mavis3456 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2021-12-16
我老豆食嘢要求高,又嘴刁,鍾意食海鮮;我哋每年諗餐廳慶祝諗到頭都大,今年姐夫竟然大膽提議話請老豆去食海鮮,連餐廳都決定埋,我同家姐細佬梗係唔畀意見,坐定定等食啦~餐廳毗鄰魔鬼山,食飯之前可以睇埋日落,一家大細行都完全冇難度。 餐廳門面光猛闊落,樓底高,有2層,樓上座位以房間形式為主,隱私度高,適合私人宴客形式。我們坐的房間有海景,可能我到嘅時候已經入黑,享受不了。 就著餐廳員工的介紹和我們的喜好,我們有大有細,一共6大2小,點了很多不同嘅海鮮,包括帶子、蟶子、蝦、瀨尿蝦和龍蝦等,超豐富。 海鮮湯 來之前看過食評,很多人都大讚這裡嘅海鮮湯足料夠鮮味,今次試過後,發現的確鮮味十足,而且材料豐富,裡面除了有魚蝦之外,還加入了蜆肉、木瓜、芥菜、蕃茄、紅蘿蔔和豆腐等,喝起來魚鮮味濃,清甜而不膩,一點也不腥,反而,喝完也不覺有半點負擔,連平日不會主動喝湯嘅5歲小姨甥也喝了兩碗,十分難得。 要說的是,呢餐飯嘅每道海鮮味道都相當不俗呢。 生炒骨 生炒骨同樣係呢度嘅招牌菜,店員介紹話午飯時間好多人會點。排骨炒得好惹味,酸甜味恰到好處,十分開胃;炸粉厚薄適中,入口鬆脆,如果可以多啲菠蘿就好喇~不過,如果同海鮮比較,一定係海鮮出眾好多! 白灼海中蝦 除咗海鮮湯,另一樣令我姨甥仔食得津津有味嘅就係白灼海中蝦。蝦夠大隻夠新鮮,肉質實淨,食落爽口彈牙,唔沾豉油都好好食,食到蝦肉嘅鮮甜味,姨甥仔自己一個食咗差唔多半碟。 蒜蓉粉絲蒸元貝 粉絲煎元貝差唔多海鮮餐必食嘅嘢,熱氣騰騰嘅元貝一大盤端出來,賣相非常吸引,有氣勢;加上蒜香味,令人食指大動。必須強調的是,帶子超級大隻,你看,每隻都大約我姐的手掌,大大隻,又飽滿厚肉,夠肥美,吃起來彈牙唔乾身,爽甜無渣,伴著蒜蓉粉絲一齊食,十分惹味。 豉椒蟶子皇煎米粉 餐廳推介煎米粉,話係大廚推介菜式,咁我哋都無理由唔試。加上老豆鍾意食蟶子,就一於試下。見到廬山真面目,煎米粉隨即成為全場焦點,大家變得超雀躍,叫我快啲影完等佢哋可以食。 蟶子勁大隻,脹卜卜,同平時媽咪喺街市買返屋企烹調嘅真係完全唔同。食落爽口無沙,而且啖啖肉;一問之下,原來係高質貨,係嚟自愛爾蘭嘅蟶子!蟶子以外,煎米粉絕對更加係加分嘅一環。入口酥脆如鍋巴,配上味濃但唔鹹嘅豉椒汁,份外惹味,兩者簡直係絕配。 椒鹽瀨尿蝦 呢味海鮮係我老豆嘅至愛,出街食海鮮必食嘅。一碟有2隻瀨尿蝦,同平時長過手指多啲嘅真係相差好遠,原來可以咁大隻。你睇,每隻瀨尿蝦都舖滿椒鹽,食嗰陣鹹鹹哋,又辣辣哋,香口惹味,正~食呢款瀨尿蝦,一定要舔晒成隻蝦殻,舔埋手指先係最高境界!唔怕話你知,我哋ENCORE咗呢味餸,因為真係太精彩,老豆好鍾意~第2碟嚟嘅蝦仲要更加大隻,更多肉之餘,仲有埋膏,好CRAZY! 