過路貓 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2018-09-30
有日係Facebook見到😍朋友po嘅相,一間頗有特色的餐廳,好值得推介畀靚女卡文。卡文係愛狗人士,「小白🐶」嘅離去,著實令她傷心😢了一段時間!「八哥」嘅出現,令她萌生「去」意,化悲傷😭為食量,我當然奉陪😜到底...... 預早訂咗6:45pm枱,估唔到我哋會係是晚第一枱客人,可以隨心所欲地拍照呢。餐廳佈置以八哥為主題,有得意八哥Halloween 黑板壁畫、八哥咕𠱸、八哥餐巾紙、餐碟等等。 打開八哥menu,除了一般主菜小食之外,當然唔少得八哥飲品☕️,而3d八哥🐶甜品🍰就最令人拍案叫絕,現在讓大家來感受一下吧⋯⋯ 卡邦尼意粉配温泉蛋🍝$148:攪穿咕溜滑嫩嘅溫泉蛋,令蛋漿佔滿意粉才入口,味道creamy香滑,加埋煎脆嘅煙肉,惹味非常! 黑松露牛肝菌意大利飯🍛$148:意大利飯入口濕潤黏黏的,口感好好。濃郁的黑松露醬配上肥厚鮮美的牛肝菌,口感細膩。 黑松露薯條🍟$68:呢款厚身薯條🍟,咬落鬆軟又夠熱,配上黑松露醬好好食! 到戲肉出場👏👏👏 3d八哥朱古力慕絲配美國芝士蛋糕🍰$148:八哥朱古力造型十分仔細,狗仔皮膚做到毛茸茸的,像真度好高啊,質地則似朱古力雪葩。我哋唔捨得食,成晚專注地為八哥拍寫真🤣忙得不亦樂乎!美國芝士蛋糕,質感柔滑輕盈,富濃滑芝士奶香。 我哋一心諗住order八哥圖案嘅飲品,當中只有咖啡有份,但夜晚黑飲咖啡一定瞓唔著,好彩侍應話仲有熱朱古力可以做到呢個效果。其實個圖案只是由固定嘅模具撒上朱古力粉而成,雖然好簡單,為咗八哥仍然值得一試! 熱朱古力☕️$40:朱古力味道淡淡的,唔夠醇厚,但甜度剛好,可以話唔夠邪惡。 整體來說唔錯😋,環境寧靜,坐得舒服,加上繁忙時間仍不限時,位處尖沙咀區,實屬難得!埋單後有八哥環保袋送,叫人驚喜😘⋯⋯
評分: 味道 4 環境 4 服務 4 衛生 4 抵食 3
2018-08-12
前文提要:靚女卡文約咗我去The One影美少女戰士卡通人物,殊不知食完lunch後,我哋先至知是日商場搞咗個「李佳芯x連詩雅」明星嘅「月光傳說」活動,影相開放時間順延至下午六點後!我哋唯有將book好嘅晚餐時間改為8點啦 7:30pm影飽相,起程去K11嘅「野玩田店」。幸好餐廳人客唔算太多,我哋才可以早啲入座。排隊影相排到又攰又餓又渴,即刻食個餐包飲番杯水先再講... 黑松露炒農埸雞蛋酥盒農場雞蛋入口滑嫩,蛋味十足,加入黑松露醬後,更為味美。酥皮好薄但唔夠酥脆,唯一優點係會食完都唔覺得漏。 蟹肉美國露筍濶條麵我哋好鐘意食濶條麵但從未見過及食過呢款超濶型。初頭有點擔心,諗住麵條咁濶嘅,會不會影響口感㗎?!勢估唔到入口煙靭,配以香濃嘅蟹肉白汁,令人難以抗拒。 辣肉腸pizza香脆薄批,少少辣,比較鹹。 隔離枱叫咗碟帶子海膽汁意大利飯,狀甚吸引,下次要來試試
