PHI Coffee & Pancake (山頂)

適逢農曆新年，決定上山頂行大運，欣賞一下維多利亞港景色，當日氣溫跌至10度，天氣寒冷，所以去咗呢間新開嘅咖啡店飲杯熱咖啡暖下身。Coffee Shop 以木系裝修帶出溫暖和諧，同埋慢活嘅感覺，好舒適。疏乎厘同埋咖啡喺呢度嘅主打，響度歎返個下午茶唔錯。

經典英式伯爵茶疏乎厘
甜品點咗伯爵茶疏乎厘，賣相精緻，份量好多，足足有三塊厚厚嘅疏乎厘，梳乎厘帶有濃厚伯爵茶嘅清香，口感好軟腍，空氣感十足，仲帶有蛋香，可以配合Cream 一齊食，入口即溶。伴碟有馬德蓮蛋糕，口感鬆軟，食落亦散發住香濃嘅蛋香味。

芝士牛肉煎蛋三文治配牛油果醬
三文治麵包外表烘到金黃色，好香脆，中間夾住豐富嘅芝士，加埋煎香過嘅牛肉，惹味可口，輕輕切開上面嘅流心蛋嚟食，蛋黃漿瞬間大爆發，三文治沾埋蛋黃漿好有蛋香。伴碟嘅牛油果醬口感新鮮，入口即溶。

蜆肉西班牙腸扁意粉
主食點咗扁意粉，蜆肉份量好多，肥美多汁，另外配有西班牙肉腸，意粉帶煙韌嘅口感，沾滿左胡椒粒，麵條掛汁，味道微辣，食落惹味又開胃。

黑芝麻鮮奶兔 You
黑白嘅紋路外表，形象鮮明，有好濃厚嘅黑芝麻味道，配上 3.7 特製牛乳，入口順滑。

玫瑰鮮奶咖啡
咖啡入口順滑，咖啡上有幾片玫瑰花瓣，賣相精緻，仲飲到玫瑰花嘅幽香。

Ocio オシオ (鑽石山)

今次二訪荷里活廣場人氣嘅甜品店Ocio オシオ，風格環境日系，以淺色木日式庭園為主，簡潔舒適，最適合三五知己傾偈飲用膳，Menu同埋牆上熊仔圖案好可愛。Cafe主打多甜品、窩夫、日式刨冰、西餐及多國菜等，菜式賣相精緻，好吸引。

朱古力布朗尼窩夫
窩夫係奥斯嘅招牌之一，朱古力窩夫外皮酥脆，內裏鬆軟，朱古力味濃郁，配上雲呢拿雪糕同埋另外加配嘅朱古力雪糕，口感層次豐富，雪糕上面有隻橙色蝴蝶作為點綴，相當精緻。另外仲有士多啤梨、藍莓同埋糖果粒作伴碟，味道豐富，份量十足。

迷你芝士流心蛋燒南瓜鍋伴脆皮單骨雞翼
芝士焗南瓜焗至金黃腍身，有濃烈嘅芝士味，另外焗嘅火候唔錯，水份少，芝士流心蛋爽雜咗南瓜味嘅濃郁，旁邊仲有豐富嘅南瓜肉可以食到，食得出南瓜肉嘅香甜。脆皮單骨雞翼好香脆，雞翼拆咗骨，做成咗小槌嘅形狀，方便進食，令人忍唔住食完一件又一件。

Belly Soul (荔枝角)

位於荔枝角長沙灣廣場有一間主打健康生酮飲食嘅餐廳，低碳、低卡路里、低糖多菜、高蛋白，適合注重健康人士同埋附近上班族嘅青睞。裹面提供新酮嘅意粉、蒟蒻麵丶素食、甜品 、飲品等。餐廳主色調為粉紅色，好少女心，座位部份用咗黑色型格色調，有強烈嘅對比，另外種咗綠色植物，型格得嚟帶點清新。

🐟香煎比目魚伴黑松露野菌椰菜花飯巴黎牛油汁
一上枱已經聞到比目魚嘅香氣，比目魚皮煎得香脆，肉質嫩滑啱啱好，飯粒用椰菜花代替，口感爽脆，飯粒用咗黑松露去炒過，有濃厚黑松露味同埋油香味。椰菜花飯無澱粉質，食完唔會水腫，健康之餘更可以抗氧化同埋抗衰老。

🧇生酮焦糖朱古力窩夫
窩夫用咗黑朱古力、杏仁粉同埋椰子粉製成，低卡路里同埋低澱粉質。朱古力窩夫口感微脆，用咗黑朱古力所以味道帶點微苦，用嚟點旁邊嘅cream會味道更豐富，仲有新鮮士多啤梨同埋藍莓，而焦糖用咗新酮蜜糖，𠊷晒落去窩夫都唔會味道過甜。

