佐賀山田‧燒肉 (屯門)

星期 三係離假期最遠既日子，放工最好成班同事/朋友齊齊去搵好野食鬆一鬆!最近朋友行開屯門話成日經過見到呢間日式燒肉放題好想試下，就拉埋我一齊去試試佢!
放題分左4個種類，我地第1次試，就叫左個2級 竹放題來試試佢先，2級都已經有93款可以叫，真係唔算少。入到去店內都唔細，卡位都多，4人位8人位都有，叫多幾個朋友來食應該都唔洗分開坐。
我地7點15入座唔算好爆，大約坐左半個場左右，不過差不多8點左右既時候就坐左7 8成人啦。坐低就開始戰鬥啦!! 前菜可以自己出去拎，沙律，生菜，墨魚仔，泡菜，中華沙律，麻醬豆腐款式都唔少。
我就先拎左墨魚仔同泡菜試下先~~墨魚仔好爽口，係平時日式料理入面味付螺肉既調味，微微辣，好開胃! 
泡菜略酸，開胃之選，泡菜同燒肉一齊食可以解油膩感，非常開心有泡菜因為係同燒肉既最佳伴侶。
飲品都係自己出去拎，有汽水有各款茶可以簡，唔想飲凍野都有熱茶同咖啡可以飲。
見到有呢款道地蜜桃烏龍茶!未試過又可以試下新野，燒肉配茶解膩
我地坐到卡位有2個爐可以燒，增加我地既戰鬥力阿!
一坐低店員就先上一個嚐味燒肉盛，有和牛一口牛，安格斯牛肋條，上級牛胸肉，牛肋肉，牛小排等等。
仲好貼心附埋牛油脂! 雖然放題叫既肉都可以有調味汁，但店家都會提供燒肉汁同海塩。大家放工都餓到爆，一來就點肉肉肉!!
估唔到肉品既調味都有5 6款可以簡，王道既燒肉汁，塩味，味噌汁等等，最特別見到有日式竹炭燒肉汁可以簡，就等我試下先!上面係美國特選和牛牛肩脊肉，2面燒有少少微焦，邊位脆口，中心油花充足，一D都唔乾!
下面左邊係牛小排右邊係牛板踺，牛小排肉感重有咬口肉味較濃，不過自己同朋傾得太熱烈，燒得有少少過熟，大家食個陣記得睇實個火阿!燒肉一定唔少得牛舌，牛舌配燒肉汁都係冇得輸!
口感爽口再配上芝麻多左一個層次, 薄薄一塊唔算太肥可以食多幾塊都唔會膩!試完牛又試下豬肉先，今次叫左豚梅肉同豚腩肉。
豚腩肉唔算太肥，層次都分明，配埋泡菜食即刻有種自己食埋韓燒既感覺。
而豚梅肉就肉感較重，唔中意食肥膩油脂感太重既人士一定中意呢款。試完豚肉又點少得雞肉呢!
見到有芝士雞脾肉可以叫，作為芝士控既我點可以唔叫來試!!
錫紙盤上菜，但係只係用錫紙盤傳熱唔夠快比較花時間，所以最後我選擇雞同芝士分開燒~ 將燒好既雞肉放上去溶哂既芝士度可以拉絲阿!! 
雞翼都好嫩滑有汁~
肉食得差唔多，中埸休息下，試下菜品同其他小食先。
我實在係抗拒唔到牛油金菇既威力，仲有牛油粟米!!!
仲有日式芝士年糕(芝士控唔好錯過)燒菠羅一流，燒到剛剛好，非常juicy!
燒肉除左配泡菜配飯都係好正，仲有溫泉蛋可以點! 紫菜飯加溫泉蛋再淋上台面既燒肉汁，
再配埋一塊剛剛燒好既牛肉絕配阿!進入甜點時間~
除左有雪糕雪條，仲有小蛋糕可以拎~蛋糕分別有芒果慕絲蛋糕，提子乾芝士蛋糕，黑芝麻豆腐蛋糕，朱古力慕絲蛋糕，仲有忌廉泡芙。
黑芝麻豆腐蛋糕味道最清，建議最先食。
芒果慕絲蛋糕芒果味好出，係食左咁多肉之後對味蕾非常友好。
最令我驚訝係朱古力慕絲蛋糕，朱古力味濃，入口軟滑，而且唔太甜係我中意既朱古力味!雪糕雪條都唔少款簡，有lotte既脆皮雪條，非常高人氣，出到去拎既時候已經得番2支，中意食脆皮雪條既朋友仔記得要快手阿!
芒果雪糕杯原本以為會好硬要放好耐先食得，結果一打開已經係食得既軟硬度! 芒果味幾香都有奶味。
最後居然有明治既雪條~呢支係海塩荔枝味，原本以會唔會唔夾，點知出到來個味道好清新, 外面海塩真係會有少少咸味，配埋入面荔枝雪糕非常清爽，好岩係食完油膩既燒肉之後食為呢一餐畫上一個句號。