評分: 味道 4 環境 3 服務 3 衛生 3 抵食 3
2018-08-12
靚女卡文約我去The One影美少女戰士卡通人物,lunch time就順理成章係The One揾食。靚女提議話去4樓嘅Gram Cafe & Pancakes食班㦸,啱曬嗜甜嘅我。 是日正值中午時份,由於我哋唔一定食限量版梳乎厘班㦸,所以唔使排隊便可以入座。睇完一輪menu,揀咗鹹甜班戟各一來分享。 香港限定版綠茶紅豆班戟三層班戟,唔太厚身,軟度適中。綠茶味甘,紅豆甜味亦剛好。 三文魚牛油果班㦸三文魚過鹹,牛油果🥑有淡淡的牛油香,質感清爽,即時減去三文魚嘅鹹味。 柚子茶跟餐飲品,加15蚊。唔會太澀或過甜,質感亦唔會太稀。 下次有機會,要來試試梳乎厘班戟。
評分: 味道 4 環境 3 服務 3 衛生 3 抵食 3
2018-07-15
從來食好西😋就係我積極工作💪嘅原動力,是晚孖住靚女同事再出動,也順道慶祝壽星女生日🎂呢。係芸芸衆多酒店buffet之中,聽講Yamm-The Mira 出名好食😋,反正我倆都未食過呢間buffet,就去試試吧。 我哋準時放工嚟到餐廳,甫入座部長即時為我倆介紹及講解今晚嘅主題:鮑魚與鵝肝,服務相當稱心! 冷盤呢度嘅海鮮真係好,完全係食過番尋味。尤其係波士頓龍蝦及長腳蟹,前者蝦膏盡現,飽滿嘅肉又新鮮彈牙,小妹一口氣就KO咗3隻半了。後者肉質結實超juicy,嗰種超鮮甜味,令人一吃難忘。翡翠螺大大隻,十分爽脆。凍蝦亦非常爽口。青口有鮮味。蜆比較細隻又無味。即閞生蠔,要排隊攞,唔使急反正實有refill,我哋等人龍漸散先攞,每人配給三隻,口感滑嫩但略帶苦澀味,唔係咁啱我倆口味,認真三隻夠晒數。 熱盤香煎鵝肝伴薯蓉紅莓醬,鵝肝外焦裏嫩,入口即化,濃郁甘甜而不膩,第一次食到咁嘅鵝肝啊。花膠鴨掌燴時蔬,花膠軟腍入味,但要早啲攞,因為無refill花膠 ,錯過咗頭輪嘅話,就只剩下鴨掌了。除咗花膠受歡迎之外,清蒸龍躉亦都係最快沽清,小妹也只能吃到少少滑溜魚肉。西冷牛扒,肉味濃郁,有嚼勁。燒羊架,肉質軟嫩,羊羶味唔太重。陳皮薑絲蒸鮑魚,大大隻,非常軟腍爽脆。鮑魚豆腐,食完仲想食。鹹蛋黃蟹粥,好夠鹹蛋黃味,食完好溫暖。鮑魚粒荷葉飯,材料豐富,飯夠入味。仲有好多款菜式如炒上海回鍋肉、冬菇扒時蔬、燒乳鴿、豬頸肉、燒味、天婦羅等等未試呢⋯⋯ 剌身壽司刺身肥美新鮮,有四款:三文魚、吞拿魚、八爪魚及鯛魚。至於壽司,款式頗多元化,較大路嘅有三文魚、鯛魚、玻璃蝦、仿鮑魚等壽司。雖然舊飯糰太實,但饀料好唔錯,尤其係炸蠔卷,食到酥脆嘅濃味蠔。炸蝦卷、鰻魚壽司、火炙鵝肝壽司等都好好食。