富臨漁港囍臨門皇宴 (太子)

阿爸唔番屋企食晚飯，於是我同阿媽就近近地黎試吓呢度嘅火煱。
$118，全包，任飲任食。
6點先開始，未夠6點都唔俾上去住。
剛開始時已有幾張枱。
到差唔多七點，已經八成滿，生意算唔錯。

要了鴛鴦湯底，沙嗲& 芫茜湯。
不過兩者分別不大，因為兩者都無味。好係清水咁清。

鮮牛丸：雖唔算好彈，但味道調得好，好有牛味，仲有少少陳皮味添！
四寶丸：有牛丸、鯪魚球、豬肉丸同墨魚丸。雖然係手打，不過唔彈牙。牛丸同豬丸較好；鯪魚球有骨又腥腥地；墨魚丸無墨魚粒亦都無味。

滑牛肉：好新鮮，色澤紅潤；入口軟滑有牛味
肥牛：激差！個邊位已變黑，所以成碟無食過
豬潤：唔係黃沙潤，好硬呀！原本以為淥得耐所以硬，但再試淥短d時間，結果都係咁硬
雞片：雪雞，無味
黑柏葉：正！好爽口，淥一淥就食得！
豬爽肚：唔得！嗱到無味，連口感都好奇怪！

雲吞：蝦肉均勻，不過蝦實咗少少
水餃：好過雲吞，味道鮮d，口感爽d
菜肉雲吞：都係現貨，唔係自己包，所以味道唔差，好夠味；菜爽口，好味

海鮮拼盤 (free)：有蝦、帶子片同珊瑚蚌。蝦新鮮，蝦味濃肉質爽口；帶子好差已經嗱到咩味都無，無味又無口感；珊瑚蚌好食，好爽口，仲有鮮味
蔬菜款色多，有冬瓜、絲瓜、苦瓜、好多好多。

酸梅湯同竹蔗茅根水任飲。
味道偏淡，茅根水較好喝。

元気寿司 (旺角)

一家三口又去元氣食大滿足系列。
元氣換咗新menu 喎！
熟食多咗d款式，例如有烏冬，炸豆腐、大蜆湯等。

今次坐order 枱。又幾好喎，張枱較大，擺多幾個碟都無咁迫。
要了24件大滿足極上之選壽司！
由於係即整，而又只得兩個師傅，所以都等咗一陣先有呀！
由於十分肚餓，所以都有d等得唔耐煩。
服務員得好，聽到我嘅怨言(唔係直接同佢話，只係咁啱佢聽到)，就同話幫我催咗！
催完再等多一陣就有得食喇！
賣相一流，即刻開餐！
帶子雖唔係好大隻，不過好鮮甜，而且好厚肉。
赤海蝦啖啖肉，新鮮可口。
特大螺片其實唔算大，剛好蓋過舊飯，螺片爽口，但唔係特別鮮；
池魚新鮮唔腥，不過唔係太鮮味。
劍魚腩好肥美新鮮，魚油甚多。
長鰭吞拿魚腩，顏色有點怪，呈淺粉紅色，比較細塊；味道還可以的，但不太特別。
他他牛，好食喎！之前喺和花X食過，勁韌，根本咬唔到。但元氣嘅反而好食喎！唔韌！好有牛味！
炸蝦天婦羅，炸漿好厚，隻蝦又細又唔新鮮，雖未致於梅，但唔爽囉！

三文魚三味：
有煙三文魚、燒三文魚同三文魚壽司。
我食咗燒三文魚，好正喎！魚油燒晒出黎，滿口魚油！

海老三味
有生海蝦、熟蝦同赤蝦黃金燒。
我食咗生海蝦，都好新鮮，肉質淋軟。

油甘魚刺身
唔係切得好厚；新鮮魚油甘香。
不過墊底的蘿蔔絲唔新鮮，已變色。

炸蝦天婦羅烏冬
炸蝦天婦羅同壽司的一樣，炸漿厚蝦唔新鮮。
烏冬就好彈牙，湯底亦香。
不過唔夠熱呀！可能待了好久才送上枱。

炸軟殼蟹
我無食，不過阿媽話唔好食，炸得好油膩。
軟殼蟹無咩肉。只係得d爪。

迎囍大酒樓 (大埔)

