趣苑茶餐廳 (荃灣)

呢間餐廳已經o係路德圍開左好多年, 不過o係附近住左咁耐都冇去食過, 主要因為間舖頭睇起上黎好殘舊, 黑媽媽, 睇見都唔會想入去.

今年年中見佢裝修, 以為轉做其他食店, 但重新營業之後見佢個字號都係一樣, 不過賣既野就唔同左, 主要係茶餐廳d兩餸客飯, 特餐之類既野.

黎親呢度都係食B2特餐, $26包多士, 火腿奄列, 沙嗲牛肉湯意同一杯熱飲. 呢個價位呢講真係幾抵食, 多士都尚算脆口, 而且牛油塗得均勻, ; 前幾次食既火腿奄列仲有埋洋蔥同蘑菇, 不過唔知係唔係物價高脹, 而家冇左lu; 沙嗲牛肉湯意既牛肉都幾夠味, 正常鬆肉粉份量, 咬落都仲幾有o趙頭既~

順帶一提, 原來呢度老闆即係隔離松記老闆, 下午2點前可以o係松記果邊坐叫呢邊既野食架~

糖水檔 (佐敦)

在西九海濱長廊倒數完, 本來想行去佐敦佳佳甜品食甫腐竹白果糖水, 不過帶著沉重的攝影器材都係唔好行咁遠, 近近地諗起渡海角都有得食糖水, 不如就去試下啦~

去到先知原來就係傳聞中堂記既隔離, 門外面開滿哂檯坐滿人, 仲有唔少人等位. 搵位阿姐問下個排隊等位機制係點, 佢指住有條人龍就叫我地排果度, 排左一陣, 咦, 有d唔對路! 原來果條係外賣人龍! 其實係冇排隊呢回事, 有人行開就自己坐低就得~

好不容易安頓好坐低之後, 就叫左個蘿蔔糕同腐竹白果糖水, 見到位大叔o係門口煎到卜卜脆, 應該都唔會差得去邊掛~ 好快就拎到黎, 個樣都幾對路, 不過一食落口就知出事, 成口粉一D蘿蔔都冇, 仲要重味精! 雖然話$3件唔好要求咁多, 但係食完個口腔仲辛苦過唔食就唔係幾妥當啦~

等左好耐, 碗腐竹白果糖水終於到. 見到D腐身都煲到溶左似乎幾好, 不過撈起D白果就知出事, 個心黑媽媽既, 咬落去仲衰, 苦既~! 完全同佳佳冇得比, 下次真係唔好貪近!

雖然去得呢D地踎野都預左漏單混亂, 但係連D野食都係咁既質數, 應該都冇下次.