芝士焗龍蝦(伊麵底) 這個芝士焗龍蝦配伊麵有別於平時吃嘅芝士焗龍蝦,嚟到嗰陣,入面啲芝士仲滾緊,令人食指大動。另外,平時食呢個餸,會因為芝士太膩,調味太濃,會一啖起兩啖止,但呢個係完全唔會,反而令我食完一啖又一啖,一啲都唔覺漏。 唔知你有冇留意到,呢個芝士焗龍蝦嘅芝士顏色偏黃,同喺其他餐廳食嘅唔同,問咗老闆,原來係用咗比較另類嘅西西利島芝士,我更加係聽都未聽過啦~~~就係呢個芝士焗龍蝦,令平時唔係好鍾意食呢個餸嘅我都食過返尋味,有心機去品嚐啲龍蝦,蝦肉勁飽滿厚肉,食落爽彈有口感,令人忍唔住食多幾件。伊麵煙韌,配埋個芝士汁真係無得頂。 值得一提嘅係,呢盤芝士焗龍蝦真係好大盤,好似臉盆咁大,大盤過隔離煲湯。我哋打包返屋企,第2晚食一樣咁好味,蝦肉都係爽,無變霉到,好神奇呀! 招牌椰皇 甜品壓軸登場!聽說呢個係漢記嘅鎮店之寶,係上手嘅招牌甜品,老闆接手嗰陣,要求上手教授先得似保留,不過都唔完全係100%原來嘅秘方。聽講製作過程好複雜,差唔多要成個鐘,我地無提早預訂,數量有限,所以就2人share 一個嚟食。 本身睇個樣諗住無咩特別,好似布甸口感,甜甜哋咁。但原來誠意十足,除咗用原個椰子上之外,仲用返椰子水,加入蛋白和日本3.6牛奶去原個燉,完全無添加糖份,食落唔只滑,而且有好滋潤嘅感覺,絕對係健康好味又打卡able嘅甜品!如果大家想食,建議訂位個陣預留埋~ 今餐真係大滿足!重點係,連平時出街食飯彈三彈四嘅老豆都讚,仲話下次要再嚟,就知道水準唔會差得去邊。我同家人都覺得廚師功力好夠,每款食材都拿捏得好好,絕對值得大家一試。 最後仲有好大碟生果盤~ 因為餐廳係鯉魚門,我喺食飯之前就先約朋友行個靚山,之後再JOIN屋企人去食晚飯~魔鬼山唔難行,睇日落真係一流,一家大細行都完全冇難度。不過我當日就嫌路線短,想行一個下晝,就去埋石礦場段,最後附上靚景畀大家望下啦。 推介美食: 椒鹽瀨尿蝦, 豉椒蟶子皇煎米粉
評分: 味道 4 環境 4 服務 4 衛生 4 抵食 3
2017-06-15
荃灣美食多,是個平食掃街好去處。不過,有時都想找個地點落腳,靜靜地用餐。想不到去哪裡?我就在千色店後面的內街角落發現了這家天鵝 Café。這 Café 來自大埔,不少人也推介其窩夫,一直都在我的 To-Eat-List上。想不到,這次不用到大埔,我就能吃到了。 餐廳坐落在角落處,外面的玻璃門櫃內有一隻大天鵝模型,不知為何,我旋即想起醜小鴨變天鵝的故事。 跟朋友商量過後,點了2個主食、1個甜品和1個附上拉花的綠茶鮮奶。 -軟殼蟹黑松露忌廉意大利粉 ($108) -黑松露雜菌蘑菇屋 ($78) -紫薯雪糕窩夫 ($88) -綠茶鮮奶 ($36) 軟殼蟹黑松露忌廉意大利粉 ($108)最能引起我食慾的是那香噴噴的黑松露香味。 吃過了意粉,且看看同樣是黑松露的意大利飯(黑松露雜菌蘑菇屋 ($78))又如何? 吃過飯和意粉後,便向店員示意可以上甜品。 終於到了吃甜品的時間了!其實,這店的窩夫口味實在太多,我們千挑萬選下,最後還是選了紫薯雪糕窩夫 ($88)。可能朋友知道我是個「紫薯控」吧! 推介美食: 蘑菇屋