外婆生日，例必會到迎囍食套餐。
今次選了水晶宴 ($2688)，當中可從一list 菜式中選三款，啤酒汽水任飲。
訂枱時講明要較靜的位置，他們亦辦得到，被安排坐在角位，較靜。

金豬大拼盤
有海蜇、叉燒、油雞、燒豬同牛。
海蜇爽口得黎有點韌；牛好咸。
燒豬肉幾好味，唔肥，唔會太咸。

紅燒竹笙海皇翅
都係例牌嘅生粉水，而且味道太咸。
料可以再加多一點。

百花蟹鉗
正常12隻。由於我地14人，所以加了兩隻 $28@。
14隻肥嘟嘟嘅炸蟹鉗。
雖唔可以話好彈牙，但新鮮炸起，外皮幾脆口。

琥珀花姿玉帶
琥珀即合桃，帶點甜味。
花姿片唔韌，不過無咩味；
帶子不過不失，都係急凍貨。
荷蘭豆翠綠，非常脆身。
整體味道偏咸。

碧綠珊瑚蝦球
西芹翠綠，爽口；
珊瑚蚌爽口，不過好咸。
蝦球係雪藏蝦，無味兼鞋口。
整體味道偏咸。

花膠扣玉掌
花膠屬劣質貨。
質地怪怪，好彈牙，無花膠味又無味。
似食塑膠多d囉！
鵝掌就相對地好味，蠔油汁好入味，鵝掌好有肉又炆得淋！
墊底的生菜通常都好味，咁多油浸住喎！同埋生菜好難會唔好味囉！

清蒸大海斑
唔掂！
好細條！完全稱唔上係 "大" 海斑！
細都唔在講，仲要腥架，唔新鮮！
蒸過火，魚肉較實同老。完全無鮮味！

脆皮醬燒雞
呢個正常d。味道剛好，只係翼位較咸。
皮脆，肉都嫩，不過都係雪雞啦，無雞味。

福建炒飯
原本係鴛鴦飯，不過我地改咗。
都幾好食。飯炒得乾身，一粒粒不會黐在一起。
面頭的獻汁味道較咸，撈埋飯一齊食就ok。
料份量適中，有蝦、帶子、雞肉、鴨肉等。
可加多一些芥蘭片同蘿蔔片，可減肥膩感。

壽包
好食過海港好多！
麵粉雪白；包質鬆軟；
內裡有好多蓮蓉，好滑又唔太甜！

紅豆沙 + 生果

咪走雞餐廳小廚 (大埔)

原本訂了海港，但由於成日食好悶，所以最後決定近近地黎呢到食就算喇！
一行12人，坐在店裡最後的枱，因為呢度只得一張大枱。
一坐下，就即刻睇menu叫野食。
我最忠於呢度嘅河粉，於是同表妹share一個蕃茄湯底魚蛋墨丸河 + cold 檸賓。
另外亦叫了好多餸，加$8可以有飯同湯。

先講我地個河粉先！
份量好多，兩個人share 食，每人都有2碗。
除了魚蛋，仲有魚片。
兩者都爽口鮮味，無碎骨。
河粉依舊有韌度，不會一夾即碎，不會太削太淋。
湯底味道濃，稍嫌咸咗少少。
不過有好多蕃茄粒同蛋花，正！

莧菜浸豬潤：
莧菜好嫩，已浸淋。
豬潤切成幼條，好爽口，應該係黃沙潤。
還加了杞子。個湯清清地，都幾好飲。

苦瓜肉碎菜甫炒蛋：
呢個送飯一流。肉碎同菜甫分佈均勻。
菜甫爽口不會太咸。
苦瓜不算太苦，配炒蛋好好味。

豉汁炒涼瓜：
之前都食過，水準依然。
涼瓜好甘好苦，好正！

叉燒：
今次嘅叉燒比上次好食多了！
有肥有瘦，梅頭叉燒，較淋身。
個醬汁亦唔會偏甜。

海斑兩食：
$138 有兩食，都幾抵呀！
西蘭花炒球：西蘭花炒完仍翠綠，很有咬口！
班球唔錯，好有肉，無骨，不過火候可再掌握好d，有少少炒過火。
蒸班腩：我無食，不過見到好多魚雲