最有特色係香煎鮑魚香芒醬墨汁加州卷,加州卷上加上爽口鮑魚,再配以甜甜的香芒醬,口感多層次。 甜品有外型討好嘅紫薯杯子蛋糕,細細個蛋糕仔,少甜夠鬆軟,充滿紫薯香甜味,小妹一口氣已吃下三個。北海道雙重芝士蛋糕,芝士香濃幼滑,比紐約芝士餅輕盈多了。芝士撻,口感滑溜creamy,撻皮香脆。榴槤湯圓,湯圓皮較厚,內饀有榴槤香,算唔錯。馬卡龍、咖啡朱古力撻,認真甜到漏。Tiramisu,軟滑油潤。其餘甜品,味道一般,如粟子布甸、意大利奶凍、香草焗蛋白、椰汁亞奇籽荔枝布甸、柚子馬令撻等。仲有木槺布甸、白朱古力雲呢嗱芝士餅、班蘭窩夫等多不勝數。Movenpick雪糕都有6款味道畀你揀,士多啤梨味太甜,千祈唔好揀🤫。熱情果芒果雪葩味道太酸,讓我恨錯難返😖! 生果估唔到有荔枝,不過我哋無試。西瓜唔使講一定甜。哈蜜瓜,非常爽脆香甜,食咗咁多間酒店buffet,從來未食過有香甜味,除了「Yamm」。同場亦供應青蘋果、橙、梨、士多啤梨,梗有一款啱口味。 飲品除咗餐飲每人一杯之外,自助飲品有蜜桃綠茶,味道較淡。Yamm自家制Fruit Punch較好飲。 生日有迷你蛋糕及香檳送,訂座時接線小姐話只限生日嗰個例拜先享有優惠。靚女同事月尾生日,無福消受添。不過呢度嘅男侍應個個都好好人,話蛋糕就無多,不過香檳有剰,可以送兩杯畀我地呢,逗得我倆開心死!無生日蛋糕唔緊要,呢度大把甜品,小妹即時創意大發,揀咗至靚紫薯cup cake,以士多啤梨作伴碟裝飾,再問男侍應生取蠟燭一支,呢個mini birthday cake🎂夠曬誠意❤️思,冧爆靚女同事呢! 今晚我哋食得相當痛快,有講有笑,相機亦閃過不停呢 推介美食: 波士頓龍蝦, 香煎鵝肝伴薯蓉紅莓醬, 燒羊架, 鹹蛋黃蟹粥, 香煎鮑魚香芒醬墨汁加州卷, 壽司, 長腳蟹, 紫薯杯子蛋糕, 北海道雙重芝士蛋糕, 哈蜜瓜, 海鮮, 花膠鴨掌燴時蔬, 清蒸龍躉, 西冷牛扒, 陳皮薑絲蒸鮑魚, 鮑魚豆腐
評分: 味道 5 環境 4 服務 5 衛生 4 抵食 4
2018-07-03
好耐無食放題,趁七一假期去回味一下吧!無意中畀我發現「一樂」嘅前身,竟然係「相撲手」!之前食過「相撲手」,食物質素唔錯之餘又抵食,但無奈已經結業了。依家開返間「一樂」,我哋又可以再次大快朵頤。 是晚準時來到餐廳,地址依舊,人面全非。「一樂」以寛敞的空間、時尚新穎的面貌展現人前。隨著科技日益進步,智能化點餐已成趨勢,只需要用wechat掃一下QR code及餐枱號,就可以隨意開始挑選食物,非常方便快捷,上菜快,漏單少! 刺身刺身嘅種類都唔少,賣相夠靚。三文魚厚切,但唔夠鮨香。油甘魚、吞拿魚、鯛魚、鯨龍魚等,魚味唔重。刺身蝦肉企身,但唔鮮甜。赤貝、北寄貝等十分爽脆。帶子鮮甜爽滑。希靈魚爽囗非常,唔會過酸。 