翠亨邨 (銅鑼灣)

襯新鮮仲記得~而家就寫左今晚嘅晚餐先!
同亦客亦auntie食飯…大家都係都係相機食先~
先黎兩款餐前小食
海蜇花…平時食一條條嘅海蜇就食得多,海蜇花真係第一次食~
睇落好清淡…但食落帶少少辣…又爽又脆~

滷水鴨舌同出面食嘅滷水有d唔同…
唔會好鹹但又食到少少滷水香



之後就到呢碟中國豬crossover日本豬嘅叉燒~個人認為日本豬好味d…肥d滑d~中國豬就肉味重d~作為招牌菜之一嘅叉燒都尚算過得去~但如果可以我想揀晒日本豬



呢個牛奶多士配魚餅~幾得意…但牛奶多士做得出色過魚餅~魚餅比較普通~但牛奶多士就出奇地好味~


呢個南瓜枝竹珍菌不得了呀…枝竹珍菌煮得好有鑊氣…帶出左菇菌本身嘅香味~襯埋蒸林左嘅南瓜中和返d油膩感~都係值得推介之一!



最後order左兩個甜品
馬豆糕除左d馬豆多d之外無咩特別




反而士多啤梨糕就有驚喜…一見到佢仲怕好藥水…但食落就有好濃嘅士多啤梨味…一d都唔假~


都幾滿意嘅一餐…唯一要挑剔嘅就係個茶杯比較污糟…有一粒粒污糟物係杯底…作為美麗華集團旗下品牌…衛生方面似乎要多加努力!

簡約煮意廚坊 (鰂魚涌)

是日晚餐,終於都食到呢間平時收好早嘅餐廳(其實佢收9點…但我實在太遲收工…8點幾返到附近又唔想阻人收工…所以一直都無機會試~)

今日有機會一試~
先黎個湯跟法包
好好味嘅甘筍忌廉湯~食唔到粒粒嘅紅蘿蔔但就飲到淡淡嘅甘筍香~
法包都係誠意之作 蒜香味夠,牛油份量岩岩好仲要上台時熱喇喇~好味!


等左一陣就上主菜喇
先黎我食嘅肉醬千層麵~超多芝士同肉碎…絕無呃秤~不過就覺得偏咸左少少…但唔太影響整體味道嘅!


之後就到daddy嘅白汁海鮮意粉
呢個我食左少少~味道都係偏咸~用料方面都係一般嘅急凍海鮮但就除雪味除得幾好~唔會好大陣雪藏味~
有魷魚圈,蝦同埋蟹柳~


最後就有甜品同餐飲喇~
呢個應該係朱古力mousse蛋糕…味道偏甜(我已經食得好甜) 但都覺得好甜…



餐飲我就飲冰柚子蜜少冰…都係一般柚子蜜喇…無咩技巧可言
daddy就飲熱咖啡~係即磨咖啡…唔係開粉沖嘅咖啡~


整體黎講…八十幾蚊食個晚餐…有呢個質數我覺得都算幾合理喇!
p.s. 餐湯係本身有的~法包,甜品,餐飲就要加錢~好似$25有晒3樣…都幾合理嘅價錢~

如果我可以早收工的話一定會再食!

Oops! Ice-cream‧Dessert (灣仔)

去灣仔買野…途經呢度…俾佢門口大大個13蚊一球雪糕吸引左…熱辣辣行到成身汗…諗住買球雪糕消暑…都無期望過會有咩特別…
點知入到舖頭…見到有好幾個人企埋一邊食緊…行到雪糕櫃前…哇…有成十幾款味揀…仲有得試食添! 試左椰子味就即刻order左了~細球13蚊…大球19蚊…叫左細球…
但出到黎都唔細呀! 係normal size…最驚喜嘅係…試食時只食到雪糕…無食到有果肉嫁!!
椰肉加上椰子味雪糕…一流呀!
無諗過13蚊都會有咁好嘅質素!!

雖然位置有d唔方便…附近亦無咩野行…但如果落開灣仔…一定會再去試其他味!!

正斗粥麵專家 (中環)

朋友們個個都食埋野先出黎…一個人黎到中環揾食…想揾間唔好咁貴又唔駛排隊嘅真係好難…
黎到正斗附近…間間都人頭湧湧…想揀間經濟d嘅就只有正斗…一個人都足足等左半個鐘呢…

叫左個南乳豬手撈…味道一般~反正只係想填飽個肚…所以都無咩所謂…但唔會有下次…連埋加1價值$77…但其實同我出面任何麵檔嘅南乳豬手撈都無分別…點解要俾多差唔多一倍嘅$$去食呢…仲要等咁耐位…除左味道一般之外…佢地嘅服務態度都真係有待改善…我明白太多人問野真係會令做野嘅人燥底…但話晒我都係一個顧客…點解俾錢食餐飯仲要受返氣呢…