二鍋頭 (尖沙咀)

上次食完旺角店感覺唔錯，都算多食物選擇，今次就特意黎到尖沙咀店食。先點咗雞煲，小辣都好惹味，雞肉尚算滑，無雪味，而最正係雞煲係任食，唔夠可以再添加。店員幫忙抄一抄，微辣的香氣即噗鼻。食完雞煲後，點了番茄湯底，茄湯用茄醬製成，味道不算濃，適合打邊爐，不會油膩。
食物係任拎任食，另有一張單可加食物。出面有個大雪櫃，有丸類、蔬菜、炸魚皮、響鈴，多款打邊爐食物都齊全。生根都幾適合用黎打邊爐，浸落湯底可索晒D味。丸類都有好多款選擇，我就最鐘意牛丸了，非常多汁。脆肉鯇好新鮮，值得一點。
我地另點幾款牛肉，包括安格斯牛小排同極黑和牛，全部都來自美國。牛肉新鮮，油脂分佈平均，其中極黑和牛，肉質彈牙美味，非常值得食。

Chef's Stage Kitchen (元朗)

疫情反反復復之下，好多時只可以留係屋企食野唔敢出街，
真係好悶，就想近近地係自己區附近搵D好野食發洩下。

CHEF STAGE 係幾區都有分店，原來依加元朗都有分店!間餐廳都幾大，地址都唔難搵。室內燈光充足，影相打卡一流。太多款都好想食，無奈2個人都叫唔到太多來試，所以如果之後冇哂人數限制之後一班人來食就可以試多D款啦坐低叫完野食之後，店員就上左小食面包3款。
其中令我比較印象深刻既係蕃茄香草包，淡淡既香草味再加上小小蕃茄既酸味，非常開胃，我就中意加埋旁邊既沙律醬，一齊食。醬料有蒜味，普通沙律醬係偏酸，但係呢個係偏咸。跟住上既係牛油果藜麥沙律，不得不說，牛油果熟得剛剛好，軟滑香甜放入口成口都係牛油香既香，不得了。
沙律份量好足加上藜麥本身就有D飽足感，唔可以睇少阿!
想食好野又想健康D不妨可以試下呢個沙律。
美中不足既係醬汁略淡，如果黑醋比例再多一點應該會更好。跟住就上主菜啦，炭燒紐西蘭羊鞍扒，order個陣叫左7成熟，
上到來果然係7成熟，切開仲有帶紅色但係冇血水。好多餐廳都會偏熟。
羊味唔算重，就算本身唔特別中意食羊肉既朋友都覺得好食。
肥瘦剛剛好，肉汁非常多，好嫩滑，配埋紫酥蜜糖醬。
咸咸甜甜，喜出望外既係，因為本身就唔太中意食紫酥，但係我唔望餐牌都唔知原來個醬有紫酥。
呢個羊鞍係用海鹽燒，所以淨食都好夠味。
個人覺得乜都唔點食肉既原味係最好味。跟住另一個主菜烤菇意粉剛好上埋，淨睇個賣相已經好對我口味。
意粉軟硬適中，食落好滑身，連埋個香濃既忌廉汁仲滑。
非常足料，仲有大大片大啡菇，完全冇慳材料。
食落啖啖都有菇，冇得輸。

2個人實在胃容量有限，試唔到甜品就飽哂，所以又有多個藉口比自己再來多次幫襯~

依加天氣涼左其實坐室外都有一番風味，同良朋知已飲下酒吹下水，室外比較有FEEL。

Time Park Lounge (尖沙咀)