壽司好鬼鐘意食呢度嘅手握壽司,除咗件件精緻小巧,一夾唔會散開之外,飯糰口感十分鬆軟,放進口中會粒粒鬆開,令人雀躍,胃口大開。尤以火炙類更受小妹歡迎👏,當中最好食嘅係火炙三文魚腩壽司,火炙過後,油脂豐腴,比三文魚壽司更為滋味!火炙蒲燒鰻魚,蒲燒醬汁味道好好,令鰻魚吃起來好香嫩。火炙海膽魷魚,魷魚嘅爽脆彈牙加上海膽嘅鮮味,配搭很讚。火炙海鹽左口魚,火炙後更為油潤嫩滑。火炙黑松露帆立貝,一啖一口,味道鮮甜豐富。勢估唔到鵝肝壽司,入口即溶兼且口感清爽不油膩,令人驚喜。至於外型獨特嘅挪亞方舟壽司,只不過是一件載滿魚子及海膽嘅腐皮壽司吧。手工的確精緻玲瓏,可惜腐皮味道蓋過一切,搶走咗魚子及海膽嘅鮮味啊! 我倆通常食放題都較少食炸物、燒物,一來怕高脂高卡,二來太快飽肚飽滯。今次亦唔例外,只係點咗兩三款試口味。 炸物海老天婦羅,天婦羅蝦炸得酥脆可口。雷絲鳥巢黃金軟殻蟹,賣相奇差,唔講唔知係軟殼蟹,用「一pat嘢」來形容最貼切,口感完全係「腍bat bat」唔鬆脆!炸鮮奶,外皮炸得香脆煙韌,內裡軟滑清甜。 燒物香草孜然燒鈕西蘭羊鞍,食放題例牌必點之物,肉質很嫩滑juicy,香而不羶。明太子醬燒玉子串,口感紮實豐厚,有明太子嘅微辣滋味。戀人菠蘿燒,非常爽甜。蒜香燒牛舌串,入口軟嫩。 一品料理古法原盅雞燉翅,一小塊翅加一舊雞肉,完全無雞湯味。吉品鮑汁野菌燴花膠,一睇賣相就知係假花膠,味道當然不佳!一樂石鍋海鮮蟹粥,賣相唔錯但食唔到海鮮味,極其量比白粥好少少囉。海膽茶碗蒸,其實係日式蒸蛋一碗,雖然加咗海膽、蟹柳、魚子等材料,口感上卻無特別驚喜。慢煮五香蘿蔔牛根腩鍋,呢個清湯牛根腩,白蘿蔔清甜入味,牛根夠腍,牛腩肉質鮮美,瘦而不韌。 小食有沙律菜、豬腳薑醋蛋、pizza 、多士等等。多士攤凍咗仍然好脆口,pizza都唔錯。 甜品有唔同款式嘅啫喱奶凍杯:Tiramisu味、木槺布甸味、藍莓味、芒果味、牛奶布甸味等等。芒果味跟牛奶布甸味一樣爽滑好味。雪糕有Movenpick,不過只得一款士多啤梨味,而味道實在太甜嘞。另有牛奶公司雪糕杯、雀巢雪糕批、消暑雪條等等。 生果哈蜜瓜夠爽脆,可惜唔鮮甜。西瓜就多汁爽甜。 飲品有鮮搾橙汁及各式各樣嘅汽水、果汁、茶。 優惠加48蚊可以任食生蠔,我倆食量有限,又唔係生蠔控,所以無追加。上Facebook打卡like「一樂」有帆立貝送添。生日又六送一,簡直優惠停不了⋯⋯ 晚市時段(5:30-8:30)成人$288加一嚟講算抵食合理,整體亦算唔錯。 推介美食: 壽司, 海老天婦羅, 炸鮮奶, 香草孜然燒鈕西蘭羊鞍, 明太子醬燒玉子串, 戀人菠蘿燒, 蒜香燒牛舌串, 慢煮五香蘿蔔牛根腩鍋, 芒果味跟牛奶布甸味啫喱奶凍杯, 飲品
評分: 味道 4 環境 4 服務 4 衛生 4 抵食 4
|