炸豆腐：
我食咗一粒之後，碟野一瞬間就唔見咗喇。
炸得脆口，內裡的豆腐很燙口很滑。

炸九肚魚：我無食，但家人說無海港整得咁香咁脆口

唔去海港，咪走雞都係一個好選撰。
小菜款式多，價錢經濟實惠。

玄海日本料理 (紅磡)

上星期二係我生日，在OR search 到呢間野，d刺身好似好正，又有即開北寄貝，於是就決定去度食生日晚飯。
前兩天打去訂，仲訂兩隻新鮮北寄貝。
星期二晚差唔多七點到，周圍係工廠區，四圍都幾黑。
間野仲要d巷仔度，真係有一剎那想縮沙。
好在無縮沙咋，如果唔係就蠢啦！

呢間野雖然隱敞，但食物新鮮程度真係令人意想不到。
店仔細細，坐滿都唔足十五人。
座位都幾逼。
我地到時候無人，只得我地一家三口。
一坐低，一個亦係唯一一個女店員就話我地訂兩隻北寄貝，仲介紹今晚有咩新鮮食材。

刺身方面，我地叫
1. 牡丹蝦 ($120/ 2)：全部由阿爸食晒，佢話啖啖肉，很鮮味
2. 即開北寄貝 x2 ($160@)：簡直有喺北海道食咁鮮甜。 由於係即開，所以係灰色。肉質很爽口彈牙，鮮甜味十足，同喺北海道食無分別。兩隻份量剛好夠三個人食。
3. 即開赤貝 ($88/2)：赤貝質地無北寄貝咁爽口，黏黏地，好像有層黏膜包住赤貝肉。亦是新鮮得很，沒有鐵鏽味。
4. 海膽：我無食，不過阿媽話好鮮，唔腥
5. 深海池魚：第一次食，非常正。 $150/ 8片。池魚本身很新鮮，阿爸食完一舊即話"正"。吃下去不會吃到魚油，不會膩。肉質帶點爽口，魚味在口裡散發出來，有齒頰留香的感覺。
6. 珍珠蠔：新鮮送到，見到送貨員送到店，服務員再介紹我地食。一碟大概7隻，size 唔算大，剛好一口一隻。配了個酸汁，去掉了齋食蠔那種很膩的感覺。
7. 一般刺身 (e.g. salmon, tuna)：三文魚同劍魚腩肥美；不過吞拿魚雖然無根，但係味道唔鮮，可以不試。

手卷：
鵝肝手卷
蔥花鱆紅魚手卷：原本係要蔥吞拿魚腩，但係無貨；於是叫劍魚腩，又無貨。
最後唯有揀鱆紅魚。鱆紅魚唔似吞拿魚可以切得咁碎，又無咁黏身，所以魚肉好像比較散。但鱆紅魚味道是很鮮，只是用來做手卷好像格格不入。而且醋落得太多，飯很酸。

熟食：
1. 雞腎串燒: 雞賢爽口，但係有雪味
2. 牛串燒: 薄切，口感不足；好在唔太韌
3. 清酒煮蜆：清酒味不算濃，但蜆非常大隻，隻隻都好飽滿，好似大肚咁
4. 豚肉生姜燒：熱辣辣，豚肉炒得好入味，仲有紅蘿蔔絲、鮮冬菇同金菇
5. 海鮮炒飯：又係熱辣辣，有蝦、魷魚粒、紅蘿蔔粒；炒得幾香，又唔會油膩。
6. 燒魷魚鬚：燒得唔夠乾身，味道亦偏淡，但魷魚鬚彈牙，唔韌，很好

整體感覺好好，雖只得一個服務員，但她很有禮貌，而且好識介紹食品。
可惜當晚無帶相機，只能用手機拍下照片。
雖然地點有少少難揾，間店又細，不過食物質素極好！
一定會再黎！