒黎咗橙汁，甜品追咗四次才送來。最攪笑係食完晒收晒碗筷先發現仲有半壺冬瓜盅未分，又要再開過D湯碗再分過。

千零蚊唔算貴，但冇性價比可言，食物質素及服務甚至比街坊酒樓還差一截。

Promenade 西餐廳 (紅磡)

(唔好意思, 無相, 因為影唔落手 !!)

老婆想食buffet, 由於之前在這裡食過tea, 質素很好,於是力薦, 結果比佢鬧死….

-refill很慢, 第二round開始, 很多已是空盆, 要來回多次, 才攞到少少嘢。
-熱葷少預左, 但係極少, 得幾種 (雞翼, 腸仔, 素鴨, 魚塊, 迷你pizza, 薯條) 唔好食, 炸魚塊, 迷你pizza,薯條都是又凍又硬
-冷盆壽司很少, 很快比人攞哂, 空空如也
-沒有介紹中有的生滾粥, 即製湯麵冇半個鐘睇住個廚師收檔走人！你走? 我都未攞!
-主打是芒果, 只見芒果布甸, 楊枝甘露個空兜, 開場第一盆芒果拿破崙給攞完後, 熱切期待, 等了很久很久終於再出了, 飛身去攞翻件招牌野比老婆補飛啦…. 弊! 大鑊!! 乜原來咁難食嫁, 怎麼主打甜品可如此差劣, 餅厎厚約半寸, 佷硬又唔脆, 吉士極少,部份連吉士都冇, 就算有,都只有1mm左右, 面上一片紙咁簿的芒果片, 完全唔似酒店出品。
- 其他甜品都唔掂, 無錯, 甜品係甜, 但今天的甜品真係甜到嘔, 甜品區的甜品到了中段已無人攞了, 小碟甜品和完整的cake都無乜人掂
-到了buffet開始後1小時左右, waiter過來要求先埋單, 無問題，這點早知, waiter態度也好的, 但埋單後 ,突然覺得冷氣凍左好多, 想人早d走都唔駛開到咁凍呀？ 唔係誇張, 真係凍咗起碼5度, 得番1x度, 真係凍到唔走唔得, 其實已經無野好食, 不過坐多陣都唔比囉,( 只係4點幾, 而tea是5時半完的) , 這種手法很差呢!!
-以前食過, 水準不錯, 價錢和食物質素合理, 怎麼現在咁差, 選擇小, 質素差連主打甜品都唔得, 真係徹底失望, 怕怕….無下次

Amour Cafe (佐敦)

行街路過，老婆話Openrice見過comment，又未食嘢，於是一試。

地方比較陳舊，但幾多人，有8、9成滿。剛好有兩人起身攝到位。叫咗兩個茶餐，蕃茄豬扒意粉，白汁雞翼意粉、檬茶和咖啡。不過樓面得一個妹妹睇檔，又要落單，又要執枱，又要遞餐。我地碟意粉到咗，張枱都未執同擺位，於是不斷的等、、、

食味都OK，但我地發覺遲過我地落單既人，叫同樣嘅嘢，份量至少比我地多三份一。飲品一般，冇乜特別。

有其他選擇，都應該唔會再嚟。

鴻星中菜 (旺角)

預早同家人食母親節餐，難得有人安排唔洗自己搵地方，準時出現就得。

好多年冇行呢度，因為商場裝修過，面目全非，攪咗一輪先上到嚟。印象中應該係N年前"美X皇宮"嗰度。

地方都算企理，我地人少少，就揀咗個好似樣樣都有嘅四人餐。閒日夜晚人唔多，目測都坐到七成人。啲嘢好快已經上曬嚟。

講下啲餸，龍蝦冇乜肉，鮑魚普普通通，冇鮮味(我相信係罐頭貨)，燒雞脆皮好食，蒸魚ok，菜煮得唔透麻麻，炒飯甜品正路。

總體食味一般la，喺旺區嘅大牌子酒樓算係咁，不過份量偏少。記得以前鴻星啲前菜小食花生有啲炸魚仔好好食，但而家就冇咗lu，得返啲花生。