評分: 味道 4 環境 4 服務 4 衛生 4 抵食 3
2015-12-31
雖然之前聖誕無咩節日氣氛,但都有同朋友一齊去食聖誕大餐。我覺得,又唔係真係要去酒店個啲先叫聖誕大餐嘅,宜家一啲café都可以做出一啲有心思嘅菜式,價錢又無咁貴,感覺經濟多了。 平時好少去北角呢邊,雖然在港島上班,但家住新界,吃個飯再坐車差不多一小時多才到家,每次想到這個,哪怕多吸引的美食,我都會打退堂鼓。不過,今次朋友叫到,加上聖誕節一年才一次,我就答應了。 為避開高峰期,我們提早吃大餐,就在12月21日晚上。店內帶點復古味道,加上聖誕節裝飾所營造嘅情調,我們都覺得呢個聖誕餐吃得特別有氣氛。 - 巴馬火腿配金巴利子華都夫沙律 - 酥皮海鮮湯 - 威靈頓牛柳配黑松露燒汁(可選另一主菜:鵝肝慕絲釀鴨胸配金巴利子燒汁) - 八安士安格斯芝士蘑菇漢堡配辣肉腸及薯角 - 香煎美國安格斯肉眼扒 - 雞翼大聯盟 (18隻) - 鮮果奶凍 - 草莓奶凍 - 提拉米蘇杯 - Oreo 紅豆奶茶 - 岩鹽焦糖朱古力 係咪好豐富呢?所以我們食到一半已經飽~~~聖誕大餐就係要咁XDD 巴馬火腿配金巴利子華都夫沙律(套餐內) 酥皮海鮮湯(套餐內) 威靈頓牛柳配黑松露燒汁(套餐內) 八安士安格斯芝士蘑菇漢堡配辣肉腸及薯條($98) 香煎美國安格斯肉眼扒[配薯粒]($148) 雞翼大聯盟 (18隻) ($108) 終於到甜品喇~~YEAH!! 我們3個人,就每樣一個試下啦~~ 鮮果奶凍($28)及 士多啤梨奶凍($28) 提拉米蘇杯($38) Oreo紅豆奶茶 ($24) 岩鹽焦糖朱古力(套餐內) 呢個無預期般好飲,我跟朋友都覺得,鹽味和焦糖味不夠突出,跟一般朱古力飲品沒大分別。 呢間餐廳啲份量真係好多,價錢不貴,如果平時要同朋友慶祝生日,都可以考慮下嚟呢度食。因為食物質素唔錯之餘,又夠特別。不過,對我嚟講,又真係遠咗少少。可能下次試下其他分店喇~~呢個套餐除咗北角,另外馬鞍山同及粉嶺分店都有架! 平時呢度主打 Fusion 菜,中西都有,仲有 All Day Breakfast架!如果我住附近就好喇! 題外話/補充資料: 威靈頓牛柳配黑松露燒汁、雞翼大聯盟、香煎美國安格斯肉眼扒、Oreo紅豆奶茶、提拉米蘇杯推介美食: 威靈頓牛柳配黑松露燒汁,香煎美國安格斯肉眼扒,Oreo紅豆奶茶,提拉米蘇杯
評分: 味道 4 環境 4 服務 4 衛生 4 抵食 4
2013-08-13