🥛 紫薯紅菜頭鮮奶
期間限定嘅飲品，拉花線條精緻，圖案精美，拉花係一隻好可愛嘅狗仔，粉紅色嘅紫薯紅菜頭鮮奶顏色好少女，味道清清地，帶有淡香紫薯味，容易入口，飲到最底飲到啲紫薯渣，證明真材實料。紫薯同埋紅薯頭更有花青素，人體接觸足夠嘅青花素，可以更有效集中精神，增強認知能力同埋抗衰老。

🌹Rose Latte
上面有幾片玫瑰花瓣，咖啡拉花精緻漂亮，入口香濃幼滑，帶有清幽的玫瑰香，飲落順滑好舒服。

M Square (西貢)

假日去咗西貢，一路沿住海傍行一路吹住海風，十分寫意，走到西貢惠民路有間開業接近一年嘅WM hotel，地庫有間好清新嘅西餐廳 M Square。餐廳環境闊落開揚，空間感十足，有落地大玻璃滲透住柔和嘅陽光，好舒服。呢度仲提供咗好多玩樂設施，例如有桌球枱、足球機、波子機、遊戲機，另外仲可以打哥爾夫球，仲有多部大電視播放球賽，喺享受美食嘅同時，亦可以喺度玩樂消遣，chill 一個下午，週末幾適合同三五知己去呢度放鬆一下。除此之外，店員仲好有友善殷勤，當日下午點咗以下食物。

Margherita
自家製手工Pizza餅底好出色，餅底厚薄適中，焗嘅火候控制得啱啱好，送上枱係熱辣辣，食到麵粉嘅香味，薄餅邊好似餅乾般脆口，蕃茄同mozzarella芝士嘅味道互相融合，而整個Pizza都份量十足。

Portobello Beef Burger
漢堡麵包口感鬆軟，牛肉厚身好Juicy ，加埋多汁大啡蘑菇，大啡蘑菇用咗黑松露忌廉嘅去煮，加上半溶好邪惡嘅芝士，味道多種層次。另外薯條即點即炸，味道鹹鹹地，熱辣辣之餘仲好脆口。

Mango & Coconut Pancake
疏乎厘口感鬆軟，好有空氣感，咬落去有入口即溶嘅感覺，芒果味道唔會太甜，配上香濃既椰奶香味，令人忍唔住食完一啖又一啖。另外配上好多新鮮嘅水果，包括芒果、士多啤梨、藍莓同埋奇異果，材料豐富。

Strawberry Milkshakes
士多啤梨奶昔嘅紋路好靚，奶昔充滿又香又濃的士多啤味道，呢度嘅奶昔材料上加入咗雪糕，口感Creamy，味道唔會好甜，非常好飲。

Mint Chocolate
薄荷味奶昔嘅薄荷味道冰涼濃郁，飲落透心涼，加上忌廉同埋朱古力味，口感豐富。

泓居酒屋 (尖沙咀)

位於尖沙咀中港城對面中港中心頂樓，有一間居高臨下嘅居酒屋，一入到去有個大電視播放日本各地風景，好吸睛，而窗口係落地玻璃，環境光猛，舒適闊落， 可以睇到大半個尖沙咀同埋一片綠油油嘅九龍公園，同朋友坐喺窗邊一邊食飯一邊欣賞風景，勁舒服。呢度中午有唔同種類嘅定食套餐，每個餐有前菜、沙律、麵豉湯、白飯同埋飲品，性價比高，我哋點咗以下套餐。

泓雜錦串燒定食
串燒食材幾豐富，包括有青椒仔、甜蕃薯、豚肉西京燒、牛舌、雞肉、雞頸肉串、雞翼。
青椒仔入味爽口；甜蕃薯外皮燒至脆皮，蕃薯口感軟腍，非常香甜；豚肉西京燒黑豚鮮嫩多汁，肉質爽口，食落有油脂香；牛舌爽口彈牙，食出有胡椒鹽香味，牛味濃郁；雞肉串惹味，肉質嫩滑；雞頸肉肥瘦適中，咬落好有口感；雞翼燒到啱啱好，外層燒至口，內裏嫩滑有肉汁。另外碟上有秘製嘅醬料，咸中帶酸，點串燒好能夠提香。
另外前菜係芝麻汁配青葵，十分爽口；沙律菜清新健康；白飯上面放咗飯素，拌飯一流。

和牛漢堡扒定食
煎香過嘅和牛漢堡扒，外表微焦，內裏鎖住了肉汁，再加埋漢堡醬汁，用嚟送飯一流。另外配埋即炸薯角同埋清新爽口嘅沙律菜。

巨峰提子梳打
每個定食會有飲品一杯，飲品味道唔甜，容易入口，巨峰提子味濃郁，飲落非常透心涼。

白桃梳打
飲品同樣唔甜，容易入口，可以飲到白桃嘅香氣，口感冰涼舒暢。