爭鮮迴轉壽司 (天水圍)

由於咁岩係屋企見到張爭鮮既傳單，開張個幾日$4碟，咁岩有一日撞岩我放假...
所以個日就10點幾搭車去天澤排隊，一去到真係好多人，好彩排左一陣已經有位放人入去...
所以其實都唔算等得太耐既，但係之後差唔多到我地既時候，條隊已經排到去大家樂個邊...
我地一行4人去食，一坐低就開始要與時間競賽，因為只係可以食40分鐘架炸 三文魚刺身:雖然size細左d，不過$4碟算係咁上下啦，都算唔錯既...
條迴轉帶見得最多既就係三文魚刺身同三文魚壽司，所以不停有人拎，不停咁出，都算新鮮既 三文魚壽司:塊三文魚同元綠既$10碟三文魚壽司一樣咁薄，相對呢個就抵好多啦，不過食落麻麻，都係刺身好好多...鰻魚壽司:呢個食落幾好 真係估佢唔到呀 蟹棒壽司:一食落口就有種感覺係佢已經唔知放左係道幾耐，無咩特別，認真麻麻 芒果布甸:意想不到咁好味，同甜品鋪既有得比呀泡芙:初初以為都係普通既cream泡芙，點知放入口竟然有士多啤梨味，再咬開第二粒一半睇真d，入面真係有紅色既士多啤梨果肉定唔知係士多啤梨醬，都有驚喜 螺肉:無咩特別，普通貨色，算好味

藍莓芝士蛋糕:呢個其實記得有影相，但唔知點解睇返電話又無 都幾大件，味道ok，不過食完好濟...

4個人食完都係$200有找，算係咁啦...不過如果$8碟，我諗我又唔會特登搭車去既...

必勝客 (天水圍)

今日大嫂放假，所以就同男朋友、大嫂同埋佢個女一齊出去食野...
大嫂話去銀座食，係薩莉亞餐廳同pizza hut 2者之間，最尾都係選左pizza hut
本身大嫂個女話想食薩莉亞餐廳，因為有得禁制...
之後大嫂就哄佢話pizza hut有bb餐具架喎...就係咁...佢就屈服左
去到睇落幾滿座，不過都唔洗等位，即刻就入得，坐卡位
3個大人望住個餐牌10幾分鐘，最尾要左個星級鬆厚批2人套餐，加個單點既蒜蓉包...我無飲，不過小朋友就幾鐘意...好重椰味，唔錯，而且d青椒紅椒食落口好淋，無左個種唔鐘意既味，變左易入口 登登~主角登場，唔知係米因為堂食，即整即食，所以感覺特別好味呢~
本身唔係咁鐘意芝心批邊既我，竟然對呢個一試愛上呀...
呢個香草蒜茄芝心批邊，食落無本身得芝士既芝心批咁漏，味道溝埋好夾，咬落個批邊仲好脆
真係食到停唔到口呀
咬落口熱辣辣，4個邊都好脆，蒜味都好夠，食完個口成陣蒜味

餐飲叫左熱檸水同凍奶茶，普普通通，無咩特別...

今次堂食好滿足，唔知係米因為所有野都即叫即整即食先有咁既質素呢

一粥麵 (天水圍)

唔知點解病既時候總係會想食粥，唔通呢個係定律黎?
所以呢日係銀行整完野就同男朋友同埋姪女去一粥麵開餐啦
我要左荔灣艇仔粥+齋腸粉，男朋友要左荔灣艇仔粥+炒麵，而姪女就要左雲吞河...
雖然一早已經搵左位坐低，但等拎野食都等左幾耐，可能制作需時啦...好夠味，唔洗落胡椒粉都已經岩食，而且好多料，有蝦、豬皮、叉燒，鯇魚片等等...
不過個人就唔係咁鐘意d粥入面有鯇魚片，可能覺得多骨，食起黎唔方便...
而男朋友就覺得d鯇魚片有腥味，唔係好新鮮...去拎野食既時候見到d腸粉佢係即叫即整架，而且碟野本身只係落左豉油，如果想要醬既話，係拎野食隔離有個位係放左好多支醬任你落，咁就唔驚唔夠醬啦

銀龍粉麵茶餐廳 (天水圍)

是日同大哥，大哥個女媽咪同埋男朋友出街食野，本身呀哥話食五十嵐，但媽咪話想食上次係銀龍食既米線...
所以就去左天恩果間銀龍，入到去其實唔算好滿座，但睇落去都好似無位...
因為d人全部都係2個人就坐張卡位，大細卡位都一樣...
不過咁都正常既，黎食野都想坐得舒服d，我明白...
但係我地5個人差唔多行到最入，先有人問我地幾多位，好多個侍應其實企晒係道，唔係咁做生意呀麻?
最後先慢慢幫我地搵位，之後就叫我地坐張本身已經有2個人既大檯...
跟住我地就叫野食，我同大哥就要左下午茶既芝士腸仔焗肉醬意粉，媽咪就要墨魚丸米線...
而男朋友原本係想常餐c，但係落單既時候竟然話無，之後男朋友同呀哥異口同聲就話常餐唔係全日都有既咩?之後個人竟然答話唔知，可能賣晒，所以到最後就要左常餐a...由於之前都黎過食芝士腸仔焗肉醬意粉，都覺得唔錯，本身幾期待，但係黎到見到個樣...
嘩...真係...不過野食不可貌相，所以好唔好都係要食過先知...咦...唔知呢碟係肉醬意粉定係肉醬意粉(碎)呢???
連呀哥成日食開銀龍都話今日唔知搞咩
當然味道都係唔係咁好啦，勁油，味道又濃過頭落單既時候講明少冰少甜，但係到既時候竟然無變過，係一杯正常又多冰既凍檸茶，果然好野~~~

忘不了雲南米線 (天水圍)

之前經開新北江已見到呢間小店新開業，個時都幾多人排隊，不過由於我已經食飽所以無去試！
某日好得閒，又未食野，所以就特登去試，一上完電梯就會見到，唔難搵...
去到無咩人，同男朋友就搵左個位坐低，望望下有個好似筆筒咁既野入面裝住成疊紙...
原來呢道係用畫紙落單，都幾方便，咁就同男朋友圈圈圈...
之後就俾個呀姐，呀姐先再問我地食咩辣然後寫低...唔洗等好耐碗野就到，可能無咩人掛，一望到都幾出奇，因為佢真係用個小鍋裝住d米線俾我地
味道方面認真唔錯，雖然唔算好辣，但係麻既份量岩岩好，唔會食到個嘴無知覺
不過男朋友果碗酸辣就唔係我杯茶，個隻酸我覺得好怪，不過男朋友話幾鐘意...
如果要講既話唯一唔好既就係d腩肉太大塊啦，諗住咬一半又咬唔開，所以勉強成塊放入口，差d哽親 凍檸茶:不過不失，合格

有一日諗住再去食既時候竟然已經汁左，都幾失望，變左第二間鋪，名又唔同左，變左食雞煲