最近發現一間酒吧環境頗不錯，空間非常大還有飛行棋、Beer pong等設施，不是每間酒吧都找得到，最緊要係Cocktail頗有特色及創意，而且賣相味道同樣兼備，一大伙朋友歡聚飲野最適合不過！


昏暗的環境，配合英倫風及森林的設計，內裡有多張Sofa，不論用膳或飲野都舒適，中間就有開放式吧枱，可以目到調酒師即場為您調酒，而且以酒吧來說，整體感覺都幾乾淨！
點左個主菜加$50，有湯、沙律及前菜。沙律配上多款菜，如火箭菜、紅毛菜等，十分新鮮爽口。最讚係中間的多士，非常脆口，！南瓜味入口滑一滑，味道濃及微甜，感覺頗奶，好好味。
雖然只是小食但非常有心思，其中海膽汁燴墨魚仔，用酒杯上都幾得意，而墨魚仔好彈牙，杯入面的海膽汁有d辣辣地，幾惹味。
自家製蟹肉脆燒賣，原以為係炸燒賣，但原來係脆脆包住蟹肉，配上三文魚籽同黑松露，外脆內軟，仲帶有三文魚籽咬落的層次感。
香煎帶子露筍意大利飯值得推薦，帶子彈牙軟腍，意大利飯就做得唔錯，每粒都好挺食，而個露筍汁好Creamy，味道濃，但又唔會過膩。

鮮蝦海膽三文魚籽扁意粉，蝦就算係超爽口，唔洗自己Mock殼，有細心位。扁意粉時間調節得剛好，帶有彈牙的感覺，而且入味，幾唔錯！
有段小插曲，餐廳唔小心落錯單，整錯左杯Cocktail，就好好甘當請我地飲，所以變相兩人就有三杯。其中中間個杯係Spicy River，係味道最濃最嗆口，因為加左特別挑選的墨西哥辣椒來浸酒，飲落吞個下有灼熱同辣口感覺，而且久久不散，細心位係用左一大粒冰塊，令酒的味道keep得耐d。
左邊個杯係Fairy Fox，用左斑斕嚟沖，味道有點獨特，但自己就唔太鐘意呢隻味。右邊就係Thai-faye，好香香茅味，而且好易入口，帶清清地，平時唔多飲酒的人都好岩叫呢杯。
最後就有份小甜品作一個完美結束。

119 Italio Restaurant & Bar (太子)

放工又累又餓~
又係同朋友一齊去搵好野食減壓既時候~

呢間西餐廳位置不算太好搵，因此我認為是太子隱世既西餐廳!



店面積不大，所以位置不算多，大概25人左右，另外還有一張室外位。
因為多人來就一定要訂位啦。

燈光偏黃，放工坐坐下有少少想訓著XD
過左8點後人流就好多，好快就坐爆。


餐點款式不算好多，但想試的款試就好多XD
價錢有點偏小貴。先上既係頭盤，和牛鵝肝多士。請真呢個係成個MENU最吸引我既菜式之一，
所以我十分期待，而且亦冇令我失望，4件多士有份量，和牛同鵝肝1:1用料冇輕手。
一啖咬落去，鵝肝好快就溶係口中，油香加上和牛既咬口配埋多士脆脆既口感，
成件事係完全停唔到，而且鵝肝上面放左店家自製甜甜酸酸既菜絲，化解左油膩感。
直頭唔想同朋友share 自己隊哂4件阿。之後係經典肉醬配自家製黑蒜意大利面，上面有米紙網點綴，
味道偏酸，寛條面有點硬，略為失色。之後係119招牌脆皮乳豬配蜜糖芥末汁，乳豬皮薄，肉好嫩，用刀輕輕切好易就分得開，
連骨都好易切開，所以唔小心就食埋XD
皮薄但未夠脆，肉汁好多，味夠唔洗點太多汁都好夠味。
配上薯菜，份量滿足。



對於女士，最後唔食個甜品又點算收尾。
因為上面前菜主菜2個人分都滿足，所以甜品就冇一人叫一個了，廢事做大哂鬼XD
呢個係窩夫雪糕三文治，係即叫即整，所以食到咁上下就好叫定唔係有排等。
窩夫即整所以夠熱又外脆內軟，再加埋中間夾埋凍冰冰既雲呢拿雪糕，作為一餐既收尾一流。