一星期多前,另一位食評家在我的食評留言了,我看回她的食評時,發現了這小店,也許這叫緣份。因為我在這段時間碰巧在那邊做兼職,之前一直未曾踏足那個角落。 這家店不難找,在屋苑的平台商場一家上海菜館旁邊。看,它的裝飾挺特別,尤其是它的擺設呢。看起來像是擺設,其實它們都各司其職。正如這個看上去是鴛鴦雪糕窩夫,其實它是醬瓶。出乎意料吧! 在等的過程,把店舖環境都拍下來。我看到店裡現在有很多新的產品,專為夏天特製的。如有果汁梳打、水果雪糕窩夫及夾餅等。我很想吃窩夫,可惜還在咳呢。 終於可以吃了!拿在手上,我已聞到開心果的香味。 拿近看,你們是否也看到真材實料呢? 真的有開心果的呀!真的想不到雞蛋仔也能這樣多變化。 雖然涼了,但是一咬,外皮仍是脫的,很棒呢!開心果在外面涼了,但也沒有變「淋」呢,仍是跟平時吃的開心果一樣,不過可能沒有外皮,所以不會鹹;正因如此,雞蛋仔的味道不會被喧賓奪主,輕易地保留了甜味。=) 店內張貼了一張字條「不加一滴水」,以示蛋漿真材實料。一咬雞蛋仔,外脆之餘,更是內軟!你看,裡面多綿實,想找一點罅隙也難,的確是真材實料呢!值得鼓掌!! 我覺得這店很有創意,對食物製作很有熱誠。不過食物價錢稍貴呢。定價在$15以下會較合理,然後將份量減一點,我想這樣會吸引點。畢竟這些是小食,不能當飯吃的。「小吃多滋味」,每種食物嘗一點點,這樣可以嘗到不同的食物,不同的款式也嘗一點點,不是更好嗎?我說過,待我康復了,我一定會去吃窩夫的!! 題外話/補充資料: 小小提議:雞蛋仔的可塑性很高的,我想,老闆娘不妨想想製作流心版的雞蛋仔呢?朱古力流心,芝士流心,流沙雞蛋仔……哈,應該挺特別吧?推介美食: 開心果雞蛋仔
評分: 味道 4 環境 3 服務 4 衛生 3 抵食 2
2023-11-14
聽人話呢間工廈裡面嘅泰國菜幾抵食,平日放工之後都唔少人特登去食,所以今次我都拉咗個FD去試下。 黃咖哩海鮮 $85 (蒜蓉包 加$15) 咖哩海鮮咁惹味,梗係要配蒜蓉包食啦~黃咖哩香氣濃厚,帶微微辛辣感;海鮮有青口、蝦同魷魚,份量足又夠豐富。而蒜蓉包好香,但食落一啲都唔油,沾咖哩真係無得彈~加$15就有4塊,真係幾抵。 手工泰式春卷4件 $58 春卷一份有4條,即叫即炸,上枱時熱辣辣。外皮薄而脆,內餡有肉碎、粉絲、蘿蔔、黑木耳絲等,口感豐富,蘸埋泰式辣醬仲惹味! 泰醬酸辣黑豚肉 $128 呢個係新出品,所以叫嚟試試~黑豚肉肥瘦相間,脂肪特別爽口,有食豬頸肉嘅感覺。特調嘅泰醬,食落同冬蔭公味有啲似,但問過餐廳,話唔一樣;呢個醬酸辣味濃,可以伴沙律菜食。不過我哋嫌太鹹,有啲偏重口味。 椰汁珍多冰 $18 金鑽鮮菠蘿冰 $20 飲品揀咗椰汁珍多冰同菠蘿冰,朋友杯珍多冰好香椰味,入面有綠色嘅珍多粉氣,食落口感爽滑,味道清甜。 聽講飯後果最好食菠蘿,所以我就揀咗菠蘿冰,大大嚿新鮮菠蘿,新鮮又香甜多汁! 椰皇3重奏 $42 呢個甜品最有驚喜~本身係3重奏,我哋呢個有埋原個椰皇上陣,所以應該叫「四重奏」。 推介美食: 椰皇3重奏
評分: 味道 3 環境 3 服務 4 衛生 3 抵食 4
|