上海么鳳 (銅鑼灣)

話說某日搭巴士去銅鑼灣，撞正個司機技術差，搞到我暈車浪。落車後仲係作嘔作悶，經過呢度醒起可以食啲陳皮，就入去睇下喇 ！以前黎呢度買過話梅肉，都幾好食，今次打算買陳皮，但眼見咁多款都唔知買邊隻好，正在苦惱之際見到一樽叫”靚陳皮”既剩返好少，即係多人買啦，就姑且試下。呢度既涼果有平有貴，陳皮既價錢尚可接受，我買左一両都係十五蚊。但一拿上手就奇怪喇，點解咁硬既？以往食既都係軟架麻，食落既感覺係又硬又脆，帶鹹味，真係非常特別。不過有啲太大塊，好難整碎佢，可能要用鎚仔先得喇！一包都幾多，幾襟食，有興趣可以試下！

別府駅前料理 (旺角)

家姐雖然唔食生野，但就好喜歡食日本菜，所以今年生日都揀左黎呢度。怕冇位，一早book左四位。黎到被安排坐係望彌敦道既望窗卡位，唔錯！
今次都係叫左唔少野食：
1)火炙沙律醬三文魚壽司(三文魚略為燒過，呈半生熟，魚味唔濃，亦食唔出沙律醬味，一般)
2)吉列芝士白魚棒(外脆內軟，芝士味濃，必食之選)
3)鹿兒島洋葱汁粟米片蟹柳沙律(清清地，仲有愛吃既粟米片，幾好)
4)鹽燒三文魚腩(賣相唔錯，但個人唔太喜歡佢太淋既質感)
5)滑蛋蟹籽蟹柳撈讚崎手打烏冬(烏冬煙刃，但味道很淡)
6)土佐豆腐(似乎炸燶了，很乾，味道都唔係好夠，如果有醬點會好啲)
7)雞軟骨棒棒餃子(一咬開皮同饀就分離了，味道尚可)
8)蟹膏海鮮炒飯(又係偏淡，同埋碟頭略嫌較細）
9)茄汁pizza(mini size既pizza好新鮮，脆卜卜，茄汁亦夠味）
10)笨兔(士多啤梨+香蕉+忌廉打成既飲料，質感細滑，味道就好似細個時食既棉花糖，香甜味美）
總括黎講食物唔算好標青，一般般啦，如果鍾意清淡既人可以一試。值得一讚係呢度侍應既態度真係唔錯，好耐都冇見過咁有禮貌既侍應喇，所以俾佢加分。不過想唔到星期日晚生意都咁淡，只得幾枱客，真係令人深深感受到金融海嘯既影響！

心。泰 (旺角)

正當係朗豪坊book唔到位時，發現原來新世紀都有呢間舖，平日呢度人流不多，所以唔使訂都有位。兩個人叫左以下食物：
1)芝士豆腐米紙卷(煙靱既米紙包住蝦同芝士豆腐，沾甜酸醬食，清清地幾醒胃)
2)海鮮喇沙(少少辣，味較淡，當然唔及新加坡既正宗好食啦)
3)紅咖喱炒豬頸肉(又係辣既，豬頸肉爽脆，味道中規中矩)

我地仲特價叫左兩杯特飲，我既係青蘋果，不過唔夠凍同淡:。

雖然呢度既食物水準唔算好突出，但勝在夠清靜，傾計唔錯，所以啲保險經紀都會揀呢度。不過有點值得讚既係呢度既服務幾好，見你好多野佢地會主動拎張櫈俾你放野，加水都幾密。所以如果大家去旺角可以唔使去朗豪坊，轉黎呢度都可以:。

坤記糕品專家 (深水埗)

見到咁多食友介紹，又經開深水埗，就黎試下呢個好評如潮既芝麻糕啦！
正如大家所講，芝麻糕係九層既，可見製作過程係落過一番心機，一盤芝麻糕好快就俾人買晒，真係賣糕都會發達喇！咁當然要好食先得啦
雖然芝麻糕係凍既，但食落口真係有種難以形容既清甜感覺，仲食得出有芝麻碎添！平時食開齋舖賣既卷豬腸型"硬掘掘"芝麻糕簡直冇得比哩！而且一件細細既糕食完竟然有飽肚既感覺，最衰要繼續行街，唔係買啲返屋企做手信都好！
呢度既缽仔糕都好多人買，下次都要試下先得！

Rice Paper (尖沙咀)

朋友鍾意食越南菜，今次有機會食高級少少，就揀左RICE PAPER喇！一入去情調一流，仲有好多外籍人士，係朋友聚會既好地方。
我地叫左以下食物：
1)絲網蟹肉春卷(網狀既春卷皮超脆，新鮮食唔錯)
2)咖喱牛腩配法包(呢個菜聽聞係呢度既招排菜，咖喱香濃，充滿椰香，唔太辣，配白飯或麵包一流。大大個既法包已經切開，share都唔難，亦唔會好硬，點汁食好好味！不過可惜啲牛腩幾大舊，同埋稍靭，扣晒分，希望下次可以改善另外呢個餸因為頗creamy，所以都會幾漏。)
3)龍蝦抄蛋麵(貴價抄麵，龍蝦味唔重，唔知係咪因為冷氣太勁，啲蛋麵好快結成一舊哩！同埋味偏淡，麻麻地，有少少浪費左龍蝦！)
4)扭結糖玉桂紅莓雪芭(個名好長既一個甜品，見佢張相好靚就叫啦。賣相真係同張相一樣咁靚，紅莓雪芭帶酸，必須要配合襯底既甜餅食中和返，幾重玉桂味，中間夾雜住杏仁粒，口感特別，整體黎講係非常有特式既一個甜品！)
呢度食物ｏｋ，平日晚上生意都唔錯，傾計亦幾好，可以再來。